PAIMBA 25
25
Banca Isaraeli ri Buyu mPeori
25:1-18
1Sindara ngkaroo-roo banca Isaraeli ri Lembo ntana Sitimi, waʼa ntuama ntau seʼe montepuʼumo mosalara pai waʼa mbeʼa nto Moabi anu njau njairia. 2Waʼa mbeʼa setu maenggeri tau seʼe njoʼu ri waʼa mposusa panyomba da mabangkei lamoa ntau seʼe. To Isaraeli tesua woʼu mangkoni panyomba setu pai manyomba ri lamoa nto Moabi. 3Ua panyomba nto Isaraeli ri Baali anu ri Peori, painaka marau raya i mPue ri tau seʼe, pai ndapantoʼoka i Musa, 4“Sokomo pura-pura tau anu mantadulakoni banca setu pai pepatemo tau seʼe ri suara ntau sondo silulu pai songkaku, da naka tepoda karau ndayaku ri banca setu.” 5Ungka lairia natoʼo i Musa ri ntopobotusi nto Isaraeli, “Komi sambaʼa-sambaʼa seʼe sangaya-ngaya da mampepate pura-pura tau ri lembami anu roomo mampanyomba Baali ri Peori.”
6Sindara i Musa pai waʼa ntau pura-pura mokukuou ri suara dampo ngKema i mPue, nakita ntau seʼe sambaʼa to Isaraeli mangkeni mpesua ri raya ngkemanya sambaʼa weʼa nto Mijea. 7Butu nakita i Pinehasi, ana i Eleasari, makumpu i nTadu mPanyomba Haruni anu mewali setu, liu-liu meoko siʼa napalaika tau mompasambaka setu. Natima samata tawala 8nepa naduduki tuama pai weʼa setu ri raya ngkema. Narancongi ntawala raduamo seʼe, painaka teʼontomo pepepate anu rimbo-rimbo mpewalinya ri Isaraeli setu. 9Paikanya ri tempo setu reʼemo 24.000 tau anu mate.
10Nepa ndatoʼo i mPue ri Musa, 11“I Pinehasi ana i Eleasari, makumpu i nTadu mPanyomba Haruni, masalibari mampekakoreka katetubunaka-Ku ri oyo nto Isaraeli, painaka mongku karau ndaya-Ku bareʼe mewali Kuʼopisaka banca setu. 12Mewali toʼokamo i Pinehasi, Yaku mampareʼe pojanji pai siʼa. 13Siʼa pai mulinya kupakanoto mewali tadu mpanyomba rantani masae-sae, maka siʼa masalibari kojo mampekakoreka Yaku, Pue Ala puenya, pai mampareʼemo kasimadago ua salaa nto Isaraeli.”
14To Isaraeli anu ndapepate sangkani-ngkani pai weʼa to Mijea setu toʼonya i Simeri ana i Salu, tadulako lemba ungka ri lemba i Simeo. 15Weʼa setu toʼonya i Kosibi; ana i Ncuri sambaʼa tadulako ri santina to Mijea.
16Ndawai i mPue songka seʼi ri Musa, 17“Ewamo to Mijea pai da nuropumo tau seʼe 18ua jaʼa anu roomo nagombo ntau seʼe mangkono komi ri Peori, pai ua i Kosibi ana ncambaʼa tadulako nto Mijea i Kosibi setu sambaʼa weʼa anu mate ndapepate sindara rugi ua anu mewali ri Peori.”
