PAIMBA 19
19
Japi mawaa anu ndaʼombasi
19:1-10
1Ndasongka i mPue i Musa pai Haruni, 2da mamparata waʼa ncongka seʼi ri waʼa nto Isaraeli: Timamo sambaʼa japi tina anu mawaa anu bereʼe posarinya pai bareʼepa reʼe ndapampasanga. 3Waikamo i Tadu mPanyomba Eleasari japi setu. Pinatuwu setu sangaya-ngaya da nakeni ri sambliku ngkareʼe mpokema nepa da nasambale njairia ri suara ntadu mpanyomba. 4Nepa da natima i nTadu mPanyomba Eleasari sakodi daa mpinatuwu setu, nepa da napewebuka papitu ngkani sitondo Kema i mPue. 5Nteliogu pinatuwu setu da ndaʼombasi, pelanya, sanganya, daanya pai wayaa ngkomponya sangaya-ngaya da ndaʼombasi ri suara ntadu mpanyomba. 6Ungka lairia da natima i ntadu mpanyomba sanceso kaju arasi, santoko soi pai sambayaa wayaa mawaa, nepa natendeka ri raya apu anu ntongo mareka-reka mangkoni japi anu mawaa setu. 7Roo setu da nabusu i ntadu mpanyomba rengkonya nepa mandiu. Roo setu mayamo siʼa mesua ri kareʼe mpokema paikanya siʼa ntongo karikapa rantani soyo reme. 8Ewanceʼe seʼe tau anu mantunju japi setu, sangaya-ngaya da mabusu rengkonya pai da mandiu, pai siʼa seʼe ntongo karikapa rantani soyo reme. 9#Ib. 9:13 Nepa sambaʼa tau anu bareʼe karika da mampasambaka amaa japi setu pai da nadika ri tampa anu bareʼe keʼonu ri sambaliku ngkareʼe mpokema. Amaa setu ndadika iretu da naka naleʼo nto Isaraeli mantima da napake mampowia ue upacara pompakagali tila ngkatesompo ncalaa. 10Tau anu mampasambaka amaa japi setu da mabusu rengkonya, paikanya siʼa karika rantani soyo reme. Songka setu da ndawianaka rantani masae-sae, madago ri to Isaraeli ewanceʼe seʼe ri tau mencua anu maroo-roo ri oyo ntau seʼe.
Ue pompakagali
19:11-22
11Tau anu kono maisu watangkoro ntau mate, mewali karika papitui ndeme kasaenya. 12Ri reme anu katatogo pai kapapitu siʼa da mampakagali koronya pai ue upacara; nepa da magali siʼa. Paikanya ane bareʼe napakagali koronya ri reme anu katatogo pai kapapitu, siʼa karika mpaliu. 13Tau anu maisu watangkoro ntau mate pai bareʼe mampakagali koronya siʼa karika, maka siʼa bareʼepa ndabubusika ue mpoʼupacara. Siʼa mampakarika Kema i mPue, inceʼe painaka siʼa bareʼemo tesua ri imba waʼa ntau i mPue Ala.
14Ane reʼe sambaʼa tau mati ri raya kema, bara isema ntano anu reʼe ri rayanya pai bara anu mesua ri raya ngkema setu, mewali karika papitu ndeme kasaenya. 15Pura-pura gumba pai kura anu bareʼe ndatutuwi inceʼe seʼe mewali karika. 16Pura-pura tau anu kono watangkoro ntau mate ndapepate bara anu mate ngkalionya ri jamaa, mewali karika papitu ndeme kasaenya. Ewanceʼe seʼe tau anu mangaijaki dayo bara maisu wuku ntau mate.
17Da mampakagali tau anu karika setu, sangaya-ngaya da ndatima sakodi amaa japi mawaa anu tina pai anu roo ndaʼombasi setu tila ngkatesompo ncalaa. Amaa setu da ndawunca ri raya ngkura nepa ndawebusika ue anu ndatima ungka ri ue anu moili. 18Anu kaʼisa da ndawianaka, ane reʼe tau anu mate ri raya ngkema, tau anu bareʼe karika, sangaya-ngaya da mantima santoko soi, da naome ri raya ue setu, nepa nawebusika kema sangkani pai waʼa mparewa anu njau ri rayanya, ewanceʼe seʼe waʼa ntau anu njau njairia. Anu karadua, inceʼemo tau anu mainu wanta ngkoro ntau mate, bara dayo, bara wuku ntau mate, tau anu bareʼe karika sangaya-ngaya da mawebusi tau anu karika setu woʼu. 19Siʼa sangaya-ngaya da mawebuka ri reme anu katatogo pai kapapitu. Ri reme anu kapapitu tumumpumo upacara pompakagali tau anu karika setu. Tau setu da mabusu rengkonya pai da mandiu. Tepuʼu ungka ri kasoyo ndeme magalimo siʼa.
20Tau anu mewali karika pai bareʼe mawianaka upacara pompakagali, karika mpaliu siʼa, maka siʼa bareʼepa ndabubusika ue upacara. Siʼa mampakakarika Kema i mPue, inceʼe painaka siʼa bareʼemo tesua ri imba waʼa ntau i mPue Ala. 21Songka setu da ndawianaka rantani masae-sae. Tau anu mampowebuka ue upacara setu, sangaya-ngaya da mabusu rengkonya, pai tau anu kono ue mpowebu setu, mewali karika rantani soyo reme. 22Parewa anu kono naisu ntau anu karika setumewali karika, pai tau ntaninya anu kono maisu mewali karika woʼu rantani soyo reme.
