PAIMBA 18
18
Tetala waʼa ntadu mpanyomba pai waʼa nto Lewi
18:1-7
1Ndatoʼo i mPue ri Haruni, “Siko, pai waʼa anamu sangkani pai waʼa nto Lewi anu sangaya-ngaya da mangangkoyo huku waʼa ngkasala anu tepewali ri raya ngKemaku, paikanya podo siko pai waʼa anamu anu da mangkoyo huku ncala anu tepewali ri potetala waʼa ntadu mpanyomba. 2Waʼa ngkasangkompomu, lemba nto Lewi, sangaya-ngaya da nupapotetala ewa topotetala ri pawianakanya tetalanya pai ri potetala waʼa anamu. 3Waʼa nto Lewi sangaya-ngaya da mawianaka tetala mpeporiokoi ri komi pai mawianaka tetala ntau seʼe ri Kemaku, paikanya tau seʼe bareʼe maya mantimosuki lampaʼani mpanyomba bara maisu waʼa mparewa anu magali ri Lincu Magali. Ane nalewa ntau seʼe songka setu, madago tau seʼe ewanceʼe seʼe komi da mate. 4Tau seʼe sangaya-ngaya da motetala sangkani-ngkani pai komi, pai mawianaka tetala anu reʼe pokentanya pai peporiokoi ri raya ngKemaku, paikanya tau anu bareʼe ndasongka da mampotetalaka inceʼe, bareʼe maya motetala sangkani-ngkani pai komi. 5Podo siko, Haruni, pai waʼa anamu, anu sangaya-ngaya da mawianaka tetala ri raya Lincu Magali pai lampaʼani, da naka neʼe merata woʼu karau ndayaku ri waʼa nto Isaraeli. 6Kamonconya, roomo kupilisi waʼa ntinamu to Lewi, ungka ri banca Isaraeli mewali pombaiku ri siko. Tau seʼe roomo kupatani galaku, da morioko ri Kemaku. 7Paikanya podo siko pai waʼa anamu anu maya da mawianaka tetala ntadu mpanyomba, ri ngaya-ngaya ntetala anu mokenta pai lampaʼani pai nunjaa anu njau ri Lincu Magali mPodago. Incetumo kinoyomu, maka roomo Kupatongko komi ri tetala ntadu mpanyomba. Pura-pura tau anu bareʼe ndapapakoyoka tetala setu da ndahuku mate ane mantimosuki waʼa mparewa magali setu.”
Panta tila waʼa ntadu mpanyomba
18:8-20
8Ndatoʼo i mPue ri Haruni, “Neʼe nukalingani! Pura-pura mpanyomba anu ndapatani ndapanyombaka ri yaku anu bareʼe ndaʼombasi, inceʼemo galamu. Incetumo tilamu anu roo ndapakanoto rantani masae-sae. Inceʼemo anu Kuwaika siko pai waʼa mulimu. 9Ungka ri waʼa mpanyomba anu maʼai ngkagali, anu bareʼe ndaʼombasi ri wawo lampaʼani, anu da kuimbasi seʼi inceʼe datilamu: Panyomba anu motaʼa pangkoni, panyomba ngkabareʼenya ndakitanaka salaa pai panyomba poncawani rugi. Pura-puranya setu panyomba magali anu da mewali tilamu pai tila waʼa anamu. 10Incetumo anu magali tilamu, mewali sangaya-ngaya da ndikoni ri tampa anu magali woʼu. Podo waʼa ntuama anu maya mangkoni.
11Waʼa mpanyomba anu ntaninya anu napanyombaka nto Isaraeli ri yaku, inceʼe seʼe da tilamu. Kuwaika siko pai waʼa anamu tuama pai weʼa. Songka setu da ndalulu rantani masae-sae. Pura-pura bangani ncomborimu anu bareʼe karika maya nakoni.
12Kuwaika siko waʼa anu maʼai ngkadago ungka ri uyu mbua anu napanyombaka nto Isaraeli ri yaku santaʼu-santaʼu, inceʼemo: lana saitu, ue anggoro pai gandu. 13Pura-pura setu paka galamu. Pura-pura tau bangani ncomborimu anu bareʼe karika maya nakoni.
14 #
Tad. 27:28
Mpengaya-ngaya anu reʼe ri tana nto Isaraeli, anu roo ndapatani da galaku, inceʼemo tilamu.
15Pura-pura ana uyue ntolino pai pinatuwu anu ndapanyombaka nto Isaraeli ri Yaku, inceʼe tilamu. Paikanya waʼa anamu anu uyue pai ana uyue mpinatuwu anu kapali da nuosu. 16Waʼa anami sangaya-ngaya da ndiosu ri kagananya tinuwu sambuya. Olinya ewa anu roo ndapakanoto setu inceʼemo alima ngkomba doi salaka, silulu olinya anu ndapake ri Kemaku. 17Paikanya japi, bimba pai mbula anu uyue bareʼe maya ndaosu. Pinatuwu setu manoto da galaku pai sangaya-ngaya da ndapanyombaka. Daanya da ndibubusika lampaʼani pai lorinya ndiʼombasi mewali panyomba. Maka wau mpasoanya mampakawongko rayaku. 18Sanganya, dada pai paʼa mokana mpinatuwu anu ndapanyombaka ri yaku inceʼe da galamu.
19Pura-pura panyomba anu ndapatani nakeni napanyombaka nto Isaraeli ri yaku, rantani masae-saenya inceʼe da galamu pai waʼa anamu tuama pai weʼa. Katewianaka ncongka setu da ndalulu rantani masae-sae pai da mewali poʼusi mpojanjiku pai siko rata ri waʼa mulimu, pai bareʼe maya ndapaposa.”
20Ndatoʼo i mPue ri Haruni, “Komi bareʼe da reʼe bara nunjaa-njaa pantami. Maka ri tana anu kujanji setu bereʼe mau sambaka tana anu da ndipotumpu. Yaku, Pue, inceʼemo tilamu anu da nupopanta.”
Panta waʼa nto Lewi
18:21-24
21 #
Tad. 27:30-33, Paw. 14:22-29 Ndatoʼo i mPue ri Haruni, “Pura-pura sampitila sampuyu anu napanyombaka nto Isaraeli, kuwaika waʼa nto Lewi. Inceʼemo panta tila ntau seʼe ua potetala ntau seʼe ri Kemaku.
22Waʼa nto Isaraeli anu ntaninya bareʼe maya mantimosuki Kemaku setu da naka neʼe napowia ntau seʼe salaa paianaka tau seʼe mangkoyo huku mate ri koronya. 23Montepuʼu seʼi-seʼi podo to Lewi anu maya mampasilolongani Kemaku pai maincani katewianaka waʼa ntetala njairia. Songka setu kono woʼu waʼa mulimu rantani masae-sae. To Lewi bareʼe mamputumpu panta ri oyo nto Isaraeli, 24maka panta tila ntau seʼe anu kuwai inceʼemo sampotila sampuyu anu napanyombaka nto Isaraeli. Inceʼe puʼunya painaka kutoʼo to Lewi bareʼe da marata panta ri oyo nto Isaraeli.”
Panyomba sampotila sampuyu ungka ri to Lewi
18:25-32
25-26Ndapokau i mPue i Musa, da mamparata songka seʼi ri to Lewi: Ane komi mantarima ungka ri Isaraeli panyomba sampotila sampuyu anu ndawai i mPue da galami, sangaya-ngaya sampotila sampuyu ungka ri pura-pura setu da ndipanyombaka ri Pue, mewali panyombami anu ndapatani. 27Panyomba anu ndapatani setu ndapasiwia pai panyomba gandu dawoʼu paiue anggoro anu dawoʼu. 28Ewanceʼemo komi woʼu sangaya-ngaya da mampanyombaka panyomba ntepatani ri Pue santila ungka ri panyomba sampotila sampuyu anu napanyombaka nto Isaraeli. Panyomba ntepatani setu sangaya-ngaya da ndiwaika i Tadu mPanyomba Haruni. 29Anu da ndiwai setu da ndipilisika anu maʼai ngkadagonya ungka ri anu nditarima setu. 30Ane roomo ndipepombaika anu santila setu, mayamo nditima yabinya, ewa sambaʼa to pojamaa woʼu mantima yabinya ri karoonya nakeni panyombanya. 31Yabinya setu mayamo ndikoni pai rongomi sangkani pai waʼa anami, ewa gaji mpotetalamu ri Kema i mPue. 32Bareʼe ndipomasala ane ndikoni, podoia tilanya anu maʼai ngkadago, roomo ndipanyombaka ri Pue. Neʼe ndipakakarika kagali mpanyomba nto Isaraeli ua pangkonimi ungka ri njaa anu ndapanyombaka setu ri kabareʼepanya tilanya anu maʼai ngkadago ndapatani tila i mPue. Maka ane ndilewa songka setu, komi da mate.
