PAIMBA 20
20
Waʼa anu mewali ri Kadesi
20:1-13
(Pa. 17:1-7)
1Ri wuya anu kaʼisa jelamo to Isaraeli ri pada bone Sini, maroo-roomo tau seʼe ri Kadesi. I Miria mate pai ndadayomo njairia.
2 #
Pa. 17:1-7
Ri anu sangkani ri kareʼe mpokema ntau seʼe bereʼe ue. Jelamo waʼa nto Isaraeli malimbu i Musa pai Haruni, 3seʼi monggantali natoʼo, “Moruana kami matemo ri suara i mPue sangkani-ngkani pai waʼa ngkasangkompo mami! 4Ara wenu painaka nupoyunu kami maʼi ri pada bone seʼi? Bara da naka mate kami sangkani-ngkani pai waʼa mpinatuwu mami? 5Nunjaamo yowenya nupampapesuwu kami ungka ri tana Masiri nupoyunu ri kareʼe ngkapari seʼi, sako pinamuya bareʼe tuwu ndapomuya? Ireʼi bereʼe gandu, bereʼe ara, anggoro pai delima. Sakoja ue ndainu bereʼe!” 6Natilawangi i Musa pai Haruni waʼa ntau setu, nepa mekakore mosu ri dampo ngKema i mPue. Metutu manyomba tau seʼe, sindara setu sindi ngkilaya ngkarata i mPue marara tau seʼe.
7Ndatoʼo i mPue ri Musa, 8“Timamo tokoanu njau ri suara mPeti mPojanji, nepa siko pai Haruni sangaya-ngaya da mampasambaka waʼa nto Isaraeli. Da ri suara ntau seʼe pura-pura, siko sangaya-ngaya da mantoʼo roka mbatu sinjau da mampapesuwu ue. Ewanceʼemo da nupampapebete ue ungka ri roka mbatu setu, da naka waʼa ntau sondo pai waʼa mpinatuwunya menginu ue.” 9Njoʼumo i Musa mantima toko setu silulu pai songka i mPue.
10Napasambaka i Musa pai Haruni pura-pura waʼa nto Isaraeli ri suara roka mbatu setu. Nepa natoʼo i Musa, “Ndipedongeka, muli ntau baleparu! Ara kami da mampapebeteka komi ue ungka ri roka mbatu?” 11Natanderaka i Musa toko setu nabobaki roka mbatu setu radua ngkani. Inceʼe painaka mosoloncamo ue gori ngkarombonya, painaka pura-pura tau pai pinatuwu manginu.
12Paikanya ndaseko i mPue i Musa pai Haruni ndatoʼo, “Ua bareʼe ntani ndiaya yaku da mampatongawa kuasaku anu magali ri suara banca Isaraeli, inceʼe painaka komi bareʼe da mangkeni mpesua tau seʼe ri tana anu kujajika tau seʼe.”
13Inceʼe painaka mata ue setu ndapapotoʼoka Meriba. Maka njairiamo panggantali waʼa nto Isaraeli i Pue, pai njairia woʼu ndapantuju i mPue kuasa anu magali ri banca setu.
Mokole nto Edomi bareʼe mawai to Isaraeli da moliu ri tananya
20:14-21
14Ungka lairia napokaumo i Musa waʼa ntaunya ungka ri Kadesi da njoʼu mampomberataka i mokole nto Edomi. Natoʼo ntau seʼe, “Kami seʼi ungka ri waʼa lemba nto Isaraeli anu ntongo reʼe mpokenta mpokasangkompo pai komi. Pai bara ndiincanimo kapari anu merampe ri kami. 15Tau piamo mami njoʼu ri tana Masiri, motaʼu-taʼu karoo-rooa njairia. Tau piamo mami pai kami mami najea-jeani nto Masiri, 16painaka mekakai kami ri Pue merapi pompelaea. Sira mampedongeka pekakai mami pai ndapampokau sambaʼa malaʼeka. Malaʼeka setu mawawanaka kami mesuwu ugka ri tana Masiri. Wawaseʼi kami ratamo ri Kadesi, inceʼemo sambaʼa kota ri tida ntanami. 17Kaperapi tuarapa da mabuya rayami mawai kami moliu ri tanami. Kami sangkani pai waʼa mpinatuwu mami, bareʼe da mebia-bia ri waʼa jamaami bara ri waʼa bonde anggoromi. Bareʼe woʼu da kainu ue ri waʼa ntibubumi. Kami podo da melinja ri jaya bangke rantani kaliunaka daerani.”
18Paikanya mesono to Edomi, “Bareʼe kawai komi da moliu ri tana mami. Pai ane ndiroku da kapoʼiwalika komi!”
19Natoʼo nto Isaraeli, “Podo ri jaya bangke da pelinja mami, pai ane kainu bara nainu mpinatuwu mami uemi, da kabayari. Kami podo da raya mami moliu.”
20Natoʼo woʼu nto Edomi, “Bareʼe maya!” Mesuwumo waʼa ncurodado nto Edomi da mampoʼiwalika to Isaraeli. 21Mewalili to Isaraeli pai napepalimo jaya ntaninya maka bareʼe nawai nto Edomi da moliu ri tananya.
Kapate i Haruni
20:22-29
22Malaimo waʼa nto Isaraeli setu pura-pura ungka ri Kadesi, ratamo tau seʼe ri Buyu Horu, 23ri tida ntana Edomi. Njairia ndapantoʼoka i mPue i Musa pai Haruni, 24“I Haruni bareʼe da mesua ri tana anu ndajanjika banca Isaraeli, siʼa da mate maka komi radua meewamo ri songkaku, mosu ri tana ue Meriba. 25Poyunumo i Haruni pai ananya i Eleasari, mandake ri Buyu Horu. 26Da nuosumo rengko i Haruni pai patakakamo i Eleasari. Maka i Haruni da mate ndatiria.” 27Nawianaka i Musa silulu pai songka i mPue. I Musa, i Haruni pai Eleasari mandake ri Buyu Horu, naole-oleka waʼa ntau pura-pura. 28#Pa. 29:29, Pai. 33:38, Paw. 10:6 Naosumo i Musa rengko i Haruni nepa napasuaka i Eleasari. Matemo i Haruni ri lolo buyu setu, ungka lairia mobalungkemo i Musa pai Eleasari. 29Padongemo ntau seʼe pura-pura kapatemo i Haruni, napoomboka ntau seʼe togo mpuyu mbengi kasaenya.
