PAIMBA 17
17
Toko i Haruni mowayo
17:1-13
1Ndatoʼo i mPue ri Musa, 2“Pokaumo to Isaraeli mawaika siko sampuyu pai radua toko, sambaʼa lemba sambaʼa toko, toko setu sangaya-ngaya da nawai ntadulako lemba. Ukimo toʼo ntadulako lemba setu ri tokonya, 3pai toʼo i Haruni ri toko lemba nto Lewi. Wungka-wungka tadulako lemba da mampotumpu sambaʼa toko. 4Kenimo waʼa ntoko setu ri Kemaku pai da nudika ri suara mPeti mPojanji, ri tampa anu biasanya kupampomberataka siko. 5Toko ntau anu kupilisi inceʼe anu da mowayo. Ewanceʼemo da kupampaponjii pongkanguru waʼa ntau anu bareʼe naowe-owe manggantali komi.”
6Naparata i Musa songka setu ri waʼa nto Isaraeli. Nawaimo waʼa ntadulako ntau seʼe, sambaʼa tadulako lemba sambaʼa toko tila ncambaʼa tadulako lemba. Pura-pura sampuyu pai radua toko, pai toko i Haruni lau ri oyonya. 7Roo setu nadika i Musa waʼa ntoko setu ri raya ngKema i mPue ri suara mPeti mPojanji.
8 #
Ib. 9:4
Bangke reme, ri tempo mpesua i Musa ri raya ngKema i mPue, nakita toko i Haruni, inceʼemo toko lemba nto Lewi mowayomo. Toko setu da mosesemo, mesuwu sesenya pai mampowuaka wua ngketapa anu matuʼamo! 9Natima i Musa pura-pura toko setu nepa napetujuka ri waʼa nto Isaraeli. Pangkita ntau seʼe anu mewali setu, nepa natima waʼa ntadulako setu sambaʼa-sambaʼa seʼe tokonya. 10Roo setu ndatoʼo i mPue ri Musa, “Dika muni toko i Haruni ri suara mPeti mPojanji. Toko setu da ndadika mewali sambaʼa patiendo ri waʼa nto Isaraeli anu mampokono meewa setu, tau seʼe da mate ane bareʼe naowe monggantali.” 11Nawianaka i Musa silulu pai songka i mPue.
12Nepa natoʼo nto Isaraeli ri Musa, “Ane ewanceʼe marugimo kami! Kami da maropu! 13Ane tau anu matimosuki Kema i mPue sangaya-ngaya da mate, manoto nunjaa woʼu anu kapomata-mata kami.
