PAIMBA 16
16
Peewa i Kora i Data pai Abira
16:1-35
1-2 #
Yud. 11
I Kora ana i Yisiha muli i ngKehati, lemba nto Lewi, maewa i Musa. Siʼa napelae ntau tatogo ungka ri lemba i Rube, inceʼemo i Data pai Abira waʼa ana i Eliabi, pai i Ono ana i mPele, sangkani pai 250 tau waʼa ntadulako anu tetoʼo anu napilisi waʼa ntau sondo. 3Tau seʼe sangkani-ngkani mancuara i Musa pai Haruni, natoʼo, “Pura-pura to Isaraeli tau anu ndapatani tila i mPue pai i Pue reʼe ri oyotakita pura-pura. Nepa inceʼe ganamo Musa! Paikanya wenu painaka siko nuepe meruu kandatekanya ri waʼa ntau i mPue?”
4Madonge pau setu, metutu i Musa ri tana mekakai ri Pue. 5Roo setu natoʼoka i Kora pai waʼa yununya, “I raneo mowuro, i Pue da mampatongawa ri kita isema anu ndapatumpu galaa pai isema anu ndapatani da galaa. Tau anu ndapilisi inceʼe anu da maya mantimosuki Sira. 6-7I raneo mowuro siko pai waʼa yunumu sangaya-ngaya da mantima waʼa tampa padika apu, da ndibanganika waa apu pai dupa pai da ndikeni njoʼu ri lampaʼani. Nepa da taole-oleka raneo, incema ri oyota anu roomo ndapilisi i mPue. Ewanceʼemo ee waʼa nto Lewi!”
8Nepa mompau woʼu i Musa ri Kora natoʼo, “Pedongeka ee waʼa nto Lewi! 9Bara ndinawa-nawa bara podo saru-saru da ndapampilisi i mPue Ala pue nto Isaraeli komi, ungka ri oyo waʼa nto Isaraeli, da naka maya komi mantomosuki sira, pai da mawianaka tetala ri raya ngKemaa, pai da motetala tila nto Isaraeli pai mamporiokoi tau seʼe? 10Siko, Kora, pai pura-pura to Lewi maratamo katetubunaka setu ungka ri mPue – pai seʼi-seʼi mampepali woʼu da mewali tadu mpanyomba! 11Ane siko pai waʼa yunumu manggantali i Haruni, kamonconya komi maewa i mPue!”
12Nepa napokau i Musa ndapeboo i Data pai Abira, paikanya natoʼo ntau seʼe, “Kami bareʼe kapokono da njoʼu! 13Ara bareʼepa gana nupangkeni mpesuwu kami ungka ri tana Masiri tana anu maboko setu da nupampepate kami ri pada bone seʼi? Nepa da nuparenta woʼu kami? 14Kamonconya bareʼe nukeni kami ri tana anu maboko, bara da mangawaika kami waʼa njamaa pai waʼa bonde anggoro anu da kapopanta! Seʼi-seʼi da numbambasi kami! Bareʼe, kami bareʼe da njoʼu!”
15Maʼai kojo kasengke ndaya i Musa, painaka natoʼo ri Pue, “Pue, neʼe kojo boi nditarima panyomba ntau seʼe. Bareʼepa reʼe mau sambaʼa tau ungka ri oyo ntau seʼe anu kupakarugi, mauja sambaʼa kalide bareʼepa reʼe anu kutima ungka ri tau seʼe.”
16-17Nepa natoʼo i Musa ri Kora, “Kamaʼimo i raneo ri Kema i mPue sangkani pai 250 tau yunumu. I Haruni woʼu da njau njairia. Komi sambaʼa-sambaʼa seʼe da mangkeni tampa apumi. Ndidikamo dupa ri rayanya, nepa ndipanyombaka ri Pue.” 18Sambaʼa-sambaʼa tau seʼe da mantima tampa apunya, da nabanganika waa apu pai dupa, nepa da mekakore ri suara dampo Kema i mPue sangkani pai Musa pai Haruni. 19Ungka lairia napasambaka i Kora waʼa nto Isaraeli, nepa mekakore tau seʼe mombesuara pai Musa pai Haruni ri suara dampo mbombo Kema i mPue. Tingkarasaka nakita ntau sondo setu sindi ngkilaya i mPue. 20Nepa ndatoʼo i mPue ri Musa pai Haruni, 21“Ndipenggalaura ungka ri waʼa ntau setu; maka da kuʼopisakamo seʼi seʼe waʼa ntau setu.”
22Paikanya metutu manyomba i Musa pai i Haruni, mompau natoʼo, “Boo Pue Ala, komimo anu mawai katuwu ri wuwunya anu tuwu. Ane podo sambaʼa tau anu masalaa, ara da marau rayami ri pura-pura taumi?”
23-24Ndatoʼo i mPue ri Musa, “Pokaumo waʼa ntau da naka mantilawangi kareʼe ngkema i Kora, i Data pai i Abira.”
25Ungka lairia njoʼumo i Musa naaweri waʼa ntadulako nto Isaraeli ri kareʼe i Data pai Abira. 26Natoʼo i Musa ri waʼa nto Isaraeli, “Nditilawangimo kema waʼa ntau anu majaʼa seʼi pai neʼe boi ndiisu bara nunjaa ntano aga-aga ntau seʼe. Ane bareʼe ndiaya, komi da ndaʼopisaka sangkani-ngkani pai tau seʼe ua waʼa ncalaa ntau seʼe.” 27Ungka lairia natilawangimo waʼa nto Isaraeli setu waʼa ngkema i Kora, i Data pai Abira.
Mesuwumo i Data pai Abira sangkani pai rongonya pai waʼa ananya mekakore ri suara ngkemanya samaʼa-sambaʼa seʼe. 28Natoʼo i Musa, “Seʼimo da ndipaincani kaʼi Puenya anu mampokau yaku da mawianaka pura-puranya seʼi pai banya ua pepokono ndayaku ngkalioku. 29Ane waʼa ntau setu mate ewa kawate anu biasa, banya ua popahuku ungka ri Pue Ala, inceʼe tandanya i Pue bareʼe mampokau yaku. 30Paikanya ane ndapowia i mPue sangaya anu bareʼepa reʼe ndipadonge sangkasae seʼi, pai ane mekunganga tana mangaomo tau seʼe sangkani pai waʼa aga-aganya, painaka tau seʼe mesua tuwu-tuwu ri kareʼe ntau mate, da manotomo ri rayami kawaʼa ntau setunya anu maewa i Pue.”
31Pusa mpinca pompau i Musa, mekunganga tana simpontu pekakore ntau seʼe, 32naomo tau seʼe pai bangani ncomborinya sangkani pai pura-pura tau anu malulu ri Kora, pai waʼa aga-aga ntau seʼe. 33Tenawusaka tuwu-tuwu tau seʼe ri kareʼe ntau mate sangkani pai waʼa anu napotumpu ntau seʼe. Tana anu makunganga maomo tau seʼe setu wali ngkamaori-ori muni, tau seʼe payamo naomo ntana. 34Pura-pura to Isaraeli anu njau njairia molonco, butu nadonge pekiu ntau seʼe mantoʼo, “Plonco! Kita da naomo ntana!”
35Ungka lairia ndapatudu i mPue apu mampakawara tau 250 anu mampanyombaka dupa setu.
Tabo kareʼe apu
16:36-40
36Ndatoʼo i mPue ri Musa, 37-38“Pokaumo i Eleasari ana i ntadu mPanyomba Haruni, mantima waʼa ntabo kareʼe apu ungka ri oyo amaa setu pai da mangkeni waʼa amaa pai wuri setu njoʼu ndapesawuka ri tampa ntaninya, maka tabo ngkareʼe apu setu magali. Waʼa mparewa setu inceʼemo panyomba waʼa ntau anu roo ndahuku mate mamponcuruka salaanya. Waʼa mparewa setu magali maka roomo ndapanyombaka ri suara i mPue, inceʼe painaka sangaya-ngaya da ndapempe manipi-nipi da ndalapisika lampʼani tondo ri sambalikunya. Inceʼe da mewali sambaʼa patiendo ri banca Isaraeli.” 39Napasambaka i nTadu mPanyomba Eleasari waʼa ntabo kareʼe apu setu, nepa napokau tau mampempe rantani manipi-nipi ndalapisika lampaʼani mpanyomba tondo ri sambalikunya. 40Incetu mewali sambaʼa patiendo riwaʼa nti Isaraeli, ane banya muli i Haruni, mau sambaʼa tau bareʼe maya mantimosuki lampaʼani da mantunju dupa tila i mPue. Tau anu mangaewa songka setu da ndaʼopisaka ewa i Kora pai waʼa yununya. Pura-pura setu ndawianaka silulu pai songka i mPue ri Eleasari mampoliu i Musa.
I Haruni mantuwuri banca Isaraeli
16:41-50
41Bangke reme pura-pura to Isaraeli mosengke-sengke ri Musa pai Haruni. Natoʼo ntau seʼe, “Komi mampepatemo tau i mPue.” 42Sindara pompasambaka ntau seʼe maewa i Musa pai Haruni, meeli tau seʼe ri Kema i mPue, nakita ntau seʼe limu mangkulamuti Kema setu, pai nakitamo ntau seʼe rara ngkarata i mPue. 43I Musa pai Haruni njoʼu ri suara ngKema i mPue, 44nepa ndatoʼo i mPue ri Musa, 45“Petawanakamo ungka ri waʼa ntau setu. Iretumo seʼe da kupaʼopisaka waʼa ntau setu!”
Metutu manyomba tau seʼe radua, 46nepa natoʼo i Musa ri Haruni, “Timamo tabo ngkareʼe apumu, tima waa apu ri lampaʼani, dika ri rayanya sangkani pai dupa. Kenimo maliga-liga ri oyo waʼa nto Isaraeli, wianakamo panyomba ngkabareʼenya ndakitanaka salaa tila ntau seʼe. Pakaliga! Mesongkemo karau ndaya i mPue, popahuku montepuʼumo.” 47Nawianaka i Haruni silulu pai pantoʼo i Musa. Molonco siʼa njoʼu ri tongo nto Isaraeli anu ntongo mompasambaka njairia anu montepuʼumo kono popahuku setu. Nadika i Haruni dupa ri wawo waa apu, nawianakamo panyomba pangasompo salaa tila nto Isaraeli. 48Popahuku setu meʼonto, mewali i Haruni njau ri oyo ntau anu tuwupa pai anu matemo. 49Anu mate ri tempo setu 14.700 tau, bareʼepa tesua tau seʼe anu mate sangkani-ngkani pai Kora. 50Butu meʼontomo kojo popahuku setu, mewalilimo i Haruni madadu i Musa ri suara dampo wombo Kema i mPue.
