PAIMBA 13
13
Sampuyu pai radua tau njoʼu padaso
13:1-33
(Paw. 1:19-33)
1Ndatoʼo i mPue ri Musa, 2“Ungka ri sambaʼa-sambaʼa lemba nto Isaraeli pokau sambaʼa tadulakonya da mampadasoki tana Kanaʼa anu da kuwaika to Isaraeli.” 3-15Silulu pai songka i mPue Ala setu, napokaumo i Musa tau seʼe ungka ri padabone Parani. Pura-pura tau seʼe paka tadulako ri oyo waʼa nto Isaraeli:
| LEMBA | TADULAKO |
|---|---|
| Rube | Samua ana i Sakuri |
| Simeo | Sapati ana i Hori |
| Yahuda | Kalebi ana Yepune |
| Isakari | Yogali ana Yusupu |
| Eparai | Hosea ana i Nuu |
| Benyami | Palati ana i Rapu |
| Sebulo | Gadieli ana i Sodi |
| Manase | Gadi ana i Susi |
| Daa | Amieli ana i Gemali |
| Asere | Seturu ana i Mikaeli |
| Natali | Nahabi ana i Wopisi |
| Gati | Gueli ana i Maki |
16Incetumo waʼa ntau anu napokau i Musa mampadasoki tana setu. I Hosea ana i Nuu nasawani i Musa toʼonya, napapotoʼoka i Yosua.
17Ri pampapoiwo palai ntau seʼe napatada i Musa tau seʼe natoʼo, “Ndipelinjamo ri tondo utara mantotoka tondo selata ntana Kanaʼa, nepa liu ri tana anu maria pongku ntana. 18Ndiparesa mpodago ewambeʼi katedikanaka ntana setu, maria bara sakodija taunya, maroso bara malente-lente tau seʼe. 19Ndiparesamo tana setu madago bara bareʼe, waʼa ntaunya bara maroo-roo ri desa anu bereʼe bentenya bara ri waʼa ngkota anu maroso bentenya. 20Ndipakaroso rayami. Peolemo tananya bara maboko, pai bara maria pinamuyanya. Neʼe ndikalingani mangkeni sakodi wua ngkaju anu ndirata njairia.” Tempo setu turo mpowua anggoro.
21Malaimo waʼa ntau setu ri tondo utara mamparesa tana setu montepuʼu ungka ri pada bone Sini ri tondo selata ndeki utara rantani rata ri kota Rehobo mosu ri jaya njoʼu ri Hamati. 22Riu-riunya tau seʼe njoʼu ri tondo selata ntana setu rata ri kota Heberoni, kareʼe mpeari waʼa nto Ahimani, Sesai pai Talamai, muli i Enaki. Heberoni ndabaresi riunya papitu ntaʼu kabareʼepanya ndabaresi kota Soani ri tana Masiri. 23Ratamo tau seʼe ri lembo ntana Esikoli. Njairia natando ntau seʼe sambuli wua anggoro anu manee kojo, inceʼe painaka sangaya-ngaya da radua tau anu mampoaju. Nakeni woʼu ntau seʼe bara tesangkuja ogu wua delima pai wua ara. 24Tana setu ndapapotoʼoka Lembo Esikoli, ua sambuli wua anggoro anu natando nto Isaraeli njairia.
25Pusamo opompuyu ndeme napamparesa ntau seʼe tana setu, mewalilimo waʼa ntau anu padaso setu, 26mompetumbumo tau seʼe ri Musa ri Haruni pai waʼa nto Isaraeli anu ntongo mompasambaka ri Kadesi, ri pada bone Parani. Napatuntu ntau seʼe wuwunya anu nakita pai napetujuka ntau seʼe waʼa mua ngkaju anu nakeni. 27Natoʼo ntau seʼe ri Musa, “Jukumo kaparesa tana setu pai pangkita mami maboko kojo tananya pai malimbokori waʼa mpinamuyanya pai seʼi sakodi wua ngkaju anu kakeni. 28Paikanya tau ri tana setu paka maroso. Waʼa ngkotanya bangke pai maroso bentenya. Pai sangaya woʼu kakita muli waʼa rakisasa njairia. 29Waʼa nto Amale anu mampeari tondo selata ntana setu; to Heti, to Yebusi pai to Amori mangkareʼe ri pongku-pongku ntana; pai waʼa nto Kanaʼa mampeari sangkarate wiwi ntasi pai sangkarate wingke ngKoro Yarade.”
30Paikanya i Kalebi mamparodo raya ntau anu mangkakangurumo ri Musa. Natoʼo i ngKalebi, “Tana setu sangaya-ngaya da taungku pai da tarampamo seʼi-seʼi, maka gana-gana rosota da manganangi.”
31Paikanya natoʼo waʼa yunu i ngKalebi anu njoʼu padaso setu, “Bareʼe, kita bareʼe da takoto maungku tau seʼe. Maka waʼa ntau ntana setu meruu karosonya painaka kita.” 32Nepa naponteesika pasimbaju mbamba setu ri waʼa nto Isaraeli kono lemba anu njoʼu napadasoki ntau seʼe. Natoʼo ntau seʼe, Lemba sinjau maʼai da kaparita, pagonya waʼa ntau anu mampeari. Waʼa ntau anu kakita njairia maʼai ngkabose koronya. 33#Pal. 6:4 Seʼi njairia kakita waʼa ntau ewa rakisasa, inceʼemo muli nto Enaki. Ane ndapasintolio pai tau seʼe, kaepe kami podo ewa tupako, pai manoto da ewanceʼe pampeole ntau seʼe kami.”
