PAIMBA 14
14
Ponggantali nto Isaraeli
14:1-10
1Sangkasae wengi waʼa nto Isaraeli mekiu-kiu pai motumangi. 2Monggantali tau seʼe ri Musa pai Haruni natoʼo, “Moruana kita mate ri tana Masiri bara ri pada bone seʼi! Mbolimo takamate! 3Nunjaa yowenya kita ndakeni i mPue njoʼu ri tana setu? Kita da mate ri poʼiwali pai waʼa rongota pai waʼa anata mewali tawani. Ara banya sangkadagonya ta mewalili ri tana Masiri!” 4Napombetoʼokamo ntau seʼe, “Moruana tapilisimo sambaʼa tau anu da mantadulakoni kita mewalili ri tana Masiri!”
5I Musa pai i Haruni mombukotu ri suara waʼa nto Isaraeli. 6I Yosua ana i Nuu pai i Kalebi ana i Yefune, tau radua setu tesua ri tau anu njoʼu padaso setu, nasiati rengko ntau seʼe tanda ngkapari ndayanya. 7Natoʼo ntau seʼe ri waʼa ntau sondo setu, “Tana anu njoʼu kapadasoki setu maʼai kadagonya. 8Ane ndapokono i mPue kita, sira da mangkeni kita njairia pai da mawaika kita tana anu koreʼe pai maboko setu. 9#Ib. 3:16 Neʼe boi ndaewa i Pue pai neʼe ndapokaeka waʼa ntau anu njau meari ri tana setu, maka saru-saru kojo da tapanangi tau seʼe. Anu mangkantawi tau seʼe payamo, pai i Pue anu mayunuki kita. Mewali neʼemo maeka.” 10Waʼa ntau sondo da mawunu mbatu rantani mate tau radua setu. Paikanya tingkarasaka waʼa ntau setu mangkita sindi ngkilaya i mPue ri wawo Kemaa.
I Musa mampekakaika to Isaraeli
14:11-25
11I Pue mompau ri Musa ndatoʼo, “Sangkuja ngkasae woʼu waʼa ntau seʼi da mangaewa Yaku? Rantani rata impia kabareʼenya naaya ntau seʼe yaku, seʼi mariamo tanda ngkuasa anu kutujuka tau seʼe? 12Da Kuʼopisaka tau seʼe pai juʼa lele. Paikanya siko da kupapewali papa sambaʼa banca anu bangke pai meruu ngkarosonya painaka tau seʼe!”
13 #
Pa. 32:11-14
Nepa mompau i Musa ri Pue, natoʼo, “Boo Pue boi nadonge nto Masiri anu mewali seʼi! Ntanoka ua kakuasami Komi mangkeni mpesuwumo kami ungka ri tana setu, 14pai tau seʼe da mantuntuka tau ri tana seʼi, anu mangadongemo kakominya Pue mangkariani kami. Nadongemo ntau seʼe woʼu kakominya anu mepatongawamo ri kami ri tempo mpelinjami ri suara mami ri raya nono limu ane mareme pai ri raya nono apu ane mawengi. 15Ane ndiʼopisaka pura-pura taumi seʼi, waʼa banca anu reʼemo pangadongenya kono kabangke ngkatetoʼomi setu da mantoʼo: 16Komi maʼopisaka waʼa ntaumi ri pada bone maka bareʼe ndikoto mawawanaka tau seʼe njoʼu ri tana anu roo ndijanjika. 17Inceʼe painaka kumerapi ri komi Pue, nditujumo kakuasami ri kami pai ndiwianakamo anu roo ndijanjika kami. Roo nditoʼo, 18#Pa. 20:5-6, 34:6-7, Paw. 5:9-10, 7:9-10 ‘Yaku, Pue, bareʼe ganggara sengke. Yaku da mantuju katowendayaku pai katodoku anu gana-gana. Yaku bareʼe mangkitanaka tau masala pai anu mangaewa Yaku. Mau ewanceʼe, kasala ntau tuʼa da kusiliki ri waʼa ana pai makumpunya, rantani rata ri katatogo pai kaʼaopo lapinya.’ 19Seʼi-seʼi Pue ua kabangke ntowe ndayami pai lawi Komi todo ri janjimi, kuperapi neʼemo ndikitanaka salaa waʼa ntau seʼe ewa kabareʼenya ndikitanaka salaa ntau seʼe tepuʼu ungka ri pampalaika tana Masiri.”
20Nepa mesono i Pue ndatoʼo, “Madago, bareʼemo da kukitanaka tau seʼe ewa perapimu. 21#Ib. 3:18 Paikanya kujanji ua kayakunya Pue anu tuwu pai makuasa ri lino seʼi, 22waʼa ntau sareʼi bereʼe mau sambaʼa anu ntongo da tuwu ri pampesuaki tana anu roo kujanji ri ngkai ntau seʼe. Maka tau seʼe bareʼe mepoʼinaya ri yaku. Pai bareʼe bali-bali napangkelo-ngkelo karau ndayaku. Seʼi nakitamo ntau seʼe sindi ngkakilayaku, pai waʼa anu ndapojingki anu roo kuwianaka ri tana Masiri pai ri pada bone. 23Manoto! Tau seʼe bareʼe da mesua ri tana setu. Ri waʼantau seʼe anu maewa yaku bereʼe mau sambaʼa tau da maijaki tana setu. 24-25#Yos. 14:9-12 Podo tau-Ku i Kalebi siʼa todo mepoʼinaya ri Yaku. Inceʼe puʼunya siʼa da kupoyunu ri tana anu roomo napesuaki. Seʼi-seʼi to Amale pai to Kanaa anu mampeari rato setu. Paikanya tana setu da napotumpu waʼa muli ntau-Ku i Kalebi. I raneo komi sangaya-ngaya da mewalili njoi pada bone nditotoka Suontasi Akaba.”
I Pue mangahuku to Isaraeli ua ponggantali ntau seʼe
14:26-38
26I Pue mompau ri Musa pai Haruni, ndatoʼo, 27“Rantani rata impia nepa da naowe waʼa ntau majaʼa setu da manggantali Yaku? Pura-pura pongkakanguru ntau seʼe kudengemo. 28Sangaya-ngaya da nditoʼoka tau seʼe, ewaseʼi: Ndatoʼo i mPue, ‘Roomo kujanji mamposabi ka-Yakunya anu tuwu, komi da kupowia ewa pantoʼomi ri suaraku. Yaku, Pue anu mantoʼomo seʼi. 29#Ib. 3:17 Komi manggantalimo Yaku. 30Inceʼe puʼunya painaka komi da mate, pai wata ngkoromi da morempo-rempo ri pada bone seʼi. Ndasangadika i Kalebi pai i Yosua, komi anu tinuwu ruampuyu ntaʼu waindeku bereʼe mau sambaʼa tau anu da mampesuaki tana anu roo kujanji ri komi setu. 31Roomo nditoʼo waʼa anami da mewali tawani. Ntanoka tau seʼemo anu da kukeni mpesua ri tana anu bareʼe ndipokono. 32Ja komi da mate ri pada bone seʼi. 33#Pwn. 7:36 Aopo mpuyu ntaʼu kasaenya da kateyoro-yoro waʼa anami ri pada bone. Ua komi bareʼe todo, waʼa anami anu da mangkoyo kapari, rantani pura mate, rantani pura mate komi waʼa ntau anu sintinuwu. 34Komi da mangkoyo waʼa huku ncalaami aopo mpuyu ntaʼu kasaenya; aopo mpuyu eo ndipampadasoki tana setu, mewali saeo ndareke santaʼu. Da ndipangaepe ewambeʼi kaparinya ane tau mangaewa yaku! 35Roo Kujanji anu Kutoʼo setu sangaya-ngaya da kupowia ri komi, waʼa ntau anu majaʼa engkomi, anu mogombo sintuwu da maewa yaku. Ri pada bone seʼi komi pura-pura da mate. Yaku, Pue anu mantoʼo seʼi.’ ”
36-37Waʼa ntau anu roo napokau i Musa mampadasoki tana setu mewalili mangkeni bambari anu bemonco kono tana setu, inceʼe puʼunya painaka nanggantali nto Isaraeli i Pue. Ua kaʼinceʼenya ndahuku i mPue tau seʼe mate nakono njuʼa. 38Ri waʼa ntau anu njoʼu padaso setu jamo i Yosua ana i Nuu pai i Kalebi ana i Yefune anu ntongo tuwupa.
Pampebutuka nto Isaraeli mancuaki tana Kanaʼa
14:39-45
(Paw. 1:41-46)
39Ri karoonya naparata i Musa songka i mPue setu ri to Isaraeli, banca setu moombo ua kapari ndayanya. 40Bangke mowuro-wuro mpodago, mompatikalimo tau seʼe mandake ri lolo buyu. Natoʼo ntau seʼe, “Lawi masalaamo kami. Paikanya seʼi-seʼi kami tikalimo da njoʼu ri tana anu ndatuju i mPue.”
41Paikanya mompau i Musa natoʼo, “Ara wenu komi seʼi da malewa songka i mPue? Komi bareʼe da menangi! 42Neʼe njoʼu! Komi da nanangi waʼa iwalimu maka i Pue bareʼe da mayunuki komi. 43Ri pombetotomi pai to Amale pai to Kanaʼa setu, komi da mate ri poʼiwali maka i Pue bareʼe mayunuki komi maka komi bareʼe mepoʼinaya ri sira.”
44Paikanya bareʼe naaya nto Isaraeli, napari-pari mandake ri buyu setu, mau napetangani i Musa pai Peti mPojanji bareʼe tepalai ungka ri raya kema. 45Mobalungkemo to Amale pai to Kanaʼa anu mampeari buyu setu mampombetotoka to Isaraeli waʼa nto Isaraeli panangi, naduduki ntau seʼe nakarataka ri Horima.
