PAIMBA 12
12
I Miria ndahuku
12:1-16
1Ri karoonya natima i Musa weʼa to Kusi naporongo, inceʼemo anu mewali puʼunya pamposari i Miria pai i Haruni i Musa. 2Natoʼo ntau seʼe, “Ara podo mampoliu i Musa da pompau i mPue? Ara banya mampoliu kita woʼu Sira da mompau?” Ndadonge i mPue nunjaa anu natoʼo ntau seʼe. 3I Musa sambaʼa tau anu lauka rayanya, meruu ri waʼa ntau pura-pura anu tuwu ri lino seʼi.
4Tingkarasaka ndatoʼo i mPue ri Musa, ri Haruni pai ri Miria, “Ndikanjoʼumo ri Kema-Ku komi tatogo.” Njoʼumo kojo tau seʼe njairia, 5menaʼumo i Pue mojaya ri limu. Mekakore i Pue ri dampo ngKema-A, nepa ndapeboo i Haruni pai i Miria. Metimosukimo tau radua setu, 6ndatoʼo i mPue, “Pedongekamo waʼa mpauku seʼi! Ane reʼe nabi ri oyomi, yaku da mampatongawa koroku ri siʼa mampoliu pekita ndaya, pai Yaku da mompau ri siʼa mampojaya pangipi. 7#Ib. 3:2 Paikanya, banya ewanceʼe pai watua-Ku i Musa. Siʼamo tau anu todo ri oyo waʼa ntau-Ku. 8Pai yaku mompau pai siʼa mombesuara, yosa pai manoto banya ewa wailo. Pai nakitamo woʼu lio-Ku! Ara wenu painaka nditaha mangaewa watua-Ku i Musa?”
9Maʼai kojo kajaʼa ndaya-A ri tau radua setu, liu ndapalaika. 10Butu meangkatakamo limu setu ungka ri Kema i mPue, tongawamo i Miria nakonomo juʼa majaʼa sangkoronya; mabuyamo pelanya ewa bagi. Pangkita i Haruni i Miria konomo juʼa majaʼa setu, 11natoʼoka i Musa, “Ndipelaemo kami pueku, neʼe ndipapaliuka kami ndajeani ua mancuru salaa anu kapowia ua katengo mami. 12Neʼe ndipapaliuka siʼa ewa ongaa anu matemo nepa ndapoana, pai sanganya da ʼosomo.”
13Meboo i Musa ri Pue natoʼo, “Boo Pue kuperapi ndipakaʼosa siʼa!”
14 #
Pai. 5:2-3
Mesono i Pue ndatoʼo, “Ane rapanya natupesi mpapanya lionya, ara banya papitu ndeme kasaenya da kaea matanya? Papesuwu siʼa ungka ri kareʼe mpokema papitu ndeme kasaenya, ane roo setu nepa maya wali mpesua muni siʼa.” 15Ndapapesuwumo i Miria ungka ri kareʼe mpokema papitu ndeme kasaenya, pai banca Isaraeli bareʼe malimba ungka njairia rantani maya muni i Miria mewalili ri kareʼe mpokema. 16Ungka lairia napalaikamo ntau seʼe Hasero nepa mokema ri pada bone Parani.
