PAIMBA 11
11
Tampa anu mampotoʼo Tabera
11:1-3
1Ri anu sandeme natepuʼumo nto Isaraeli mampogiluka ri Pue waʼa ngkapari ntau seʼe. Madonge waʼa mpogilu setu marau raya i mPue painaka ndapatudu api ri tau seʼe. Apu setu melao painaka waramo santila kema ntau seʼe. 2Meboo-boo waʼa ntau setu merapi tulungi ri Musa. Ungka lairia mekakai i Musa ri Pue, painaka mate apu setu. 3Ua pewalinya ewanceʼe painaka tampa setu ndapapotoʼoka Tabera, maka njairiamo pelangga apu i mPue ri oyo ntau seʼe.
I Musa mampilisi pitu mpuyu tau tadulako ri oyo nto Isaraeli
11:4-30
4Ri pelinja waʼa nto Isaraeli setu lau woʼu waʼa ntau ntaninya anu melulu. Tau seʼe maʼai kojo napamposawoyo da mangkoni wayawo, pai waʼa nto Isaraeli woʼu montepuʼumo mongkakanguru. Natoʼo ntau seʼe, “Odee, ane da reʼe apa wayawo tarata! 5Konomo taendo waʼa bau anu takoni ri tana Masiri, bareʼe bara sangadi ndaoli yau, suai, balongka, pia mawaa, pia mabuya! 6Seʼi-seʼi malentemo wukuta maka jamo roti mana anu takoni-koni.”
7 #
Pa. 16:31
Roti mana setu taʼanya maliogu masiwu-siwu ewa toyu mbuloa mabuya manggaa-nggaa. 8-9#Pa. 16:13-15 Mposambengi mana setu manawu sangkani-ngkani pai yondu tudu ri soma ngkema. Mowuro-wuro kancao-ncaomo tau marurusi, nepa nagilingi bara natuja napowia tarigu, nepa ndalemo-lemo ndapowia roti anu maliogu nepa ndabakari pai ndaulaka lana saitu.
10Nadonge i Musa ponggantali waʼa nto Isaraeli setu, tau seʼe mekakakore satobu-satobu seʼe ri suara ngkema ntau seʼe. Inceʼe painaka maʼaimo karau ndaya i mPue, painaka maparimo raya i Musa. 11Inceʼe painaka natoʼo i Musa ri Pue, “Ara wenu painaka ewanceʼi ndapampakapari yaku? Bara bareʼe ndipokono yaku? Iwenu painaka ndipapakoyoka yaku mampasilolongani pura-pura tau seʼi? 12Ara yaku anu mangkatianaka pai mampoana waʼa ntau seʼe? Ara wenu painaka ndipampokau yaku mewali ewa topotiana da mangauba-uba ongaa, painaka yaku da mampotiana mpaliu tau seʼe ri santuntu njaya njoʼu ri tana anu ndajanjika tau piamo ntau seʼe? 13Ndipeole, tau seʼe mekombe mpaliu mamperapi wayawo. Pai ri mbeʼi da ndapampepali wayawo anu da wungka tau seʼe pura-pura? 14Bareʼe kukoto mangkoyo kinoyo anu manee seʼi; manee gaga tetala setu ri yaku! 15Ane ewanceʼi mpaliu ndipampowia yaku, ndipokapurumo yaku; moruana ndipepatemo yaku naka telapasakamo ungka ri kapari seʼi.”
16Nepa ndatoʼo i mPue ri Musa, “Pasambakamo ungka ri oyo nto Isaraeli setu pitu mpuyu tau tuʼa anu da napedongeka ntau seʼe mewali tadulakonya. Poyunumo tau seʼe ri suaraku ri raya ngKema-Ku, nepa nupokau tau seʼe da mekakore ri sorimu. 17Yaku da menaʼu da mompau pai siko iretu, njairia santila kinoyo anu roo kupapakoyoka siko da kutilaka tau seʼe. Ewanceʼemo da napampelae ntau seʼe siko mamposiʼurusi banca seʼi, pai bareʼemo da nukoyo ngkaliomu. 18Seʼi-seʼi toʼokamo banca setu: Pakagalimo koromu maendo karaneonya; komi da mangkoni wayawo. Ndadongemo i mPue potumangi pai mpongkakangurumi gori ngkadarayaminya mangkoni wayawo, pai katedikanakami da meruu ngkadagonya pai ri tana Masiri. Seʼi-seʼi i Pue da mawaika komi wayawo anu da ndikoni. 19Da ndipangkoni wayawo seʼe banya podo sandeme bara rua ndeme, bara alima ndeme bara sampuyu ndeme pai banya podo ruampuyu ndeme, 20paikanya muntu sambuya kasaenya da ndipangangkoni, rantani da ndipomajuʼa pai da melua-lua ua nasumumo. Painaka ewanceʼe da pewalinya maka komi mampobanciikamo i Pue anu lau maroo-roo ri oyomi. Pai komi motumangi ri suara pai mongkakanguru komi ua ndipampalaikamo tana Masiri.”
21Nepa natoʼo i Musa ri Pue, “Banca anu kuwawanaka seʼi 600.000 tau karianya. Ewambeʼi pai ndipantoʼo da ndipakonika wayawo ri raya anu sambuya kasaenya? 22Ri mbeʼi kareʼe japi pai bimba anu ewancetu kesondonya da ndasampa pai da gana napotila ntau seʼe? Ara pura-pura bau ri tasi da gana ndapakonika tau seʼe?”
23Mesono i mPue ndatoʼo, “Ara bareʼe gana kuasaku? Maliga-liga da nukita nunjaa anu kutoʼo setu monco bara bareʼe!”
24Mesuwumo i Musa nepa naparataka to Isaraeli wuwunya anu roo ndatoʼo i mPue ri siʼa. Napasambaka i Musa pitu mpuyu tau tadulako, nepa napokau tau seʼe mantolilimi Kema i mPue. 25Nepa menaʼu i Pue mojaya ri limu mompau ri Musa. Ndatima i mPue santila kuasa anu roo ndawaika i Musa, ndatilaka tadulako anu pitu mpuyu setu. Butu menaʼumo Inosa i mPue ri tau seʼe, natepuʼumo ntau seʼe mompau ewa nabi paikanya podo sambinoroja.
26Reʼe radua ri oyo ntau anu pitu mpuyu setu inceʼemo i Elidadi pai i Medadi njau ri raya ngkemanya bareʼe njoʼu sangkani-ngkani pai yununya ri Kema i mPue. Ri kemanya setu penaʼu Inosa i mPue ri tau seʼe, painaka tau seʼe radua woʼu montepuʼu mompau-mpau ewa nabi. 27Sambaʼa ngalitau molonco njoʼu mantoʼoka i Musa anu mewali ri Elidadi pai Medadi.
28I Yasua ana i Nuu, anu mantulungimo i Musa ungka ri kangalitaunya, mantoʼoka i Musa, “Ndipaponjiimo tau seʼe!”
29Mesono i Musa natoʼo, “Ara wenu painaka nupomasusa ndaya yaku? Maʼai kupampomata-mata i Pue da mawai Inosaa ri pura-pura waʼa ntaua, pai mampapewali tau seʼe pura-pura nabi!” 30Nepa mewalili i Musa ri raya ngkemanya sangkani-ngkani pai pitu mpuyu tadulako nto Isaraeli setu.
I Pue mampapetudu tonci puru
11:31-35
31Tingkarasaka ndapapewui i mPue ngoyu ntasi; ngoyu setu anu mangkeni tonci puru anu moyoko jamo sambaʼa meteri ungka ri wawo ntana. Waʼa ntonci setu moyoko-yoko ri sori ngkema, bara tesangkuja kilo meteri mantolilimi kareʼe mpokema nto Isaraeli. 32Radua ndeme pai sambengi napangarurusi waʼa ntau tonci puru setu. Sambaʼa tau seʼe kakuranyamo ane sancowu kilo kaneenya tonci anu naleʼo mampasambaka. Waʼa ntonci setu natalesaka ntau seʼe ri soma ngkemanya naka mangau. 33Sindara mariapa wayawo anu da ndakoni, marau raya i mPue banca setu, painaka ndapareʼe juʼa lele ri oyo ntau seʼe. Painaka maria tau anu mate. 34Kareʼe mpadayo waʼa ntau mate setu ndapapotoʼoka, “Dayo ngKamanyanya”, maka njairia ndapangadayo waʼa ntau anu mate ua kamanyanya.
35Ungka njairia banca setu melimba ri daera Hasero mokema njairia.
