PAIMBA 10
10
Waʼa surupeta salaka
10:1-10
1I Pue mompau ri Musa ndatoʼo, 2“Powiamo radua surupeta salaka anu ndapalu da mampeboo waʼa mpalili da mompasambaka bara mewali petondoni mampokau tau seʼe da malai. 3Ane radua-duamo seʼe mayui ndapantawuisi, posokinya pura-pura to Isaraeli da mompasambaka mantolilimi siko ri suara mbombo Kemaku. 4Paikanya ane podo sambaʼaja anu ndatawuisi, posokinya podo waʼa ntadulako anu sangaya-ngaya da mompasambaka mantolilimi siko. 5Ane ede-ede pantawuisi surupeta, inceʼe petondoni waʼa lemba anu mokema tondo pebetea sangaya-ngaya da malai. 6Ane ndatawuisi woʼu ede-ede karadua ngkaninya, mampokau waʼa lemba anu mokema ri tondo selata da malai. Mewali oninya anu ede-ede posokinya maʼiowaka tau sondo malai, 7paikanya oninya anu mayui posokinya mampeboo tau sondo da mompasambaka. 8Waʼa surupeta sangaya-ngaya da tawuisi waʼa ntadu mpanyomba waʼa ana i Haruni. Inceʼemo padika anu sangaya-ngaya da ndilulu rantani masae-sae.
9Pai ane moʼiwali komi ri tanami da matumba iwali anu rata mangaungku komi da nditawuisi waʼa surupeta setu. Maka yaku Pue Ala Puemi da mampelae pai da malapasaka komi ungka ri iwalimi. 10Ewanceʼe ri eo ngkawongko ndayami, inceʼemo ewa mpamposusakan Wuya Dawoʼu pai waʼa ncusa anu ntaninya, surupeta setu sangaya-ngaya da ndatawuisi ri sindara komi mampanyombaka panyomba anu ndaʼombasi pai panyomba ngkasimadago. Maka yaku da mangkadudungi komi. Yakumo Pue Ala Puemu.”
Palai nto Isaraeli ungka ungka pada bone Sinai
10:11-32
11Ri taʼu karadua pampalaika nto Isaraeli tana Masiri, ri ruampuyu eo mbuya karadua, meangkatakamo limu ungka ri wawo Kema i mPue. 12Nepa malai to Isaraeli ungka ri pada bone Sinai malulu posuncu mpalai, pai karata ntau seʼe ri pada bone Para limu setu meʼonto njairia.
13Inceʼemo anu kaʼisa ngkaninya palai ntau seʼe ua songka i mPue mampoliu i Musa. 14Anu mamperiuka inceʼemo waʼa ntau anu metingkeni ri Panji ngkasambaʼa-mbaʼa i Yahuda mombetonda santibura-santibura: i Nahaso ana i Aminada anu mantadulakoni. 15I Nataneeli ana i Juari mantadulakoni kasambaʼa-mbaʼa nto Isakari, 16pai i Eliabi ana i Heloni mantadulakoni kasambaʼa-mbaʼa nto Sebulo.
17Ungka lairia ndarongkasimo Kema i mPue, malaimo to Geresoni pai to Merari anu mampasaʼa Kema setu.
18Roo setu malaimo waʼa ntau anu metingkeni ri panji ngkasambaʼa-mbaʼa i Rube, mombetonda santibura-santibura. I Elisuri ana i Ncedeuri mantadulakoni kasambaʼa-mbaʼa i Rube. 19I Selumieli ana i Ncurisadai mantadulakoni kasambaʼa-mbaʼa nto Simeo, 20pai i Eliyasa ana i Rehueli mantadulakoni kasambaʼa-mbaʼa nto Gati.
21Roo setu malaimo waʼa nto Kehati anu mampasaʼa waʼa mparewa magali. Ane jelamo tau seʼe ri kareʼe mpeʼonto pai da pokema Kema i mPue ndapataka muni.
22Ungka lairia da mentondarakamo waʼa ntau anu metingkeni ri panji ngkasambaʼa-mbaʼa i Eparai, mombetonda santibura-santibura, i Elisama ana i Amihu mantadulakoni kasambaʼa-mbaʼa nto Eparai, 23i Gamalieli ana i Pedasuri mantadulakoni kasambaʼa-mbaʼa nto Manase, 24pai i Abidani ana i Gideoni mantadulakoni kasambaʼa-mbaʼa nto Benyami.
25Kasusanya malaimo waʼa ntau anu metingkeni ri panji ngkasambaʼa-mbaʼa i Daa. Tau seʼe mamperipurisi ri pelinja nto Isaraeli melinja mombetonda-tonda santibura-santibura: i Ahieseri ana i Amisadai mantadulakoni kasambaʼa-mbaʼa nto Daa. 26I Pagieli ana i Okerani mantadulakoni kasambaʼa-mbaʼa nto Asere, 27pai i Ahira ana i Enani mantadulakoni kasambaʼa-mbaʼa nto Natali. 28Ewanceʼemo posuncu mpelinja nto Isaraeli, santibura-santibura, sangkani-sangkani malai da melimba.
29Natoʼo i Musa ri eranya i Hoba ana i Rehuel to Mijea, “Kami da njoʼu ri tana anu ndajanjika kami i mPue da ndawaika kami. Roomo ndajanji i mPue da mawaika to Isaraeli anu madago. Mewali lulumo kami bareʼe da kajea-jeani siko.”
30Mesono i Hoba, “Tarima kase, paikanya yaku da rayaku mewalili ri lipu pebete ntanoanaku.”
31Natoʼo i Musa, “Neʼe boi nupalaika kami, maka siko anu da mewali mata njaya mami, maka siko anu maincani ri mbeʼi da kalese mpokema ri pada bone seʼi. 32Maka ane melulu siko, ewambeʼi ndapampokapuru i mPue kami da ewanceʼe seʼe da kapampokapuru siko.”
Pelinja nto Isaraeli
10:33-36
33Butu napalaikamo nto Isaraeli Buyu Sinai, buyu mpeari i mPue, tatogo ndeme pelinja ntau seʼe, Peti mPojanji i mPue ndapoaju mamporiuka tau seʼe mampepali da kareʼe mpokema ntau seʼe. 34Ane malai tau seʼe ungka ri kareʼe mpokema, limu i mPue da mamouti tau seʼe ane ri ndeme.
35 #
Pol. 68:2
Sangkani-sangkani Peti mPojanji setu da ndaokotaka, natoʼo i Musa, “Ndiporiumo, boo Pue, ndiwuragamo waʼa iwalimi da naka jianja waʼa ntau anu mampobanciika komi.” 36Pai sangkani-sangkani Peti mPojanji setu rata ri kareʼe da peʼonto, natoʼo i Musa, “Ndikarodomo, boo Pue ri waʼa ntau-Mi to Isaraeli anu moncowu-ncowu seʼi.”
