John 2
2
Jisü no Azü pe Atsaizü Kughulho
1Atsala aküthüniu Galilee lo Cana ipikeu phu lo külakupu lakhi shia. Ikelo Jisü pazá ghí tilehi ae, 2eno külakupu lo Jisü ngò pa khopemiqo ghí kusü pepüae. 3Kughou atsaizü kühave keno, Jisü pazá no pa vilo ishi pi, “Panongu ye atsaizü kühavae.”
4Jisü no khochile, “Totimio, no ye ivilo kiu piani kea? Ido ye ighi miphie.”
5Pazá no lokijimiqo vilo pi, “Pa no nongu vilo kiu shilopi keno tipau shilo.”
6Tipau phivilo Jewmiqo no qhukimthe keu chine-chini ghenguno peitha chekeu atu no mülà keu alikoli tsügho ghope püa, alikoli lakhi lo azühu muku ngò shighi#2:6 Momu liter 75 lono 115 kutólo. dolo pichhilu cheke.
7Jisü no lokijimiqo vilo pi, “Azü pesü alikoliqo shepichhilo”; ike panongu no amütsü kutólo pichhive.
8Tisheno pa no panongu vilo pi, “Itehi ye azü khami shophe pesü lokijimi shou atóu lau pewulo.”
Panongu no tishie, 9eno lokijimi shou atóu no azü pesü atsaizü kughulhove keu michejue. Lokijimi khunoqo no azü shophelu keno panongu ye ithi ae, ikemu lokijimi shou atóu ye azü khilau no süghi keno müthae. Tisheno pa no külapuu ku sawo 10no pi, “Kümtsü no atüghishi atsaizü kìshe pesü akiviu peighi cheni eno inamiqo no aghakiqishi yeve kethiu no atsaizü ame kümlá shikeu peighi chenie; ikemu no ye itehi kutólo atsaizü akiviu müsá pe püanie.”
11Jisü no hile Galilee qhalo mishiphu Cana lo kiu shi keno tiye pa juküvü pephe piye keu michipuqo gholo atüghiu ke; ikelo pa khopemiqo no pa shou pülüluve.
12Hipathiu pa ye pazá ngò pa thiküzümiqo eno pa khopemiqo gholo no Capernaum lo iqive. Panongu tilau atsala hami ghenguno ngove.
Jisü no Achineki Khalaqo Shikimthe
13Kughou Jewmi Hechekulu ghulhu do kupunúve keno, Jisü no Jerusalem lo iqho. 14Jisü no achineki khala lo timiqo no pichepighi, ambe eno miqheduqo je aghí keu ithulu, eno kütamiqo no kibepu lo iqa no pisa kili aghí keu ithulu. 15Ike pa no akighikipiliqo pesü aküküzapu lakhi mülà püzü timiqo gholo no ambe eno pichepighi kümtsü achineki khala lono hapheve; pa no pisa kikilimiqow ghükayiqo kutholevetsü eno panonguw kibepuqo tukulovetsü. 16Miqhedu je akemiqo vilo pa no ishi pi, “Hipaqo pesü hile no ipevelo! I Pù ki pesü alhikishi-a kughulho kevilo!” 17Pa khopemiqo no hitoi yèpüa keu kümsülu: “Ochineki ghenguno alomsü keu hu no ipitipüzaqhi nanie.”#2:17 Leshe 69:9
18Tipathiu Jewmiqo no Jisü khochile, “Hipaqo kümtsü shikulupu kükagha akeu kimchitsü nike ghenguno no ye kiu amichipu ningu piyelu nani kea?”
19Jisü no panongu khochile, “Achineki hipau kubolevelo. Ino atsala küthü dolo no itaghi hipau mülà pukuve tsü nanie.”
20Panongu no khochile, “Achineki hipau mülà puku nike ampe lhobidi tsügho lue, eno no ye atsala küthü dolo no achineki hipau mülà pukuve niye keshea?” 21Ikemu pa no achineki ipi akeu ye pa phimpi pi ake. 22Akìthí lono pa xüputhuve kethiu, pa khopemiqo ye pa no kiu pi akeno kümsüchilelu. Tisheno panongu no Kuchoyesü ngò Jisü no piakeu tsaqo shou pülübelue.
23Ike pa no Jerusalem lo Hechekulu ghulhu Tiqhitini lo akelo timi kutomo no pa no amichipuqo shikeu ithulu no pa#2:23 Momu pa je shou pülübeluve. 24Ikemu Jisü ye timi kümtsü ghili ithi akehu, panongu shou pülübemoe. 25Pa ye timiqo shepe kiumu avehupu shimoe, kughengu pa ye timi lakhi-khi lolo kiu akeno ithi ake.
ప్రస్తుతం ఎంపిక చేయబడింది:
John 2: STB
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
