John 3
3
Jisü no Nicodemus Kütsü
1Ike Phariseemi lakhi pa je Nicodemus ipikeu ache, pa ye Jewmi yekipe mijekütsü muqo lo kihiküsümi lakhi ke. 2Pa no putho lono Jisü lau ighino ishi pi, “Rabbi, no ye Alhou lau no ighi keu kükütsümi lakhi kepi ningu ye ithi anie. Kughengu Alhou no timi lakhi gholo aghimo ke aye nono amichipuqo shi akeu ye khilemu shimlae.”
3Jisü no khochile, “Ino kuchou tsà ovilo pìní, punú kithemo kelo ye khunomu Alhou kükaqha ithumla nani.”
4Nicodemus no ishi iniju, “Timi lakhi ye kichimi shive no kíshi püzü punú kithelu nani kea? Mütsüqhei no panongu ye panoqo pazá tita lo punú nike ghenguno akiniù ilo kithe müla nanie!”
5Jisü no khochile, “Ino kuchou tsà ovilo pìní, azü eno Aghungú lono punú kithemo kelo ye khunomu Alhou kükaqha lo ilo müla nani. 6Ashi no ashi punú cheni, eno Aghungú no aghungú punú cheni. 7Ino ovilo, ‘No ye punú kithe moayesae,’ ipi akeu lo no ye akümzaqhiyi akepu kumoe. 8Amlhü ye khile-khilemu pa no pulo keu-a lo fupuku chenie. No ye amlhü sütsa chilu cheni, ikemu no ye amlhü ye khilau no ighi momu khilau wucheni keno pi mülae. Ike Aghungú lono punú kitheve kemi kümtsü hitoi ke.”
9Nicodemus no iniju, “Hiye kíshi no ishilu nani kea?”
10Jisü no ishi pi, “No ye Israelmiʼw shikükau shi püzü thime hipaqo vethalumo keshea? 11Ino kuchou tsà ovilo pìní, ningu ye nino ithi akeu pi cheni, eno ningu ye kiu ithulu keno tipau thopi shi cheni, ike tishi keghi nongu timiqo ye ningu shepe ikhilu chemoe. 12Ino ayeghi lo ghiliqo pe ovilo pikeu thotsü pülümo aye no ye kíshi püzü ino kungugha ghiliqo pikeu pülüni kea? 13Kungugha lono ighi keu Timi Nu hu kumo aye khunomu kungugha lo wuju miphie. 14Moses no asayeqha lo apighi ikhiqhe puku keu hutoi, Timi Nu ghí ikhiqhe puku#3:14 Momu sheqhe puku. moayesa nanie, 15tishianguno pa pülülu kemi kümtsü lhokta küxü ithulu peniye ke.”
16Alhou no ayeghilomi kimiyekütü keu ghenguno pa Nu lakhi likhi akeu pesü tsüvei, tighenguno khukhumu pa shou pülübelu keu ye pühavemo nani ikemu lhokta küxü ithulu nani. 17Kughengu Alhou no pa Nu puwu keu ye ayeghilomi shou küghathabe niye ke kumoe, ikemu pa vechewo ayeghilomi xalu peniye ke. 18Khuno no pa pülüni keno pano shou küghathabemoe, ikemu khuno no pülümo nike no küghathabevae kughengu panongu no Alhou Nu lakhi likhi akeu je shou pülübemo ke. 19Xakütha ye hike: Aküvü ye ayeghi lo ighivae, ikemu timiqo no aküvü kimiye nike züqhulo àküzǘ kimiye ke, kughengu panongu kümlàqo no küsakügha ke. 20Küsakügha shi chekemi kümtsü no aküvü mithi ke, eno panongu kümlàqo pepheve nikeu kümsà lau no aküvü lo ighi chemoe. 21Ikemu khuno no amikucho shi xü cheni keno pano ye aküvü lo ighi cheni, tishianguno panongu no kiu mülà keno tiye Alhou nhekithe lono mülà ke ipi mütsümishei ithulu peniye ke.
John no Itaghi Jisü Shepe Shitsü
22Hipathiu Jisü ngò pa khopemiqo no Judea phughi sükümxa lo ilo, tilehi pa no ado hami panongu gholo ngoe, eno pa no timiqo baptiz shitsüe. 23Ike John ghí Salim phivilo Aenon lo baptiz shi tsüae, kughengu tilehi azü kupukuno shi ake eno timiqo no baptiz shi niye ighi ake. 24(Hiye akughuki lo John sǘ miphi züu ke.) 25John khopemiqo ngò Jewmi khami dolo qhukimthe keu chine-chini vehu lo kütsala keu hami ipeghive. 26Panongu no John lau ighino pa vilo ishi pi, “Rabbi, timi lakhi ogholo Jordan hukukuu ngo akeu eno nono ashepe shitsü keu hu julo, pa ye baptiz shitsü ani eno kümtsü no pa lau wu anie.”
27Ike John no khochile, “Timi lakhi ye kungugha lono kiu tsüvea keno tilikhi ithulu nanie. 28Ino, ‘Ni ye Messiah kumoe ikemu ni ye pa züu no puwu ke,’ ipikeu nongu likhi nongu no ashepe shilu nani. 29Külaliu ye külapuuʼw ke. Shompami khuu no külapuu khe eno pa tsà iní cheni keno pa ye kughou külapuu sütsa chiluni keno alokiqi no chhitoive cheni. Alokivi tipau ye iw ke eno tiye kupukülaivae. 30Pa ye chuqumghai kitheve moayesa; eno ni ye chuninei kitheve moayesae.”
31Khuu kunguu no ighi keno pa ye kümtsü nguno akiqheu ke; ayeghi lono ighi keu ye ayeghilomi ke, eno ayeghilomi toi pi acheni. Kungugha lono ighi keu hu ye kümtsü nguno akiqheu ke. 32Pa ye pa no kiu chilu eno ithulu keno tipau shepe shike, ikemu khunomu pa shepe ikhilumoe. 33Tipau ikhilu kemiqo ye Alhou ye kuchou kepi akupulo shepe shive tsüae. 34Kughengu Alhou no khuu puwu keno pa ye Alhou tsà pi cheni, kughengu Alhou ye kihikütha küha no Aghungú tsü cheni. 35Apù ye Anu kimiye cheni eno thowkha kümtsü pa u lo sǘvetsüae. 36Khukhumu Anu shou pülübe keu ye lhokta küxü ani, ikemu khukhumu Anu milive keu ye aküxü ithumla nani, kughengu panongu shou Alhou loghukighide acheni ke.
ప్రస్తుతం ఎంపిక చేయబడింది:
John 3: STB
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
