John 1
1
Atsa hu no Ashi Shive
1Abothu lono Atsa hu ye ae, eno Atsa hu ye Alhou gholo ae, eno Atsa hu ye Alhou ke. 2Pa ye Alhou gholo abothu lono ae. 3Pa vechewo thime kümtsü lhophe ke; lhosüpüa keu thimeqo lakhimu pa sümo no lhosü pepüamoe. 4Pa lolo aküxü ae, eno aküxü tipau no timi jeli kümtsü ghenguno aküvü ke. 5Aküvü hu no àküzǘ lo yepüvü, eno àküzǘ ye khilemu tipau küzüphove mülae.
6Alhou no puwu keu timi lakhi pa je John ipikeu ache. 7Pa ye aküvü ghili pesü ashepe shipe nike ghenguno thopimi lakhi shisü ighie tishikeu lono timi kümtsü pelo pa vechewo pülülu peniye ke. 8Pa ampi ye aküvü hu kumoe; pa ye aküvüʼw thopi shini ke ghengu likhi no ighike.
9Aküvü kuchou khikhi timi kümtsü lau yepüvü cheni keno tipau hu ayeghi lo ighi niye shiae. 10Pa ye ayeghi lo ae, eno pa vechewo ayeghiqha lhophe kemu ayeghilomi no pa ithimoe. 11Pa ye pa likhi paw timiqo gholo ighike, ikemu pa likhi paw timiqo no pa ikhilumoe. 12Tishimu pa ikhilu kemiqo, eno pa je lo pülübelu kemiqo pelo Alhou nuli shilu penikeu chipiu tsüe— 13panongu no Alhou nuli shilu keu ye timi lhoaye lono punúlu keu lono kumoe, tikumo no timiw xakütha momu timi pulou lono kumoe, ikemu Alhou lau no ke.
14Atsa hu no ashi shive eno ningu gholo xüe. Ningu no pa juküvü ithuluvae, ajuküvü tiye Anu lakhi likhi akeu ke, Anu ye küpükini ngò kuchou no chhitoi shi püzü Apù lau no ighike.
15(John no pa vehu pesü ashepe shie. Eno pa no ighamuku pi, “Ino pa ghili piakeu hu ye ino kughou, ‘Timi lakhi ishelo ighi niye akeu ye inguno akiqheu ke, kughengu pa ye izüu no acheghivae,’ ipikeu hu ke.”) 16Paw kupukülai keu ghenguno püzüu küpükini tsüve keu theli lo itaghi ningu kümtsü küpükini ithulu ke. 17Kughengu ayeza ye Moses vechewo tsüke, ikemu küpükini ngò kuchou ye Jisü Khristo vechewo no ighike. 18Khunomu Alhou ithumla aphie, ikemu Anu khuu pa likhi eno pa ye Alhou, Apù sasü kupunukhoi kütshükime pe achekeu keno, pa no Apù Alhou pephe piyevae.
John Baptiz Kishiu no Messiah Kumoe pi Milive keu
19Kughou Jewmi sakiphemiqo no Jerusalem lo achinemi ngò Levimiqo pelo John ye khuu keno iniju peniye puwu keno, John no hitoi pa shepe shie. 20Pa ye pipheni keu süchilevemoe ikemu, “Ni ye Messiah kumoe,” ipi vejoi pipheve tsüe.
21Panongu no pa vilo iniju, “Tishiaye no ye khu kea? No ye Elijah keshea?”
Pa no pi, “Ni ye Elijah kumoe.”
“No ye Tungkupu hu keshea?”
Pa no khochile, “Kumoe.”
22Ashekha lo panongu no pi, “No ye khuu kea? Ningu puwu kemiqo lau idewo pikepu shi khokichile ningu tsülo. Olikhi no ye khuu ipi cheni kea?”
23John no Isaiah tungkupuu tsau no khochile, “Ni ye yenguike-a lo ‘Ampeu ghenguno alaghi müzüchoi shitsülo,’ ipi akeu sütsa hu ke.”#1:23 Isa 40:3
24Ike Phariseemiqo no puwu kemiqo no ishi 25John vilo iniju, “Tishiaye no ye Messiah mu kumo, Elijah mu kumo momu Tungkupu mu kumo aye kushiye baptiz shitsü ani kea?”
26John no khochile, “Ni ye azü pesü baptiz shi chenie, ikemu nongu no mütha keu lakhi nongu gholo puthugho anie. 27Pa ye ishelo ighi niye akeu ke, ni ye pa pukhukuqho kütsügha kighimu kuqho nike aküzüpu kumoe.”
28Hi kümtsü Jordan hukukuu Bethany lo John no baptiz shitsü akeu-a lono shikupu keu ke.
John no Jisü Shepe shitsü
29Tishiwo thoghiu Jisü no pa lau chekeu ithulu kelo John no ishi pi, “Julo, Alhouʼw Ambeti khuu ayeghilomi xiné pevetsü keno hi chenie! 30Hiye kughou ino, ‘Timi lakhi khuu ishelo ighini keno pa ye inguno akiqheu ke, kughengu pa ye izüu no acheghivae,’ ipikeu ke. 31Ilikhi ni ghí pa mütha ke, ikemu ino azü pesü baptiz shi ighi keu kiqi ye Israel lau pa pephe piye tsüni keu ghenguno ke.”
32Tisheno John no ashepe hipau tsü: “Kungugha lono Aghungú hu no miqhedu lakhi toi iqighi no pa shou ngo akeu ino ithulue. 33Eno ilikhi ni ghí pa mütha ke, ikemu ipelo azü pesü baptiz shipe nike ipuwu keu no ivilo pi, ‘Timi khuu shou Aghungú ikughi no ngo keu nono ithuluni keno pa no Aghungú Kimthe pesü baptiz shitsü nani.’ 34Ino ithuluvea eno thopi shi anike hiye Alhou Nu ke.”#1:34 Isa 42:1
John Khopemiqo no Jisü Pape
35Tishiwo thoghiu John ye itaghi pa khopemi kini sasü tilehi puthugho ae. 36Kughou Jisü no tipa-a kathasü wuche keu ithulu keno, John no ishi pi, “Julo, Alhouʼw Ambeti!”
37Kughou John no hi pikeu chilu keno, akhopemi pama ye Jisü papesü wuve. 38Jisü no tsüghǜ idewo pama no pape chekeu ithulu no iniju, “Nokujo ye kiu avehupu shi ani kea?”
Pama no pi, “Rabbi” (hipau kiqi ye “Akükütsüu”), “no ye khile ngo niye ani kea?”
39Jisü no khochile, “Ighilo, eno nokujo no ithulu nani.”
Tiye avelau ayì bidí qhalo shiake. Ike pama no wu püzü Jisü no ngo chekeu-a ithulu, eno tipani pama ye Jisü gholo ngove.
40Simon Peter thiküzüu Andrew ye timi kini dolo lakhi khuu John no kiu pi keno tipau chilu püzü Jisü pape wuve keu ke. 41Andrew no thime atüghiu shikeu ye pamu Simon phuwu no pa vilo, “Ningu ye Messiah phuluvae” (tiye Khristo ke), ipi ke. 42Eno pa no Jisü lau Simon saighi.
Jisü no Simon ju no pi, “No ye John nu Simon ke. No ye Cephas ipi kuniae,” (aje hipau pebide kelo Peter#1:42 Cephas ipi akeu ye Arameami tsà eno Peter ipi akeu ye Greek tsà eno kinikujo kiqi ye atuqu ipi ani. ke).
Jisü no Philip ngò Nathanael Ku keu
43Tishiwo thoghiu Jisü ye Galilee lo wuni keu shive. Philip ithulu no Jisü no pa vilo pi, “Ipapelo.”
44Andrew ngò Peter toi Philip ye Bethsaida mishiphu lono ighi kemi ke. 45Philip no Nathanael ithulu püzü pa vilo ishi pi, “Ningu ye Moses no Ayeza lo timi lakhi ghili yèpüa keu eno khuu tungkupumiqo ghí pa ghili yèpüa keno pa ithuluvae—pa ye Nazareth nó ghami Joseph nopu Jisü ke.”
46Nathanael no ishi iniju, “Nazareth ya! Tilehi no kiula akivi ighiluni kea?”
Philip no pi, “Ighi püzü julo.”
47Kughou Jisü no Nathanael no pa küdau chekeu ithulu keno pa no Nathanael ghili ishi pi, “Israelmi kuchou hi chenie. Pa lolo pishikiqhi kühae.”
48“No ye kíshi püzü ni ithi ani kea?” ipi Nathanael no iniju.
Jisü no khochile, “Philip no oku miphi züu nono mububo qholo akelo nomu ni ye no ithuluvae.”
49Ikelo Nathanael no asheshu ghi pi, “Rabbi, no ye Alhou Nu ke; no ye Israel kükau ke.”
50Jisü no pi, “No ye ino ovilo mububo qholo no ithulu ipikeu ghenguno pülü anie. Ikemu no ye thime tipau nguno akijeu ithuluni aphie.” 51Tisheno pa no pikibe ghi pi, “Ino kuchou tsà ovilo#1:51 Greek tsau ye nongu vilo ipi ani. pìní, nono# 1:51 Greek tsau ye nongu ipi ani. ‘kungugha khaqhive no Alhouʼw kungumiqo no Timi Nu shou iku iqi,’#1:51 Bothu 28:12 akeu ithulu nanie.”
ప్రస్తుతం ఎంపిక చేయబడింది:
John 1: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
