John 16
16
1“Ino hi kümtsü nongu vilo pive akeu ye nongu pelo ikiqi pemo nikeu ghenguno ke. 2Panongu no synagog lono nongu hapheve nani; kuchou lo ye kughou timi khuno no nongu pìthíveni keno panongu ye Alhou lau hukuthu kümlagho shi ani küghashi kümsüveni keu do cheni. 3Panongu no tipaphi kümlàqo shi nani kughengu panongu ye Apù momu ni mütha ke. 4Ino nongu vilo hi pive ani, tishianguno kughou panongu do ighini keno nongu no ino panoqo ghili pikichi pepüa keu kümsüchilelu peniye ke. Ni ye hukuthu lo nongu vilo hipau pimo ke kughengu ino nongu gholo ake, 5ikemu itehi ni ye khuu ipuwu keno pa gholo wuniae. ‘No ye khila wucheni kea?’ ipi nongu khunomu ivilo inijumoe. 6Tishini ke züqhulo ino thime hipaqo pivekeu ghenguno nongu ye amlokighishi no chhitoivae. 7Ikemu ino kuchou tsà nongu vilo pìní, ino wuve keu no nongu kivipu ke. Ino wuvemo ke thaqhülo Akukuphuu hu ye nongu lau ighimo nani; ikemu ino wuve anguno, ino nongu lau pa puwu nani. 8Kughou pa no ighini keno, pa no ayeghiqha no axiné eno achipiumikucho eno küghakütha ghiliqo achipikumo lo kümsü pe akeu kimchitsü nani: 9eno axiné ghili kimchitsü nani, kughengu timiqo no ipülümo ke, 10eno achipiumikucho ghili kimchitsü nani, kughengu ni ye Apù lau wuni cheni, eno nongu ye ni ithumlave nani; 11eno küghakütha ghili kimchitsü nani, kughengu itehi ayeghi hipauw kükapuu shou ye küghathabeve kepu lo auvae.
12“Ni ye nongu vilo pi kepu kutomo aphi kemu itehi nongu ye puqhemla nani. 13Ikemu kughou kuchou Ghungú no ighini keno, pa no kuchou kümtsü pesü nongu kichepiye nani. Pa ye pa kutoshi pimo nani; pa ye pa no chilu keu likhi pi nani, eno kiu ighi niye shiaphi keno pa no nongu vilo pitsü nani. 14Pa no ijekipipu shitsü nani kughengu pa no kiu ilau no ithulu keno tipau pa no nongu lau pephe piye nani. 15I Pù no akeu kümtsü iw ke. Tighenguno ino piakeu ye, Aghungú no ilau no kiu ithulu keno pa no nongu lau pephe piye nani ipi ke.”
Akhopemiqo Mulokighishi ye Alokiqi Shive Nani
16Jisü no kibe ghi pi, “Kushuwa kumo dolo nongu ye ni ithumlave nani, eno ado hami thiu no nongu no ni ithulu nani.”
17Hipau tsà lo pa khopemiqo dolo lakhi no lakhi vilo ishi pikile ae, “Pa ye, ‘Kushuwa kumo dolo nongu ye ni ithumlave nani, eno ado hami thiu no nongu no ni ithulu nani,’ eno ‘Kughengu ni ye Apù lau wucheni,’ ishi piakeu kiqi ye kiu kea?” 18Panongu no ishi ighiju auve, “Pa no, ‘kushuwa kumo dolo,’ ipi akeu kiqi ye kiu kea? Ningu ye pa no kiu piani keno vethalu amoe.”
19Jisü ye panongu no hipau ghili pa vilo iniju nishi akeu ithive, ikehu pa no panongu vilo pi, “Nongu ye lakhi no lakhi vilo niye kiu kiqi lono ‘Kushuwa kumo dolo nongu ye ni ithumlave nani, eno ado hami thiu nongu no ni ithulu nani,’ ipi keno iniju ani keshea? 20Ino kuchou tsà nongu vilo pìní, ayeghiqha no alovishe akelo nongu ye qanimlo nani. Nongu ye amlokighishi shi nani, ikemu nongu mulokighishi ye alokiqipu shive nani. 21Totimi lakhi ye angá punúni kelo sǜ cheni kughengu li do ye ighivea ke; ikemu kughou li no angá punúveni keno li ye angá hu ayeghi lo punuqhiluve keu lokiqi ghenguno amloghuju hu kümsümave cheni. 22Ikehu nongu ghí itehi ye nongu muloghuju shikeu do ke, ikemu itaghi ino nongu sasü kusho nani eno nongu no alovishe nani, eno timi khunomu nongu lokiqi ikhisüwuvemo nani. 23Tipau tsalà lo nongu ye ivilo kiumu ighijumove nani. Ino kuchou tsà nongu vilo pìní, nongu no ije lono kiu-kiumu khu aye I Pù no nongu tsü nani. 24Itehi kutólo nongu ye ije lono kiumu khu miphie. Khulo eno nongu no ithulu nani, eno nongu lokiqi ye kupukülailuve nani.
25“Ni ye aholetsa lono pi acheni kemu aholetsa ghola peithamove no mütsümishei keu lono I Pù ghili pìní keu do lakhi chenie. 26Tipau tsalà lo nongu no ije lono khu nani. Tiye ino Apù vilo nongu züqhu shi khu nani ipi anike kumoe. 27Moe, Apù ampi no nongu kimiye chenie kughengu nongu no ikimiye ke eno ni ye Alhou lau no ighi kepi pülü cheni ke. 28Ni ye Apù lau no ayeghi lo ighike; ni ye itehi ye ayeghi qhive no Apù lau idewove cheae.”
29Tipathiu Jisü khopemiqo no ishi pi, “No ye itehi ye aholetsau no kumo püzü mütsümishei pi anie. 30No ye thowkha kümtsü ithi akeu eno khunomu ovilo ighiju akepu kühae ipi ningu no ithivae. Hipau lono ningu pelo no ye Alhou lau no ighi kepi pülülu peke.”
31“Itehi nongu ye pülüluvea kema?” ipi Jisü no khochile. 32“Ado lakhi chenie eno kuchou lo ye tihu ighivae, tipa ghuloki lo nongu ye pütüta ki lo apanaghave nani. Nongu ye ilikhi qhive nani. Ikemu ni ye ilikhi ani chemoe, kughengu I Pù no igholo ani.
33“I no thime hipaqo pesü nongu vilo pive akeu ye nongu pelo ivechewo alokiqi ithulu peniye ke. Hipau yeghi lo nongu ye aveküsa sholu anani. Ikemu amlo mutotoilo! Ni ye ayeghiqha theqhiluvae.”
ప్రస్తుతం ఎంపిక చేయబడింది:
John 16: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
