John 17
17
Ajuküvüpu Shilu Penike Ghenguno Jisü no Inikhu
1Jisü no hipau pive kethiu pa no kungugha küdau jupuku no inikhu:
“Apùo, ado hu ye ighivae. O Nu juküvüpu shitsülo, tishianguno O Nu pelo ojuküvüpu shi tsülu pe kepu shi. 2Kughengu nono timiqo kümtsü shou kükagha puloza pesü pa tsüke eno pa pelo lhokta küxü pesü nono pa tsü kemiqo kümtsü lau tsülu peniye ke. 3Lhokta küxü ye hike: panongu no no ye kuchou Lhou ipi No ithi nikeu eno nono puwu keu Jisü Khristo ithi nikeu ke. 4Ni ye nono ipichetsü keu kümlà shikupulu keu vechewo ayeghi lo ojuküvüpu shitsü ke. 5Ike itehi ye, Apùo, ayeghi lho miphi züu ogholo ijekipi achekeu hu pesü ozülo no ijekipipu shitsülo.
Jisü no Pa Khopemiqo Ghenguno Inikhu
6“Ayeghilomi khunoqo ikhiphe pesü itsü keno tipaqo lau ino oje pephe piyevae. Panongu ye ow ke; nono panongu pesü itsü eno panongu no otsa ghokulu shike. 7Itehi panongu ye nono itsü keu kümtsü olau no ighi keu ke ipi ithivae. 8Kughengu nono itsü keu tsaqo panoqo tsüke eno panongu no tipaqo ikhilue. Panongu ye mütsüqhei no ni ye olau no ighi kepi ithi ani, eno panongu ye nono ipuwu kepi pülüluve ake. 9Ni ye panoqo ghenguno inikhu ani. Ni ye ayeghiqha ghenguno inikhu amoe, ikemu nono khunoqo pesü itsü keno panongu ghenguno inikhu ani, kughengu panongu ye ow ke. 10Ino akeu kümtsü ow, eno nono akeu kümtsü iw ke. Eno panongu vechewo ilau ajuküvü shivae. 11Ni ye ayeghi lo ngo aní chemovae, eno ni ye olau cheae, ikemu panongu ye ayeghi lo aphie. Apù Akimtheu, oje küká vechewo panongu süsho tsülo, aje tiye nono itsü keu ke, tishianguno nikujo no lakhi shi aketoi panongu ghí lakhi shilu penie. 12Ino panongu gholo akelo, ino panongu süsho eno nono aje itsü keu pesü panongu sükusho shipe qhike. Kuchoyesü shikupu nike ghenguno ti lakhi pühave no kütsakungove niye shiakeu kumo aye khumu pühave keu shi miphie.
13“Niye itehi olau chenie, ikemu panongu pelo panongu lolo alokiqi akimighi chhitoi alu penike ghenguno ino ayeghi lo panongu gholo aphi lono thime hipaqo pi anie. 14Ino otsa pesü panongu tsüvae eno ayeghilomi no panongu mithi ke, kughengu ino ayeghi laumi kumo ketoi panongu ghí ayeghi laumi kumovae. 15Ino inikhu akeu ye opelo panongu pesü ayeghi lono ikhisüwuve penike ghenguno kumoe ikemu küsakügha lau no panongu süsho tsü penike ghenguno ke. 16Ino ayeghi laumi kumo ketoi panongu ghí ayeghi laumi kumovae. 17Kuchou vechewo panoqo shikimthe tsülo kughengu otsa ye kuchou ke. 18Nono ayeghi lo ipuwu keu toi, ino panongu pesü ayeghi lo puwuvae. 19Panongu pelo kuchou no ikhiphe pe tsü penike ghenguno ni ye ilikhi ni ikhiphe pe tsüvea ke.
Jisü no Küpülümi Kümtsü Ghenguno Inikhu
20“Ni ye panongu ghengu likhi no inikhu anike kumoe. Ino inikhu akeu ye khuno no panongu kükütsü tsà vechewo ipülüni keno tipaqo ghengu ghí inikhu anie, 21Apùo, nono ilolo aketoi eno ino ololo ake toi, panongu kümtsü pelo lakhi shilu pelo. Panongu ghí nikujo lolo apelo tishianguno ayeghilomi pelo nono ipuwu kepi pülülu penike. 22Nono ajuküvü itsü keu pesü ino panongu tsüvae, tishianguno nikujo no lakhi shi akeu toi panongu ghí lakhi shi ape niye ke— 23Ino panongu lolo ani eno nono ilolo ani—tishi keu vechewo panoqo pelo kümtsü küqhakulu shilu peniye ke. Tishianguno ayeghilomi pelo nono ipuwu eno nono ikimiye ketoi panongu kimiye kepi ithi penie.
24“Apùo, ni ye nono khunoqo pesü itsü keno panoqo pelo ino khilehi ani keno tile igholo ape nishi ani eno ajekipi ithulu penishi ani, tiye nono ajuküvü itsü keu ke, kughengu nono ayeghi pulhosü miphi züu no ikimiye ke.
25“Achipiumikucho Papùo, ayeghilomi no omütha aghí namu, ino no ithi ani, eno panongu ye nono ipuwu kepi ithi anie. 26Ino panongu pelo oje ithivepe ae, eno ino tamono tishi anani, tishianguno nono kikimiye ighenguno akeu toi panongu lolo apenike, eno ni ampi ghí panongu lolo anani.”
ప్రస్తుతం ఎంపిక చేయబడింది:
John 17: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
