John 15
15
Atsaibo eno Alokaqo
1“Ni ye atsaibo kuchou ke, eno I Pù ye atsailukichiu ke. 2Pa no ilolo athi pithímo keu lokaqo kümtsü micheve cheni, eno aloka athi pithí akeqo kümtsü pelo alau kutomo pithílu penike ghenguno pa no kixiphe chenie. 3Ino nongu vilo pive keu tsà vechewo nongu ye mitheluvae. 4Igholo kimepe achelo kughengu ni ghí nongu gholo kimepe anike. Aloka ye pa likhi pa kutoshi athi pithílu chemoe; tiye atsaibo gholo kimepe aghí moayesa ke. Titoi nongu ghí igholo kimepemo ke thaqhülo ye athi pithí mülae.
5“Ni ye atsaibo eno nongu ye alokaqo ke. Nongu no igholo kimepe aye eno ino nongu gholo aye, nongu ye axathi kutomo pithí nani; Isümo kelo nongu ye kiumu shimlae. 6Nongu no igholo kimepemo aye, nongu ye aloka peve püzü thizümüive keu toi ke; aloka tipaqo ye kiche pesü ami lo vesüve no pitive cheni. 7Nongu no igholo kimepe aye eno itsaqo no nongu lolo aye, nongu no kiu-kiumu pulo keu khulo, eno nongu ghenguno tipau shitsü nani. 8Nongu no athi kutomo pithí keu hu no nongu ye ikhopemiqo kepi piyelu cheni eno hipau vechewo I Pù juküvü shitsü cheni ke.
9“Apù no ikimiye ketoi, ni ghí nongu kimiye ke. Itehi ye iw kikimiye gholo kimepe alo. 10Ino I Pù zakütsüqo pape no paw kikimiye gholo kimepe ketoi nongu no izakütsüqo pape aye nongu ye iw kikimiye gholo kimepe anani. 11Ino nongu vilo hi piakeu ye ilokiqi nongu lolo apenike eno nongu lokiqi kupukülailu peniye ke. 12Izakütsü ye hike: Ino nongu kimiye ketoi nongu lakhi no lakhi kimiye kilélo. 13Timi lakhi no paw shompamiqo ghenguno pa küxü tsüve keu kikimiye nguno akijeu kühae. 14Nongu no ino azah tsü keqo pape aye nongu ye iw shompamiqo ke. 15Ni ye nongu vilo aqemiqo ipi kuchemovae, kughengu aqemi lakhi ye pa mipeu kümlàqo ithi chemoe. Tishini ke züqhulo, ino nongu vilo shompamiqo ipi ku cheni, kughengu ino I Pù lau no shikalu keqo kümtsü nongu pelo ithivepe ake. 16Nongu no ikishelu ke kumoe, ikemu ino nongu kìshelu eno nongu pelo wu no axathi pithilu eno ighivemo no pithí pushu pe niye süküsü shilu ke eno tishi keu vechewo nongu no ije lono kiu-kiumu khu aye I Pù no nongu tsü nani. 17Izakütsü ye hike: Lakhi no lakhi kimiyelo.
Ayeghiqha no Akhopemiqo Mithi ke
18“Ayeghiqha no nongu mithi aye ayeghiqha ye imithi paghi kepi nongu mulo lo qhilo. 19Nongu no ayeghiqhaʼw shi aghí aye ayeghiqha ye paw toi nongu kimiye nani. Nongu ye ayeghiqhaʼw kumoe, ikemu ino ayeghiqha lau no nongu kishepheluvae. Tighenguno ayeghiqha no nongu mithi ke. 20Ino nongu vilo kiu pi keno kümsülulo: ‘Aqemi lakhi ye pa mipeu nguno akijeu kumoe.’#15:20 Jn 13:16 Panongu no ikijipüsa aye, panongu ye nongu ghí kijipüsa nani. Panongu no ikükütsü gholu aye, panongu ye nongu kükütsü ghí gholu nani. 21Ije ghenguno panongu no hitoi nongu kijipüsa nani, kughengu panongu ye khuu no ipuwu keno mütha ke. 22Ino ighino panongu vilo pimo ke aye panongu ye panongu xiné phumlani cheke; ikemu itehi ye panongu ye panongu xiné ghenguno ajeku kühavae. 23Imithi chekemi ye I Pù ghí mithi chenie. 24Khunomu shimo keu akümzapu kümlàqo ino panongu gholo shimo ke aye panongu ye küqüve keu xiné kühani cheke. Panongu ye ti ithuluve ake, tishi keghi panongu ye I Pù ghí eno ni ghí mithi cheni ke. 25Ikemu hiye panongu Yeza lo ishi yèpüa keu shikupu nikeu ghenguno ke: ‘Panongu no ajeku kühamu imithi ke.’#15:25 Leshe 35:19; Leshe 69:4
Aghungú Kimthe Kümlà
26“Kughou ino Apù lau no puwu keu Akukuphuu—Apù lau no ighi keu kuchou Ghungú—ighini keno pa no ishepe shi nani. 27Eno nongu ghí ishepe shimoayesa nani, kughengu nongu ye abothu lono igholo achea ke.”
ప్రస్తుతం ఎంపిక చేయబడింది:
John 15: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
