John 14
14
Jisü no Pa Khopemiqo Lokughuno tsü
1“Nongu mulo kütakihi kevilo. Nongu ye Alhou pülülo eno ishou ghí pülülo. 2I Pù ki lo ye achebo kutomo ani; tishi aghimo ke aye ni ye nongu vilo tile wu no nongu sala a-a kutò pe aghíni ipini che keshea? 3Eno ino wu no nongu sala a-a kutò pe qhitsü aye, ino khilehi acheni keno nongu ghí tilehi apenike ghenguno ni ye ideighi no nongu sasü wu nani. 4Nongu ye ino khilehi wucheni keno tipau kungo-a laghi ithi anie.”
Jisü ye Apù Lau Wuni keu Laghi
5Thomas no Jisü vilo pi, “Ampeu, ningu ye nono khila wucheni keno müthae, ike ningu ye kíshi no alaghi ithini kea?”
6Jisü no khochile, “Ni ye alaghi eno kuchou, eno aküxü ke. Ivechemo kelo ye timi khumu Apù lau ighi mülae. 7Nongu no kuchou no ni ithi aghí aye, nongu ye I Pù ghí ithi nani. Hinguno hilau ye nongu ye pa ithivea eno pa ithuluvae.”
8Philip no pi, “Ampeu, Apù ningu piyelo, tino ningu ghenguno lukümkha ke.”
9Jisü no khochile, “Philip, ino nongu gholo ado kushuwa ngo ighive kethiu ghí no ye ni mütha keshea? Khukhumu ni ithuluve keu ye Apù ithuluvae. No ye kíshi püzü, ‘Apù hu ningu piyelo,’ ipi ani kea? 10Ni ye Apù lolo ani eno Apù ye ilolo ani kepi no ye pülü chemo keshea? Ino nongu vilo pichekeqo tsà ye ilikhi iw kükagha lono pichemoe. Ikemu tiye Apù ilolo xü akeu hu no pa kümlà shi anike. 11Kughou ino ni ye Apù lolo ani eno Apù ye ilolo ani ipini keno ipülülo; tikumo aye akümlà shipe piye keqo vechewo mu kuchou kepi pülülo. 12Ino kuchou tsà nongu vilo pìní, khukhumu ishou pülü kemi ye ino shi chekeu kümlàqo shi nani, eno panongu ye hipaqo nguno akijeu kümlà ghí shi nani, kughengu ni ye Apù lau wucheni ke. 13Eno nongu no ije lono kiu-kiumu khu keu ino shitsü nani, tishi keu hu no Anu vechewo Apù jekipipu shipe niye ke. 14Nongu no ije lono kiu-kiumu khulu nani, eno ino tipau shitsü nani.
Jisü no Aghungú Kimthe Puwu nikeu Piqhitsü
15“Nongu no ikimiye cheni aye, izakütsüqo pelulo. 16Ino Apù vilo khu nani, eno pa no shikumtokütsüu#14:16 Momu alokughuno-kütsüu momu lapiyeu. kütau lakhi nongu kuphu penike eno nongu gholo pülhapuju apenike tsü nani— 17tiye kuchou Ghungú ke. Ayeghiqha ye pa ikhilumo nani, kughengu panongu ye pa ithulu chemo momu pa mütha ke. Ikemu nongu ye pa ithi ani, kughengu pa ye nongu gholo xüani eno nongu lolo ache nani. 18Niye mighimi toi nongu qhivemo nani; Ino nongu lau ighi nani. 19Kusho kumo lo ayeghiqha ye ni ithulu kithemove nani, ikemu nongu ye ni ithulu nani. Ino xü anike ghenguno nongu ghí xü nani. 20Tipau tsalà lo nongu no ni ye I Pù lolo ani, eno nongu ye ilolo ani eno ni ye nongu lolo ani kepi vethalu nani. 21Iyezaqo ikhilu eno pelu chekemiqo ye ikimiye cheni. Ikimiye chekemiqo ye I Pù no pa kimiye nani, eno ni ghí panoqo kimiye eno panongu lau ilikhi ipephe piye nani.”
22Ikelo Judas (Judas Iscariot kumo no kütami) no ishi pi, “Ampeu, ikemu no ye kushiye ayeghiqha lau no ampi piyemo püzü ningu lau likhi piye ani kea?”
23Jisü no khochile, “Ikimiye chekemiqo ye ikükütsü ikhilu nani. I Pù no panoqo kimiye nani, eno I Pù ikujo no panongu lau ighino panoqo gholo ngo nani. 24Ikimiyemo kemiqo ye ikükütsüqo papemo nani. Nongu no chilu akeu tsà hipaqo ye itsà kumoe; tipaqo ye I Pù khuu ipuwu keno paw ke.
25“Ino nongu gholo aphi lono hipaqo kümtsü pive ani. 26Ikemu Shikumtokütsüu, Aghungú Kimthe, khikhi Apù no ije lono puwu nani keno, pa no thowkha kümtsü nongu kütsü nani eno ino nongu vilo pive keu kümtsü pesü nongu ghutu nani. 27Alokiqi ino nongu gholo qhitsü ani; Ilokiqi ino nongu tsü ani. Ni ye ayeghiqha no nongu tsüke toi tsü amoe. Nongu mulo kütakihi kevilo eno müsà kevilo.
28“Nongu no ino hitoi pikeu chiluvae, ‘Ni ye wuchea eno ni ye nongu lau ideighi nani.’ Nongu no ikimiye cheghí aye nongu ye ino Apù lau wuche keu lo alovi nani kughengu Apù ye inguno akijeu ke. 29Hipau shimphi lono ino nongu vilo pivae, tishianguno kughou hipau shikupuni keno nongu pelo pülülu peniye ke. 30Niye nongu vilo kutomo pimae, kughengu ayeghi hipauu kükapuu cheni ke. Pa ye ishou aküka kiumu kühae, 31ikemu pa no ighi keu ye ayeghiqha pelo ino Apù kimiye chekeu eno I Pù no azakütsü itsü ketoi shikupulu keu ithi peniye ke.
“Shilo; ningu hile no wuvenie.
ప్రస్తుతం ఎంపిక చేయబడింది:
John 14: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
