John 13
13
Jisü no Pa Khopemiqo Pukhu Qhutsü
1Hechekulu ghulhu Tiqhitini shi niye akeu zülo Jisü ye ayeghi hipau qhive no Apù lau wuve nikeu do ighivea kepi ithi ae. Pa ye ayeghi lo paw shive keqo kimiye che kehu ashekha kutólo panoqo kimiye ke.
2Avela ghulhu shi akelo, tüghami no Simon nu Judas Iscariot pelo Jisü pesü thechu shive peniye kiteve. 3Jisü ye Apù no thime kümtsü pa küká qholo qhipüatsüa kepi ithia, eno pa ye Alhou lau no ighi eno Alhou lau idechile wucheni kepi ithi ae; 4ike pa no aghulhu-a lono ithu no paw ubephi xaqhive püzü aküghüsüpu phì pesü pa chita khapuluve. 5Tipathiu, pa no chithakhu lakhi lo azü lesü no pa khopemiqo pukhu qhutsü no pa chita lo khapu akeu aküghüsüpu phì pesü panongu pukhu isüve tsü.
6Pa no Simon Peter lau ighi, ikelo Peter no pa vilo ishi pi, “Ampeu, no ye ipukhu qhutsü niye ani keshea?”
7Jisü no khochile, “Ino itehi kiu shi ani keno no ye vethamla nani, ikemu nono kutou no vethalu nanie.”
8Peter no pi, “Moe, opelo khilemu ipukhu qhupemoe.”
Jisü no khochile, “Ino opukhu qhutsümo ke thaqhülo no ye iw shimla nani.”
9Simon Peter no khochile, “Ampeu, tishiaye ipukhu likhi kumo no i-u ngò ikütsü ghí qhutsülo.”
10Jisü no khochile, “Khunoqo no azü kuchhuvea keno panongu ye apukhu likhi qhuve kepue kughengu panongu phimpi kuchopu mithe anike. Eno kümtsü ye kumo kemu nongu ye mithe ani.” 11Kughengu pa ye khuu no pa pesü thechu shive niye ani keno ithi ake, eno tighenguno pa no kümtsü ye mithe anike kumoe ipi ke.
12Kughou pa no panongu pukhu qhutave keno, pa no paw ubephi uluve no pa-a lo idechile wo ngove. Pa no panongu vilo iniju, “Ino nongu ghenguno kiu shivetsü akeno nongu ye vethalu ani kema? 13Nongu no ivilo ‘Akükütsüu,’ eno ‘Ampeu,’ ipi ku cheni, eno tishi ku keu ye achipi, kughengu tino ni ke. 14Itehi ye ni, nongu Mipeu eno Kükütsüu, no nongu pukhu qhuvetsü ake, nongu ghí lakhi no lakhi pukhu qhutsü moayesae. 15Ino nongu ghenguno kiu shi keno nongu pelo tishi peniye nongu lau kichekipiye shive tsüae. 16Ino kuchou tsà nongu vilo pìní, aqemi lakhi ye pa mipeu nguno akijeu kumoe, momu aghinikishiu lakhi ye pa puwu keu nguno akijeu kumoe. 17Itehi nongu ye hipaqo ithive ake, nongu no hipaqo shi aye mügha nani.
Jisü no Pa Thechu Shini keu Ghili Pichho
18“Ni ye nongu kümtsü ghili piamoe; Ino kìsheluve kemiqo ye ino ithi ani. Ikemu hiye Kuchoyesü hipau shikupu niye ke: ‘Isasü asho kijechu keu hu no ighümi shivae.’#13:18 Leshe 41:9
19“Tishi miphi züu no ino nongu vilo itehi no pive ani, tishianguno kughou tipau shini keno Ni ye Ni kepi nongu no pülü nani. 20Ino kuchou tsà nongu vilo pìní, khukhumu ino puwu keu ikhilu keu ye ni ikhilu ani; eno khukhumu ni ikhilu keu ye ipuwu akeu ikhilu anie.”
21Hipau pive kethiu Jisü ye alokhümüive püzü hitoi asheshu, “Ino kuchou tsà nongu vilo pìní, nongu lakhi no ipesü thechu shive niye anie.”
22Pa khopemiqo ye panongu dolo khiu piani keno mütha kelau no lakhi no lakhi jua. 23Panongu dolo Jisü no kimiye chekeu akhopeu ye Jisü phivilo mungupe ae. 24Simon Peter no akhopemiqo vilo pa u kihi ghi pi, “Pa ye khuu piani keno pa vilo inijulo.”
25Jisü mungupe akeu akhopeu no Jisü vilo iniju, “Ampeu, tiye khuu kea?”
26Jisü no khochile, “Ino akhu lo asho lakhi pütsü no khuu tsüní keno timi tipau ke.” Tisheno pa no asho lakhi pütsü püzü Simon nu Judas Iscariot tsü. 27Judas no asho ikhiluve kemtsa Satan no pa lolo iloghive.
Ike Jisü no pa vilo pi, “Nono kiu shi niye ani keno mütazü shivelo.” 28Ikemu aghulhu shi akemi khunomu Jisü ye kushiye hipau tsà pesü pa vilo pi keno vethalumoe. 29Kughengu Judas no pisa jukütsü che kehu, khami no kümsü keu no Jisü ye pa vilo tiqhitini lo kiu avehupu shi nani momu kiuala pesü kumlhomiqo tsü nike qhülo piani küghashive ke. 30Judas ye asho luve kemtsa khalau ipeve. Tiye putho shiae.
Peter no Jisü Milive nikeu Pichho tsü
31Kughou Judas no wuve keno Jisü no pi, “Itehi ye Timi Nu jekipipu shivae eno pa vechewo Alhou jekipipu shivae. 32Tsalá pa vechewo Alhou jekipipu shive aye, Alhou no pa vechewo Anu jekipipu shitsü nani, eno ghuthukhavi lono pa jekipipu shitsü nani.
33“Inuliqo, ni ye ado kitila likhi nongu gholo ananie. Nongu no iphuju nani, eno ino Jewmiqo vilo pike toi, itehi ino nongu vilo piani; Ino khile wucheni keno, nongu ye ighi müla nanie.
34“Ino azakütsü kithé nongu tsü ani: Lakhi no lakhi kimiyelo. Ino nongu kimiye ketoi, nongu ghí lakhi no lakhi kimiye moayesae. 35Nongu no lakhi no lakhi kimiye kilé aye kümtsü no nongu ye ikhopemiqo kepi ithi nanie.”
36Simon Peter no pa vilo iniju, “Ampeu, no ye khila wucheni kea?”
Jisü no khochile, “Ino khila wucheni keno no ye itehi pape mülae, ikemu no ye kutou no papelu nanie.”
37Peter no pa vilo iniju, “Ampeu, ni ye kushiye itehi opape müla nani kea? Ino oghenguno iküxü tsünie.”
38Ikelo Jisü no khochile, “No ye kuchou no oküxü pesü ighenguno tsüve nani keshea? Ino kuchou tsà ovilo pìní, awudu no igha miphi züu, no ye ghuthu küthü imilive nani!
ప్రస్తుతం ఎంపిక చేయబడింది:
John 13: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
