John 12
12
Bethany lo Jisü Nukishe Keu
1Jisü ye Hechekulu ghulhu tonikeu atsala tsügho akelo pa no akìthí lono xüputhuve keu Lazarus no ngo chekeu-a Bethany lo ighi. 2Tilehi Jisü gihu ghi avela ghulhu lakhi kutò tsüe. Martha no panongu lamlua, eno Lazarus ye Jisü gholo kibepu lo mungu pesü akemiqo gholo ngoa. 3Ike Mary no lekitemo keu nard sübo lono mülà keu amekusho xokütsüngü abo chhitoi keu ikhilu; li no ti pesü Jisü pukhu lo lepuku tsü no li sà no pa pukhu isüve tsü. Ikelo axokütsüngü xo hu no aki kuchopu vechighive.
4Ikemu pa khopemiqo dolo itou pa thechu shive niye akeu Judas Iscariot no lachile ghi ishi pi, 5“Kushiye axokütsüngü hipau jeve püzü jelu keu pisa pesü kumlhomiqo tsüvemo kea? Tiye ampe lakhi jume qhemi ke.”#12:5 Greek tsà kiqi lo hiye dinarii 300 ipi ani. 6Pa no hi pikeu ye kumlhomi ghenguno alokümsü akeu ghenguno kumoe ikemu pa ye küpkami lakhi ke ghenguno ke; pa no pisabo kipeu kehu tile kiu sǘ keno pa no pa vehupu shiluve cheke.
7Jisü no khochile, “Li püna kevilo. Li no shi akeu hiye isükumo kuqho tsalà ghenguno axokütsüngü hipau müsape qhitsü anike. 8Athokhami ye alhokuthu nongu gholo ache nani,#12:8 Zaki 15:11 ikemu ni ye alhokuthu nongu gholo aní keu kumoe.”
9Tishi akelo Jewmi timi kutomo no Jisü ye tile akeu ithive no ighi. Panongu ye Jisü ghengu likhi no kumo püzü Jisü no akìthí lono xüputhuve keu Lazarus ghí ju niye ighike. 10Ike achinetomiqo no Lazarus ghí pìthíve niye aküpüghü shie, 11kughengu Lazarus ghenguno Jewmi kutomo Jisü shou pülüluve no pa lau wuve ke.
Jisü ye Akükau toi Jerusalem lo Ighi
12Tishiwo thoghiu timi kutomo tiqhitini ghenguno ighi akemiqo no Jisü ye Jerusalem lo cheni ipikeu chiluve. 13Panongu no amsabo lokaqo ikhilu no pa sasü kusho nike ishi ighasü wue,
“Hosanna!#12:13 Hebrew tsà lo Hosanna ye “Xalu” ke ikemu hiye sheqhe keu küdau no peitha wove ke.”
“Khuu no Ampeu je lono cheni keno pa ye akümghau ke!”#12:13 Leshe 118:25,26
“Israel kükau ye akümghau ke!”
14Jisü no khurha lhothe lakhi ithulu no tipau shou iqa, tiye Kuchoyesü lo ishi yèpüani ke:
15“Müsà kevilo, Zion Ngá;
julo, okükau ye khurhati lakhi
shou iqa no chenie.”#12:15 Zech 9:9
16Atüghi lo pa khopemiqo ye hipaqo lakhimu vethamla no ake. Jisü no ajuküvü shive kethiu likhi no hipaqo kümtsü pa ghili yèpüa keu eno pa lau shive keu kepi panongu no kümsüchilelu ke.
17Kughou pa no akumo lo Lazarus ku eno akìthí lono pa xüputhu keno tile pa gholo aqokitikhi akemiqo no tipau tsà pesü tamono veküpha ae. 18Timi kutomo no pa no amichipu kümlà hipau shikeu chilu keu ghenguno pa sasü kusho niye wu. 19Ikehu Phariseemiqo no lakhi no lakhi vilo ishi pi, “Julo, ningu ye hiye kiumu shimlavae. Ayeghiqha kuchopu no kíshi pa pape auvea keno julo.”
Jisü no Pa Kìthí Ghili Pichho
20Ike tiqhitini lo mülá niye iqho kemiqo dolo Greekmi khami ghí ae. 21Panongu no Bethsaida nó ghami Galilee lono ighi keu Philip lau qhüiniju keu lakhi pesü ighi. Panongu no qhüiniju ghi pi, “Akijeu, ningu ye Jisü ju nishi anie.” 22Philip no wu no Andrew vilo pi; eno Andrew ngò Philip pama no Jisü vilo pi.
23Ikelo Jisü no khochile, “Timi nu juküvüpu shini keu tüqhüdo ighivae. 24Ino kuchou tsà nongu vilo pìní, athì lothi lakhi ye ayeghi lo ikiqi ilo no thivemo ke thaqhülo tiye athì likhi athoshi acheni. Ikemu tipau no thive aye, tino athi kutomo pithí cheni. 25Khuno no pano küxü küpüni keno pühave nani, ikemu khuno no ayeghi hipau lo pano küxü küpümoni keno lhokta küxü ghenguno pekütsüluni ae. 26Iqe chekemi ye ipape moayesa; eno ino khile ani keno, iqemi ghí tile anani. Iqe chekemiqo ye I Pù no gihu nani.
27“Itehi ye imloküsa shivae, eno ni ye kiu pìní kea? ‘Apùo, asüchedo hipau lono ixalulo ipini keshea’? Moe, ni ye asüchedo hipau ghenguno ighike. 28Apùo, ojekipipu shipelo!”
Ikelo kungugha lono asütsa lakhi ighi, “Ijekipipu phephe-piyevae, eno itaghi ijekipipu pephe piye nanie.” 29Tile aqokitikhi akeqo no ti chilu no hiye tsütsüküsü ke ipi; kütamiqo no hiye kungumi no pa pütsa anie ipi.
30Jisü no pi, “Asütsa hipau ye nongu pelo alá shilu penike ghenguno thono ighenguno kumoe. 31Itehi ye ayeghiqha shou küghatha nikeu do shivae; eno itehi ye hipau yeghiqha kükapuu hapheve nani. 32Eno kughou isüqheveni keno, ino timi kümtsü ilau sünhe sasü ighive nani.” 33Jisü no hipau pikeu ye pa ye kiu ghola lono thive niye ani keno pi ake.
34Aqokitikhi no ishi pi ipeghi, “Ningu no Ayeza lono chilu keu ye Messiah ye pülhapuju acheuve nani ipie, tishiaye no ye kíshi no, ‘Timi nu ye süqheve moayesa nani,’ ipi ani kea? ‘Timi Nu’ ipi akeu hiye khuu kea?”
35Tisheno Jisü no panongu vilo pi, “Aküvü ye ado kitila ghengu likhi nongu gholo aniae. Àküzǘ no nongu theqhive miphi züu, aküvü ake lono alà chelo. Khunoqo no àküzǘ lo checheni keno panongu ye khila wucheni keno müthae. 36Nongu gholo aküvü aphi lono aküvü pülüluvelo, tishianguno nongu pelo aküvü nuli shilu peniye ke.” Kughou pa no atsa pitave keno, Jisü ye wuve püzü panongu lau no ithsüve.
Jewmiqo Dolo Küpülümi eno Pülümo Kemiqo
37Jisü no panongu nhekithe lono amichipu kümlà kutomo shi kethiu ghí panongu ye pa shou pülümoe. 38Ike hiye Isaiah tungkupuu tsà shikupu niye ke:
“Ampeu, khuu no ningu kükütsü tsà pülü tsü kea
eno khunoqo lau Ampeu küká pephe piye kea?”#12:38 Isa 53:1
39Hi ghenguno panongu ye pülü müla ke, kughengu Isaiah ghí ishi yèpüani:
40“Pa no panoqo nhethi kighicheve tsü,
eno panoqo mulo shikümkave tsüke,
ghenguno panongu nhethi nomu ithulu kepu shimo nani,
momu panongu mulo nomu vethamla nani,
momu xaideghimo nani—eno ino panongu shipivi tsü nani.”#12:40 Isa 60:10
41Isaiah ye Jisü juküvü ithulu keu ghenguno Jisü ghili hipau pike.
42Tishi namu tipau lo timi kutomo eno sakiphemiqo dolo ghí pa shou pülüluve. Ikemu panongu ye Phariseemiqo no panongu pesü synagog lono hapheve nikeu kümsà lau no panongu ye pekipheshi panongu küpülü shuphemoe; 43kughengu panongu ye Alhou no sheqhe keu nguno alau timi no sheqhe keu kimiye cheni ke.
44Tisheno Jisü no ighamuku pi, “Khukhumu ishou pülübeluve keu ye ishou likhi pülü anike kumoe, ikemu khuu ipuwu keno pa shou pülü ani. 45Timi khuu no ishou jupuku ani keno pa ye ipuwu akeu ithulu ani. 46Ipülü kemiqo pelo àküzǘ lo ngo pemo nike ghenguno ni ye aküvü lakhi shi püzü ayeghi lo ighivae.
47“Tsalá khuala no itsaqo chilu püzü tipaqo papemo namu ni ye timi tipau shou küghathabemo nani. Kughengu ni ye ayeghiqha shou küghathani ye ighike kumoe ikemu ayeghiqha xalu niye ighike. 48Khuu no imiliveni eno itsà ikhilumoni keno panongu ghenguno küghakütha ani; Ino pive keu tsà hu no ashekha tsalà lo panoqo shou küghathabe nani. 49Kughengu ni ye ilikhi ighoshi pichemoe, ikemu ino piakeu kümtsü Apù khuu ipuwu keno pa no ivilo pilo pi azah tsüve keu ke. 50Ino ithi akeu ye pa yeza no lhokta küxüpu lo sawu cheni. Ike ino kiu pi cheni keno tiye Apù no ivilo pilo pikeu ke.”
ప్రస్తుతం ఎంపిక చేయబడింది:
John 12: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
