Apostolmi 11
11
Peter no pa Kümlà Ghili pi
1Judea qha kümtsü lo Jewkumomi ghí Alhou tsà ikhiluvae ipikeu apostolmi ngò küpülümiqo no chilu. 2Ike kughou Peter no Jerusalem lo iqho keno Jewmi küpülümiqo no pa pipüsa 3no ishi pi, “No ye aphighüyiko ghamo kemi ki lo ilo no panongu gholo chu-sho anie.”
4Peter no panongu vilo abothu lono huthu no thowkha hitoi lhepe piye: 5“Ni ye Joppa phughi lo akighini shiae, eno züxo lono kungunhetsü lakhi ithulue. Kungugha lono apa kijè toi keu lakhi ako bidí kughujupiqi, eno tiye ino ngo akeu-a lo iqighie. 6Ino tipau lo jusü eno ayeghi lo achekeu apukhu bidí kupù lhoxü, tüghashi, itikiche lhoxü eno aghauqo ithulue. 7Tisheno asütsa lakhi no ivilo ishi pikeu ino chilue, ‘Peter, ithuve püzü hi heqhi no chulo.’
8“Ino ishi khochile, ‘Ampeu, khilemu tishimlae! Kitiqeve keu momu mithemo keu chuqu kiumu ikichí lo süju miphie.’
9“Kungugha lono asütsa hu no akiniù pi, ‘Alhou no shikimtheve keqo lakhimu kitiqevea ipi kevilo.’ 10Ghuthu aküthüu hitoi shie, eno tithiu ye kümtsü kungugha lo sünhe chile saikuve.
11“Tipa mütsa timi küthü Caesarea lono ilau puwu kemiqo no ino ngo akeu ki lo ighi. 12Ikelo Aghungú Kimthe no ivilo panongu gholo wuni keu künacho kevilo ipi. Joppami athiküzümi pano tsügho ghí igholo wue, eno ningu Cornelius ki lo ilo. 13Pa no kungumi lakhi no pa ki lo ighino pa vilo kíshi pi keno tipau pesü ningu vilo hitoi pi, ‘Joppa lo timi puwu no Simon khuu Peter ipi ku cheni keno pa kuwu pelo. 14Pa no akükütsü tsà lakhi pesü olau süghi nani eno tipau vechewo no eno okibolomi kümtsü xaluve nani.’
15“Kughou ino atsa pithuve keno, Aghungú Kimtheu hu no inahuu ningu shou ighi keu hutoi panoqo shou iqighie. 16Tile no ino Ampeu no pikeu tsà hipau kümsüchilelu: ‘John ye azü pesü baptiz shitsüe, ikemu nongu ye Aghungú Kimthe lono baptiz shitsü nani.’ 17Ike Alhou no aghò pesü ningu tsükeu toi Ampeu Jisü Khristo pülüluve kemiqo ghí tsü aye, ni ye khuu keno ino Alhou laghi hekha kulupu kea?”
18Kughou panongu no hi chilu keno, panongu ye kiumu lachilelu keu shimove no Alhou sheqhe ghi ishi pi, “Tishiaye, Alhou ye Jewkumomiqo kutólo ghí amlo pebide keu vechewo aküxüpu shilu penike puloza tsüvae.”
Antioch lo Akukuhou
19Stephen pìthíve keu lono kijipüsa thuve keu vechewo küpülümi apanaghave kemiqo no Phoenicia, Cyprus eno Antioch kutólo wu no Jewmiqo dolo likhi Alhou tsà pesü külha wove. 20Ikemu panongu gholo khami ye Cyprus eno Cyrene lono Antioch lo wu no Ampeu Jisü tsakiviu ghili pesü panongu vilo likhi kumo no Greekmiqo vilo ghí pithuve. 21Ampeu küká panongu gholo ae, eno timi kutomo no pülüluve püzü Ampeu lau xaideghiluve.
22Hipau sütsa Jerusalem lo akukuhou tove, ikehu panongu no Antioch lo Barnabas puwu. 23Kughou pa no Antioch tove püzü Alhouʼw küpükini no kiu mülave tsü akeno ithulu kelo, pa ye amlokiqi shive eno ithamo no amlo kümtsü pesü Ampeu ghokulu shi alo ipi panongu shikumto tsüe. 24Barnabas ye timi kivimi lakhi, aküpülü eno Aghungú Kimthe no chhitoi akemie, eno pa vechewo timi kutomo Ampeu lau ighiluve.
25Tisheno Barnabas ye Saul phu nike ghenguno Tarsus lo wuve, 26eno kughou pa no Saul phuluve keno pa sasü Antioch lo ighi. Ike Barnabas ngò Saul pama no ampe kupuju akukuhomi sasü kusholu eno timi kutomo kütsüe. Antioch lono atüghiu shi küpülümiqo pesü Khristomi ipi kulue.
27Hipa ghuloki lo Jerusalem lono tungkupumi khami Antioch lo iqighi. 28Ike panoqo gholo timi lakhi Agabus ipikeu no puthugho püzü Aghungú vechewo püqümiye kijè lakhi Rome yeghiqha kümtsü shou ighi niye ani ipi kütüghü tsüe. (Hiye Claudius yekipe ghuloki lono shikupuve.) 29Küpülümiqo no pütüta no shilu keu qhemi pesü Judea lo küghüna akemi athiküzümi eno achelimiqo kuphuni keu shi xathalu. 30Panongu no titoi shi no Barnabas ngò Saul pama gholo no akukuho lo layemiqo lau akukuphu tsüpuwue.
ప్రస్తుతం ఎంపిక చేయబడింది:
Apostolmi 11: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
