Apostolmi 10
10
Cornelius no Peter Ku
1Caesarea lo timi lakhi Cornelius ipikeu ache, pa ye Italymi Ghüshimi ipi chekeu lo aqhe shou zatsüu lakhi ke. 2Cornelius eno pa kibolomi kümtsü Alhou lau amlo kütsümi eno Alhou sümsa chekemi; pa ye kümsá no shishe kumlhomiqo kuphu che eno tamo no Alhou vilo inikhu ache. 3Ghulo lakhi avelau ayì küthü he ake ghuloki lo pa ye kungunhetsü lakhi ithulu. Pa no mütsümishei Alhouʼw kungumi lakhi ithulu, kungumi hu no pa lau ighino ishi pi, “Cornelius!”
4Cornelius no akümsa lau no thüghüi pa ju. Pa no, “Kiu kea, Ampeu?” ipi iniju.
Kungumi hu no khochile, “Okighini eno nono kümsá no kumlhomiqo kuphu chekeu hu ye Alhou gizülo kümsüma müla keu kümlagho shi ikughivae. 5No ye Joppa lo timi puwulo eno panongu pelo tilau wuno timi lakhi pa je Simon khuu Peter ipi cheni keno pa sasü ighi pelo. 6Pa ye Simon ashiyiko kümlàu ipikeu gholo ani, eno pa ki ye azüghi phivilo anike.”
7Kughou kungumi pa pütsa akeu no pa qhive no wuve keno, Cornelius no pa qemi kini eno pa ghinikishiu ghüshimi lakhi Alhou lau amlo kütsümi ishi kue. 8Pa no kiu shive keno thowkha panoqo vilo lhepe pive eno Joppa lo panongu puwuve.
Peterʼw Kungunhetsü
9Tishiwo thoghiu kughou puchou ghuloki lo panongu no kicheghüzü shisü wo Joppa phughi kupunúve keno, Peter ye akighini shi niye aki kütsüqa lo ikuve. 10Pa ye müzüthive eno kiuala chuni shiqhiyive, eno alibe kutò ake dolo no, pa ye piyeküsü lakhi ithulu. 11Atsütsǘ kijeve no kiukela lakhi apa kijè toi keu tipau ako bidí shi no ayeghi küdau kughujupiqi keu pa no ithulu. 12Tipau lo apukhu bidí kupù lhoxü, itikiche lhoxü eno aghau jeli kümtsü ae. 13Tisheno asütsa lakhi no pa vilo pi, “Peter, ithuve püzü hi heqhi no chulo.”
14Ikemu Peter no khochile, “Ampeu, tishimlae, ni ye khilemu mithemo keu momu kitiqeve keu chuqu chuju miphie.”
15Asütsa hu no ghuthu akiniù pa vilo pi: “Alhou no shikimtheve keqo lakhimu kitiqevea ipi kevilo.”
16Ghuthu aküthüu kutólo hitoi pi püzü, ako bidí akeu apa tipau hu ye kungugha lo paikhavi ikhipesü ikuve.
17Kughou Peter no kungunhetsü kiqi ye kiu kea ipi avehuizü akelo, Cornelius no timi puwu keqo hu ye Simon ki phuluve no khagho lo puthugho aghíe. 18Panongu no igha ku püzü, Simon Peter ipikeu anima pi ighijue.
19Peter ye ti kutólo kungunhetsü ghili kümsükutoju ae, tishi akelo Aghungú no pa vilo ishi pi, “Simon, timi küthü no ophu cheni. 20Ike ithulo eno aki aqhou iqilo. Panoqo gholo wuni keu künacho kevilo, kughengu ino panoqo puwu anike.”
21Ikehu Peter no iqighi püzü timiqo vilo pi, “Nongu no phu chekeu timi hu ni ke. Nongu ye kiu shi ighi ani kea?”
22Panongu no ishi khochile, “Ningu ye aqhe shou zatsüu Cornelius lau no ighi anie. Pa ye achipiumikuchomi, Alhou sümsa chekemi eno Jewmi kümtsü no pa gihu chekemi lakhi ke. Akimthe kungumi lakhi no pa vilo pikeu no opelo pa ki lo ighino nono kiu pi kepu ani keno pa no iní kepu shini ke ighino pilo ipi anie.” 23Ike Peter no inamiqo pa ki lo sasüe.
Peter no Cornelius Ki lo wu
Thoghiu Peter ye panongu gholo wuve, eno Joppa lono küpülümiqo khami ghí pa gholo wue. 24Tishiwo thoghiu pa ye Caesarea lo ighi. Cornelius ye pa bolomi ngò paw shompamiqo ku kütsü pesü panoqo huqhe aghí. 25Kughou Peter no aki lo iloghi keno Cornelius no pa sasü kusho eno gihu keu michi shi Peter pukhuphi lo itsaqi. 26Ikemu Peter no pa sünheputhu no pi, “Puthughovelo, ni ghí timi lakhi ke.”
27Peter no Cornelius pütsa ghi aki alou iloghi kelo timi kutomo kumqo aghí. 28Pa no timiqo vilo pi: “Nongu kümtsü no akivishi ithi anike ni yeza kiqi lo ye Jewmi lakhi ye Jewkumomi ki lo iloghi kepu kumo momu Jewkumomi gholo kutubo kepu kumoe. Ikemu ni ye timi khumu pesü mithemo momu kitiqevea ke ipi kepu kumoe pi Alhou no ipiyesüvae. 29Ike kughou iku ighi keno ni ye kiumu lachile keu shimo no ighivae. Nongu ye kiu ghenguno iku puwu keno ivilo pitsünima?”
30Cornelius no khochile: “Atsala küthü züu hipau tüqhüdo lo ni ye avelau ayì küthü kihe lo iki lo akighini shiae. Paikhavi timi lakhi no phuphui keu tiphimini pepu no izülo puthugho 31püzü ishi pi, ‘Cornelius, Alhou no okighini chiluvetsüa eno nono kumlhomi kuphu chekeu hu Alhou no kümsüluve tsüae. 32Joppa lo timi puwu püzü Simon khuu Peter ipi ku cheni keno pa kuwu pelo. Pa ye azüghi phivilo Simon ashiyiko kümlàu ipikeu ki lo inami shi ghi ngo anie.’ 33Ikehu ino akimighi shi okuwu peniye timi puwu ke, nono ighive keu no alovae. Itehi ningu kümtsü hilehi Alhou zülo ani, eno ningu ye Ampeu no ovilo ningu lau kiu pilo pi azah tsü keno chilu nike ngokhe anie.”
34Tile Peter no ishi pithu: “Ino itehi no vethalu akeu ye Alhou ye kuchou no timi kümtsü aphiphi shi peitha acheni 35eno shiye jeli kümtsü lono pa sümsa chekemi eno kiu no achipi keno tipau shi chekemi ikhilu cheni. 36Nongu ye Alhou no Israelmi lau akükütsü tsà tsükeu hu ithi ani, tiye Jisü Khristo khuu kümtsü shou Ampeu keno pa vechewo alokughuno tsakiviu piputo tsüke. 37Nongu ye Judea bocho lo kiu shive keno ithi ani, tiye John no Galilee lo baptiz ghili kütsü keu lono huthuke. 38Nongu ye Alhou no kíshi Nazareth nó ghami Jisü shou Aghungú Kimthe eno aküka vechewo nukishelu keno ithi ani. Jisü no akümlà kivi shisü iqho-iqi eno tüghami küká lo qhasü pe akemi kümtsü shipivi ke, kughengu Alhou no pa gholo ae.
39“Jewmi ghakhu ngò Jerusalem lo pa no mülà keu kümtsü ninguqo no thopimi ke. Panongu no kros lo pa yedapeqhi no pìthíve ke. 40Ikemu Alhou no aküthüni no akìthí lono pa xüputhuve no timi lau pephe piye ke. 41Timi kümtsü no pa ithumlae, ikemu Alhou no thopimi kishe pe qhiluve keqo ngo ningu khunoqo pa no akìthí lono xüthuve kethiu pa gholo chu eno sho keno tipaqo no ithulu ke. 42Pa no ningu vilo atsakiviu timiqo lau kütsü lo ipi azah tsü eno küxümi ngò kithimi shou küghaküthau shipe niye Alhou no süküsü shikeu hu ye pa ke ipi ashepe shilopi ke. 43Timi khuu no pa pülüni keno pa je vechewo axiné qhikütsü ithulu nani ipi Tungkupumi kümtsü no pa shepe shitsü.”
44Peter no atsa hipaqo piaphi lono akükütsü tsà inilu kemi kümtsü shou Aghungú Kimthe ikughive. 45Jewmi küpülümi Peter gholo ighi kemiqo ye Jewkumomiqo shou ghí Aghungú Kimthe lepuku tsü aghí keu ithulu no akichiqhive. 46Kughengu panongu mili lono pi aghí keu eno Alhou sheqhe aghí keu panongu no chilu ke.
Tile Peter no pi, 47“Kuchou no khunomu azü pesü panongu baptiz shini keu lo lakhave mülae. Ningu no Aghungú Kimthe ithulu ketoi panongu ghí ithuluvae.” 48Ike Peter no Ampeu Jisü Khristo je lono panoqo baptiz shilu penike azah tsü. Tithiu panongu no Peter vilo atsala hami panongu gholo ngo aghí tsülo pi qhüiniju.
ప్రస్తుతం ఎంపిక చేయబడింది:
Apostolmi 10: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
