Apostolmi 12
12
Peter no Akughuki lono Akümzapushi Pokajolu keu
1Hipau ghuloki lo Akükau Herod no kijipüsa nikeu kimiji lono akukuhomi khami küghaluve. 2Pa no John thiküzüu James kügha pesü akihizüta no ghiqhi pìthíve. 3Kughou hi shikeu lo Jewmiqo lopu shive keu pa no ithive keno, pa ye Peter ghí küghaluve niye kutove. Hipau shikeu ye Kholaqhi Sümo keu Sho pesü Aghulhu shi akeu ghuloki lono ke. 4Peter küghaluve kethiu Herod no pa pesü akughuki lo sǘve, eno ghüshimi bidi-di no amqo bidí shi no aghükheu shipe nike picheve. Herod ye Hechekulu ghulhu thiu timi aqha zülo no Peter shou atsa kügha nikeu shie.
5Ikehu Peter ye akughuki lo khathapüa, ikemu akukuhou no pa ghenguno pulopiniyi Alhou vilo inikhu ae.
6Herod no atsa kügha nike thoghiu Peter sawu niye shi ake jì lo Peter ye ghüshimi kini dolo ayikichhe kighi kini no tshü pesü züae, eno akughuki hukikha lo aghükhemi no khea. 7Paikhavi no Ampeuʼw kungumi lakhi ipeghi eno aküvü no achebo lo yepüvü pe ngove. Pa no Peter tukütha no pa küdaputhuve no ishi pi, “Mütazü, ithuvelo!” ikelo Peter u lono ayikichhe kighi iko ikiqive.
8Tisheno kungumi hu no pa vilo pi, “Ophiküzü eno apukhuqho pepuluvelo.” Eno Peter no tishive. Kungumi hu no itaghi ishi pi, “Ow ubephi uluve no ipapelo.” 9Peter no pa papesü akughuki khalau ipeghive, ikemu pa ye kungumi hu no kiu shi akeno tiye kuchou no tishi ani kepi kitilamu mütha no ae; pa ye kungunhetsü ithulu ani küghashi kümsü ae. 10Pama no ghükhemi no khe akeu khagho atüghiu ngò akiniù veche ipeve püzü aphughi küdau wuche keu ayì khagho lo ighie. Khagho hukikha hu no pa kutoshi no pama ghenguno khaqhi tsüe, eno pama no tipau lono ipeghive. Kughou pama no alaghila lakhi kupuju alà cheve keno, kungumi hu ye paikhavi no Peter qhive no wuve.
11Tipathiu Peter ye atsüveshe ipeghino pi, “Itehi ni ye mütsümishei no Ampeu no paw kungumi hapuwu püzü Herod no tsüqü pesü akeu lono eno Jewmi no shini kepi kümsü akeu kümtsü lono ixapheluve keu ino ithivae.”
12Kughou pa no ti ithive keno pa ye John, khuu Mark ipi ku cheni keno, pazá Mary ki lo wuve, tilehi timi kutomo kumqo no akighini shiae. 13Peter no khalau hukikha lo kukhu, eno aqeu lakhi je Rhoda ipikeu no khaqhi niye ipeghi. 14Kughou li no Peter tsapi michiluve keno, li ye shishe alovi kelau no ahukikhamu khaqhimo no pochilesü ilo no ishi igha pi, “Peter ye ahukikha lo anie!”
15Panongu no li vilo pi, “No ye izü anie.” Kughou li no kuchou kepi tsümomo piauve keno panongu no ishi pi, “Tiye paw kungumi keniae.”
16Ikemu Peter no ahukikha kukhu tamove, eno panongu no ahukikha khaqhi püzü pa ithulu kelo panongu ye shishe akichiqhive. 17Panongu pelo inaqhoive penike ghenguno Peter no pa u kütsǜ pesü tsü no Ampeu no kíshi akughuki lono pa saipeghi keno kishékulu shi lhepiye. Pa no “Hipau pesü James ngò athiküzümi eno achelimi kütamiqo vilo pilo,” ipive no pa ye a-a kütau lo cheve.
18Inaqhe shive kelo, ghüshimiqo dolo Peter ye kiu shivea kea ipi shishe mubumghu thuve. 19Herod no tsaqütsalei Peter phuju pe, ikemu pa phumlave kethiu pa no ghükhemiqo dolo iniju kideküdaju püzü panoqo pìthíve penike azah tsüve.
Herod Kìthí
Tipathiu Herod ye Judea lono Caesarea lo wuve püzü tilau ngove. 20Pa ye Tyremi ngò Sidonmiqo sasü kimpi ache; ikemu panongu ye amlo lakhi shive no hekütsü pe pa lau ighi. Panongu no akükau no lüthü shi pükhübelu chekeu Blastus mulo züluve kethiu, külakishi shini ke qhüinijue, kughengu panongu ye achuqupu ghenguno akükau ghakhu shou pükhü pe acheke.
21Kughupe püakeu tsalani, Herod no paw chijeboboi keu kükaphi pepu no pa kükalakhü lo iqa eno paw timiqo vilo asheshu. 22Timiqo no ighamuku, “Hiye timi toi kumo püzü alhou toi atsa pi anie” ipi. 23Zülile no, Ampeuʼw kungumi lakhi no Herod hekuluqhive, eno pa ye apithe no tsaqhi pìthíve, kughengu pa no akishé Alhou tsümo ke.
24Ikemu Alhou tsà ye tamo no külha eno thuwu wove.
Barnabas ngò Saul Pama Puwuve
25Barnabas ngò Saul pama ye kughou pama puwu keu kümlà shitave keno Jerusalem lono ideighive, eno pama gholo Mark ipi ku chekeu John ghí sasü ighive.
ప్రస్తుతం ఎంపిక చేయబడింది:
Apostolmi 12: STB
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.
