1 Abanya Korĩnto 9
9
Ehamũlĩ yʼomukwenda
1Sindi bwĩranda kwehĩ? Sindi mukwenda kwehĩ? Sinditalangira Yesu Omukama wetu kwehĩ? Ĩnywe Simuli kiminyikalo kyʼomũbĩrĩ wage busana nʼomukama wage kwehĩ? 2Nomo nyitane mukwenda oko bandi, nĩkwa ũkwʼĩnywe nyiri mukwenda; kusangwa ĩnywe muli kĩmĩnyĩsyo kyʼobukwenda bwage busana nʼomukama.
3Omugulu abandu bakanyĩbũlĩrĩraya, ngabasũbĩraya nyiti, 4Situwite ehamũlĩ yʼerirya nʼerĩpũlya kwehĩ? 5Situwite ehamũlĩ yʼeritwala haguma netu omũkalĩ oyuli Mukristo, ngʼabandi bakwenda ko bakakola, nʼabagala babo Mukama, na Petero kwehĩ? 6Kutse ye Barnaba nage, ĩtwebene, tutolere eriyikumbirira kwehĩ? 7Ko mũsĩrĩkanĩ ni wahi oyukayalwa nʼeriyiriha kwehĩ? Nindi yukahera eririma lyʼebĩnyũ iniatalya oko bĩgũma byalyo kwehĩ? Kutse nindi yũkalĩsaya esyombũlĩ isiendirya oko masabũ wasyo kwehĩ? 8Ngabũga emyatsi eyĩ ngʼeyage kwehĩ? Emigambo yo yʼĩkabũga emyatsi eyĩ. 9Kusangwa ĩsakĩre omo migambo ya Musa iti, Susyeboha obuno bwʼenume yʼende omugulu ĩkahũmba engano. Ni mwatsi wʼesyonde go Nyamuhanga akahula kwehĩ? 10Kutse sĩalĩbũga ebĩ busana netu kwehĩ? Inga, byasakawa busana netu, kusangwa Omũlĩmĩ akalima nʼomũgesĩ akagesa, ababiri bosĩ bali nʼamaha wʼerisangira embuto eyo. 11Ĩtwe twamahera emyatsi yʼekĩrĩmũ omo katĩkatĩ kenyũ, siritolere tukagesa omo katĩkatĩ kenyũ ebĩkatũwatĩkaya oko mubiri kwehĩ? 12Abandi bamabya nʼehamũlĩ yʼerĩwatĩkĩbwa batya, netu situwite ehamũlĩ eyo kwilababo kwehĩ?
Nĩkwa ĩtwe motutakola omo hamũlĩ eyĩ, kandi tũkayĩyĩnaya omo myatsi yosĩ, tũkasyakakĩrya Engulu Yowene ya Kristo. 13Mũnasĩ ngoko abakakola omũbĩrĩ omo hekalũ bakalya oko byalya byʼomo hekalũ, nʼabakahera amahere oko kiherero bakahabawa ukwʼebyo ebikaherawa. 14Ko biri bitya. Omukama abiritegeka ati, Abakatũla Engulu Yowene bangabana ebyangawatĩkyabo omo Ngulu Yowene.
15Nĩkwa sinditakola omo hamũlĩ yage omo myatsi eyĩ. Kandi sinditasaka emyatsi eyĩ nyiti nyibane erĩwatĩkĩbwa. Kitsiga inahola kwilaba eriyira eriyipipa lyage mo buyira. 16Kusangwa namatũla Engulu Yowene, singwite ekyʼeriyihalambira. Kusangwa ngwite ekĩkanyĩkũna. Kusangwa obũlĩge kwĩngye namatindatũla Engulu Yowene. 17Namakola omũbĩrĩ oyũ busana nʼeriyisogago neryo nangahembwa; nĩkwa namakola nʼerĩkũnwa, nĩ mũbĩrĩ ngahabawa. 18Neryo oluhembo lwage ni lwahi kwehĩ? Oluhembo lwage nĩ ndũndĩ yʼerĩtũla Engulu Yowene butsira eririhwa, isindikola omo hamũlĩ yage yʼesriyikumbirira omo Ngulu Yowene.
19Ingye indi bwĩranda, Sindi mukobe wʼomundu; nabiriyiyira mo mukobe wʼabandu bosĩ, inatoka eribana abandu bangi busana na Kristo. 20Neryo oko Bayũda ngabya ngʼOmũyũda, inatoka erisunga Abayũda. Ukwʼabo bakakwama Emigambo ngabya nga ngakwama Emigambo haguma nabo, nomo nyite omo mũlĩkĩ wʼEmigambo, inatoka erisunga abakakwama Emigambo. 21Neryo oko bandu bʼEbihanda abatekwama Emigambo, ngabya ngʼomundu wʼEbihanda inatoka erisunga abʼEbihanda. Nĩkwa sindigana Emigambo ya Nyamuhanga, kusangwa ngakwama Emigambo ya Kristo. 22Oko bandu bolo-bolo, monabya molomolo. Omo myatsi yosĩ, nabirirenga eribya hakũhĩ nʼabandu bʼemĩsĩndo yosĩ, inatoka omo syonzira syosĩ erisunga abandu ba kubo.
23Kandi ngakola emyatsi yosĩ busana nʼEngulu Yowene, inatoka erisangira omo mũyĩsa wayo. 24Mũnasĩ ngoko abandu bosĩ bakatibita omo matangwa, nĩkwa omuguma musa akahabawa oluhembo. Neryo mutibite imwatoka eritangirira, nʼeribana oluhembo. 25Neryo obuli mundu oyukakwama amatangwa, akayĩtegaya kutsibu omo myatsi yosĩ. Bakakola batya bati babane embĩta yʼebiti ebikalagala, nĩkwa ĩtwe tũkayĩtegaya busana nʼembĩta eyitelagala na kera. 26Neryo ngatibita ngʼoyo wasĩ eyo akaya; sĩndĩlabaya esyongũmbe syʼomo kyanya mo buyira. 27Nĩkwa ngagalaya omubiri wage, nʼerĩgondyago, neryo namabĩtũlago oko bandi, sinyibye ngʼoyukaganawa.
ప్రస్తుతం ఎంపిక చేయబడింది:
1 Abanya Korĩnto 9: KB80
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible in Kinandi © Bible Society of the Democratic Republic of Congo, and Bible Society of Uganda, 1980.