1 Abanya Korĩnto 10
10
Erihana busana nʼerisaba esyosanamu
1Balĩkyetu, nyanzĩre imwaminya, ngoko abotata-kulu betu abosĩ mobasondolwa nʼekĩtũ, nʼabosĩ mobasoka Engetsi yʼOmunyama. 2Kandi abosĩ mobabatĩsĩbwa omo kĩtũ nʼomo ngetsi ngʼendeko ya Musa. 3Nʼabosĩ mobalya akalyo kaguma kʼekĩrĩmũ. 4Kandi abosĩ mobapũlya ebyʼerĩpũlya ebyʼekĩrĩmũ, kusangwa babya bakapũlya oko lĩbwe eryʼekĩrĩmũ, eryakwamabo. Erĩbwe eryo lyabya Kristo. 5Nĩkwa Nyamuhanga mwatatsemesĩbwa nʼabangi ba kubo; kusangwa ebĩnda byabo mobyapanzapanzwa omo mbwarara.
6Neryo, emyatsi yosĩ eyĩ yabiribya ebĩmĩnyĩsyo busana netu, situbye tũkakwa esyongumbu syʼemyatsi mibi ngoko abo nabo bakwa esyongumbu esyo. 7Kandi Simubye abasabĩ bʼesyosanamu, ngoko abandi ba kubo babya, ngoko kĩsakĩre kiti. Abandu mobĩkala ahisi busana nʼerirya nʼerĩpũlya, kandi mobahangana nʼerisata. 8Kandi sĩtũsĩngĩre ngʼabandi ba kubo ko basĩngĩra, neryo mobahola omo kiro kiguma, abandu elfu makũmĩ abiri nʼĩsatu 23,000. 9Kutse situlenge oko Mukama ngoko abandi ba kubo ko bamulengako, neryo mobĩtwa nʼesyonzoka. 10Simuyitonge ngʼabandi ba kubo ko bayitonga, neryo mobĩtwa omũtĩngĩtya.
11Neryo emyatsi eyĩ moyahĩka kubo ngʼekĩmĩnyĩsyo busana nʼabandi bandu, kandi moyasakwa busana nʼeritukunga. Kusangwa twĩkere hakũhĩ nʼendũlĩ yʼomugulu ono.
12Neryo oyũkaganĩraya ati imene ndeke, ayĩtegaye akasyayĩhĩnda. 13Erirengwako eryo lĩkabahĩkako lye nʼeryo lyo lĩkanahĩka oko bandi bandu; Nyamuhanga sialiregula, siendĩsyalĩga mukalengwako kwilaba amaka wenyũ; nĩkwa omwʼirengwako eryo asyabaha amaka wʼerĩyĩyĩnĩa, nʼenzira yʼeribala.
14Neryo abanze betu, musage erisaba esyosanamu. 15Ngababwira ngʼabandu bʼamenge; neryo musohe ebyo ngabũga. 16Olũtehĩ olo lwʼomũyĩsa, tukaha ewasĩngya busana nalo. Olũtehĩ olo si lwʼerisangira omo musasi wa Kristo kwehĩ? Kandi obundu obo tũkatsũtsanga, si bwʼerisangira omo mubiri wa Kristo kwehĩ? 17Neryo kusangwa obundu ni buguma, ĩtwe nomo tune bangi, tuli mubiri muguma. Kusangwa ĩtwe bosĩ tukasangira obundu buguma.
18Mũlebaye ekihanda kya Ĩsraelĩ; abakalya oko mahere sibesangira omo mwatsi wʼekiherero kwehĩ? 19Nyĩtĩkĩ kwehĩ? Nyiti ebyo ebikaherawa oko sanamu ni kindu kwehĩ? Kutse esanamu nayo ni kindu kwehĩ? 20Iyihi; nĩkwa nyiti, ebyo abʼEbihanda bakahera, bakahererabyo esyombĩnga, butsira uku Nyamuhanga; kandi sĩnyanzĩre mukasangira esyombĩnga. 21Simwangatoka erĩpũlya oko lũtehĩ lwʼOmukama nʼoko lũtehĩ lwʼesyombĩnga; Simwangatoka erisangira ebyʼemesa yʼomukama nʼebyʼemesa yʼesyombĩnga. 22Tukasonda erĩhĩtanĩa Omukama kwehĩ? Ko tũmũlengĩrye maka kwehĩ?
Mukole ebyosĩ busana nʼeriha olukengerwa uku Nyamuhanga
23Emyatsi yosĩ yanganakolwa, nĩkwa emyatsi yosĩ sirigasakĩ. Emyatsi yosĩ yanganakolwa, nĩkwa emyatsi yosĩ sĩrĩhĩmba. 24Omundu sĩasondaye endũndĩ yiwe ĩyowene-wene, nĩkwa asondaye endũndĩ busana nʼomũlĩkyabo.
25Wanganalya ebyosĩ ebĩkagũlĩbawa omo katale kʼesĩswĩ, ĩsũlĩtabũlyakĩ busana nʼobunya-mutima bwawe. 26Kusangwa kĩsakĩre kiti, Ekihugo nʼebyosĩ ebiri mukyo ni byʼOmwami Mukulu.
27Omundu oyũtĩkĩrĩrye amakubirikira okwʼirya, nawe wamanza eriyayo, ulye ebyo bakahĩra oko mesa, ĩsũlĩtabũlyakĩ busana nʼobunya-mutima bwawe. 28Nĩkwa omundu amakubwira ati, Esĩswĩ esĩ syaherawa oko sanamu, sulyesyo busana nʼoyo wakũtũlĩrago, kandi busana nʼobunya-mutima. 29Nĩkwa sindiahula Obunya-mutima bwawe, nĩkwa obunya-mutima bwʼoyo wababwira.
Kusangwa busana nakĩ obwĩranda bwage bukatswerawa busana nʼobunya-mutima bwʼogundi mundu kwehĩ? 30Namalya akalyo iningaha ewasĩngya uku Nyamuhanga, busana nakĩ ngatongawa nabi busana nʼakalyo ako ngalya nʼewasĩngya kwehĩ?
31Neryo wamalya akalyo kutse ũkapũlya, kutse Wamakola ekĩndũkĩ, Ukole ebyosĩ busana nʼeriha olukengerwa uku Nyamuhanga. 32Simukole ekyangaleta omwaga oko Bayũda, kutse oko bʼEbihanda, kutse oko kanĩsa ya Nyamuhanga. 33Ngoko ĩngye ngalenga erĩtsemesya abandu bosĩ omo myatsi yosĩ, ĩsĩndĩsondaya endũndĩ yage, nĩkwa ngasondaya endũndĩ yʼabandu bangi, batoke erĩlamĩbwa.
ప్రస్తుతం ఎంపిక చేయబడింది:
1 Abanya Korĩnto 10: KB80
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible in Kinandi © Bible Society of the Democratic Republic of Congo, and Bible Society of Uganda, 1980.