1 Abanya Korĩnto 12
12
Olũsũnzo lwʼOmũlĩmũ Abũyĩrĩre
1Neryo busana nʼolũsũnzo lwʼOmũlĩmũ Abũyĩrĩre, balĩkyetu, nyanzĩre imwaminya ndeke emyatsi yalo. 2Mũnasĩ ngoko mugulu mwabya mukine abʼEbihanda momwakwama esyosanamu esĩtebũga, esyabatalaya ebiro byosĩ. 3Neryo ngabamĩnyĩsaya nyiti, sihali mundu oyuli nʼOmũlĩmũ wa Nyamuhanga, oyũkabũga ati, Yesu atakirawe; kandi sihali mundu oyukatoka erĩbũga ati, Yesu ni Mukama, atesondolawa nʼOmũlĩmũ Abũyĩrĩre.
4Nĩkwa hali mĩsĩndo-mĩsĩndo yʼolũsũnzo, nĩkwa nĩ Mũlĩmũ muguma oyukahalo. 5Kandi hali mĩsĩndo-mĩsĩndo yʼemĩbĩrĩ, nĩkwa bakakolera Omukama muguma. 6Neryo hali mĩsĩndo-mĩsĩndo yʼamenge wʼerikola, nĩkwa ni Nyamuhanga muguma oyukaha oko bandu bosĩ amenge wʼerikola emĩbĩrĩ yosĩ. 7Nĩkwa Omũlĩmũ Abũyĩrĩre akaha obuli mundu olũsũnzo busana nʼerĩwatĩkya abosĩ. 8Kusangwa Omũlĩmũ akaha omundu muguma erĩbũga ebĩnywa byʼamenge, kandi akaha ogundi erĩbũga ebĩnywa byʼeriminya. 9Kandi Omũlĩmũ muguma oyũ wakaha oko mundu muguma erĩkĩrĩrya, nʼoko gundi olũsũnzo lwʼerĩlamya esyondwala. 10Kandi Omũlĩmũ akaha ogundi mundu obũtokĩ bwʼerikola ebitikotiko; nʼoko gundi akaha olũsũnzo lwʼerĩbũga engulu ya Nyamuhanga; kandi oko gundi akaha amenge wʼerisombola omo lũsũnzo olũkalũa oko Mũlĩmũ nʼolũtelũa oko Mũlĩmũ. Nʼoko gundi, akamuha erĩbũga emĩsĩndo-mĩsĩndo yʼebĩnywa, nʼogundi akamuha erĩkũmbũla ebĩnywa ebyo. 11Nĩkwa nĩ Mũlĩmũ muguma oyukakola omo lũsũnzo olũ, iniakagabira oko buli mundu olũsũnzo, ngoko anzĩre.
Omubiri muguma owawite ebĩtsũko bingi
12Kusangwa ngoko mubiri ni muguma nĩkwa awite ebĩtsũko bingi; nʼebĩtsũko byosĩ byʼomubiri nomo byangabya bingi, ni mubiri muguma, neryo Kristo kwʼali atya. 13Kusangwa omo Mũlĩmũ muguma ĩtwe bosĩ twabĩrĩbatĩsĩbwa, nʼomo mubiri muguma, ĩtwe Bayũda kutse abʼEbihanda, kutse abakobe, kutse abʼobwĩranda; ĩtwe bosĩ twabirihabwa erĩpũlya oko Mũlĩmũ muguma.
14Kusangwa omubiri sĩ kĩtsũko kiguma, nĩkwa awite ebĩtsũko bingi. 15Ekisando kyamabũga kiti, ĩngye kusangwa Sindi byala, neryo Sindi wʼomubiri, ekyo sikyangaleka kikatindabya ekĩtsũko kyʼomubiri. 16Kandi okũtũ kwamabũga kuti, Kusangwa Sindi rĩso, neryo Sindi wʼoko mubiri, ekyo sikyangaleka okũtũ ikutabya kĩtsũko kyʼomubiri. 17Ko mubiri gosĩ amabya lĩso, angowa ati kwehĩ? Kandi kumbe omubiri gosĩ amabya kũtũ, angatoka erĩowa ekikumbo kyʼati kwehĩ? 18Nĩkwa lino Nyamuhanga abĩrĩhĩra ebĩtsũko omo mubiri, obuli kĩtsũko aho anzĩre. 19Kusangwa ebyosĩ byamabya ĩnĩ kĩtsũko kiguma, neryo omubiri angabya hayi kwehĩ 20Nĩkwa lino hali ebĩtsũko bingi, nʼomubiri muguma.
21Neryo erĩso siryangatoka eribwira ebyala liti, Ukangubira kyahi kwehĩ? Kandi omutwe siangatoka eribwira ebisando, ati, Ukangubira kyahi kwehĩ? 22Nĩkwa ni kwenene ebĩtsũko byʼomubiri ebikabya nga byolo-byolo kwilaba ebindi, nĩkwa bitolere kutsibu. 23Kandi ebĩtsũko byʼomubiri ebyo tũkaganĩraya nga sibyegasakĩ, byo tũkasĩkaya kwilaba ebindi. Kandi ebĩtsũko ebyo ebite bibuya byo tũkasũga. 24Nĩkwa ebĩtsũko bibuya ebyo Sibiri nʼobwaga bwʼerĩsũgwa. Nĩkwa Nyamuhanga mwahangika omubiri, ĩnĩakasĩkaya ekĩtsũko ekyo ekikabula erĩsĩkya. 25Nyamuhanga mwakola atya ati Sihabye erikatulana omo mubiri, nĩkwa ebĩtsũko bĩwatĩkanaye. 26Neryo ekĩtsũko kiguma kyamagalwa, ebĩtsũko byosĩ bikagalawa haguma nakyo; kandi ekĩtsũko kiguma kyamasĩkĩbwa, ebĩtsũko byosĩ bikatsema haguma nakyo.
27Neryo nenyũ muli mubiri wa Kristo, kandi ĩnywe bosĩ muli bĩtsũko byago. 28Neryo omo kanĩsa, Nyamuhanga abĩrĩhĩra ebyosĩ omo mianya yabyo; omo mwanya wʼerĩmbere mwahĩra abakwenda, nʼomo mwanya wʼakabiri mwahĩra abatũlĩ bʼomwatsi, nʼowʼakasatu, abakangĩrĩrya, neryo abakakola ebitiko-tiko, neryo olũsũnzo lwʼerĩlamya esyondwala, neryo abakawatĩkaya abandi, neryo abakasondola omũbĩrĩ, neryo abakabũga emĩsĩndo-mĩsĩndo yʼebĩnywa. 29Abosĩ ni bakwenda kwehĩ? Nʼabosĩ nĩ batũlĩ bʼomwatsi kwehĩ? Kandi abosĩ nĩ bakangĩrĩrya kwehĩ? Abosĩ sibawite obũtokĩ bwʼerikola ebito-tiko kwehĩ? 30Abosĩ bawite olũsũnzo lwʼerĩlamya esyondwala kwehĩ? Abosĩ bakabũga emĩsindomĩsĩndo yʼebĩnywa kwehĩ? Kandi abosĩ bakakũmbũla ebĩnywa ebyo kwehĩ? 31Nĩkwa mũkwe omũhwa wʼerĩsondya olũsũnzo olũlengĩre olundi.
Nĩkwa ĩngye ngabakangaya enzira nyibuya-buya kwʼaho.
ప్రస్తుతం ఎంపిక చేయబడింది:
1 Abanya Korĩnto 12: KB80
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible in Kinandi © Bible Society of the Democratic Republic of Congo, and Bible Society of Uganda, 1980.