1 Abanya Korĩnto 11
11
1Mũnyĩgerereraye ngoko nage ngagerereraya Kristo.
Eriswika omutwe omo kisomo
2Nĩkwa ngabapipa kusangwa mukanyibuka ebiro byosĩ, imukakwama ndeke erĩkangĩrĩrya, ngoko nabahalyo. 3Nĩkwa nyanzĩre imwaminya Kristo kwʼali mukulu wʼobuli mundu, nʼomulume ni mukulu wʼomũkalĩ wuwe, kandi Nyamuhanga ni mukulu wa Kristo. 4Nĩkwa omulume oyukaswika omutwe wuwe omugulu akasaba kutse erĩtũlago, akahemula omukulu wuwe, ye Kristo. 5Kandi obuli mũkalĩ oyuteswika omutwe wuwe omugulu akasaba kutse erĩtũlago, akahemula omutwe wuwe, yʼĩba wuwe; kusangwa alingene nʼomũkalĩ oyo wabĩrĩsĩswa oko mutwe. 6Kusangwa omũkalĩ amatindaswika omutwe wuwe, angatwa esyonzwiri siwe, nĩkwa lyamabya ĩnĩ ĩsonĩ busana nʼomũkalĩ erĩtwa esyonzwiri siwe kutse erĩsĩsa omutwe wuwe, aswike omutwe wuwe. 7Omulume siangaswika omutwe wuwe, kusangwa iye akakanganaya ekĩsosekanĩo nʼolukengerwa bya Nyamuhanga. Nĩkwa omũkalĩ akakanganaya olukengerwa lwʼomulume. 8Kusangwa omulume omugulu ahangikawa, mwatalũa omo mũkalĩ, nĩkwa omũkalĩ mwalũa omo mulume. 9Kandi omulume mwatahangikwa busana nʼomũkalĩ, nĩkwa omũkalĩ mwahangikwa busana nʼomulume. 10Neryo busana nʼabamalaĩka, omũkalĩ atolere iniabya nʼekĩmĩnyĩsyo kyʼehamũlĩ oko mutwe wuwe. 11Nĩkwa embere syʼOmukama, omũkalĩ siangabyaho butsira mulume, nʼomulume naye siangabyaho butsira mũkalĩ. 12Kusangwa ngoko mũkalĩ alũa oko mulume, litya nibya omulume akalũa oko mũkalĩ iniakabulawa atya; kandi emyatsi yosĩ ĩkalũa uku Nyamuhanga.
13Ĩnywe musohe, linatolere omũkalĩ iniasaba Nyamuhanga ĩsĩaswĩkĩre omutwe wuwe kwehĩ? 14Nĩkwa ebitula bĩkabakangĩrĩraya biti, omulume amabya nʼesyonzwiri nyiri-nyiri, sĩkamwĩta esĩsonĩ, 15nĩkwa esyonzwiri nyiri-nyiri ni bubuya busana nʼomũkalĩ. Kandi ahabawasyo busana nʼeriswika omutwe. 16Nĩkwa omundu amabya anzĩre erikuba obuhaka nyiti, ĩtwe kutse amakanĩsa wa Nyamuhanga, situwite eyindi mitsye.
Emesa yʼomukama
17Nĩkwa omugulu ngabahana lino, sindibapipa, kusangwa omugulu mũkahĩndana haguma sĩmwehĩndana ndeke, nĩkwa mũkahĩndana nabi. 18Kusangwa omugulu mũkahĩndana omo kanĩsa, namowa ko hali erigabana omo katĩkatĩ kenyũ; kandi ngalĩga nyiti ni kwenene hake. 19Kusangwa litolere ihabya erigabana omo katĩkatĩ kenyũ, neryo abakakwama ndeke ibaminyikala. 20Neryo omugulu mũkahĩndana haguma, sĩmũlĩhĩndana kwenene busana nʼerirya emesa yʼomukama. 21Kusangwa omugulu mukalya, obuli mundu akatsũka erirya ebyalya biwe; omuguma akawira, nʼogundi akakunda. 22Ko simuwite amanyũmba wenyũ aho mukalira nʼerĩpũlya kwehĩ? Kutse mukapona ekanĩsa ya Nyamuhanga, nʼerihemula abatawitekĩ kwehĩ? Nyibabwirekĩ kwehĩ? Nasyabapipa kwehĩ? Iyihi, sindibapipa omo mwatsi oyũ.
23Kusangwa ebyo Mukama anyĩkangĩrĩraya bye nʼebyo nabĩrĩbakangĩrĩrya nyiti, Omukama Yesu omo kiro ahoterawa mwĩmya obundu; 24neryo abere abiha ewasĩngya uku Nyamuhanga, mwatwabo, mwabũga ati, Obũ ni mubiri wage owali busana nenyũ. Mukole mutya busana nʼerinyibuka. 25Nʼenyũma wʼerirya mwĩmya olũtehĩ lwʼatya, ati, Olũtehĩ olũ ni ndagane nyihya-nyihya omo musasi wage; mukole mutya emigulu yosĩ mũkapũlaya kulo busana nʼerinyibuka. 26Kusangwa emigulu yosĩ mukalya obundu obũ nʼerĩpũlya oko lũtehĩ, mũkakanganaya oluholo lwʼOmukama, erĩhĩka aho asyasira.
Erĩhĩka oko mesa eritatolere
27Neryo omundu oyukalya oko bundu obo bwʼomukama kutse erĩpũlya oko lũtehĩ luwe omo mũsĩndo owatatolere, ĩnĩabĩrĩhalya oko mubiri nʼomusasi wʼOmukama. 28Nĩkwa omundu ayitswere, neryo alye oko bundu obo nʼerĩpũlya oko lũtehĩ. 29Kusangwa omundu amatindaminya ndeke omwatsi wʼomubiri wʼOmukama omugulu akalya nʼerĩpũlĩrya oko mesa eyo, akayiretera olubanza omugulu akalya nʼerĩpũlĩrya oko mesa eyo. 30Ekĩ kyalekĩre abangi omo katĩkatĩ kenyũ ibalwala nʼeribya bolo-bolo, nʼabandi babirihola. 31Nĩkwa kumbe twamayitswera sitwangabya omo lubanza lwa Nyamuhanga. 32Nĩkwa omugulu tukatswerawa, tukakungawa nʼomukama, ĩtũtaswahĩrwa oko lubanza lubi haguma nʼekihugo.
33Neryo balĩkyetu, omugulu mũkahĩndana eririra oko mesa yʼomukama, mulindirirane. 34Omundu amakwa enzala, alire eka wuwe, neryo ĩmũtaswahĩndana nʼeribana olubanza. Nʼeyindi myatsi nasyategekanĩayo ekiro nasyasa.
ప్రస్తుతం ఎంపిక చేయబడింది:
1 Abanya Korĩnto 11: KB80
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible in Kinandi © Bible Society of the Democratic Republic of Congo, and Bible Society of Uganda, 1980.