The MYANMAR STANDARD BIBLE (MYANMAR AUDIO EDITION)℗ is professionally recorded with a solemn tone and beautiful rhythm, expressing the original flavor of the MYANMAR STANDARD BIBLE©, allowing God's word to echo in the ears and hearts of the listener, providing a brand new experience for those who are hungry for God's word to experinece its power. The MYANMAR STANDARD BIBLE (MYANMAR AUDIO EDITION)℗ is produced and distributed by the Global Bible Initiative.

MYANMAR STANDARD BIBLE (MYANMAR AUDIO EDITION)℗
Copyright ℗ 2024 by Global Bible Initiative

မြန်​မာ့​စံ​မီ​သမ္မာ​ကျမ်း

MYANMAR STANDARD BIBLE©
Copyright © 2012, 2014, 2017, 2021 by Global Bible Initiative

ဥပုသ်နေ့​လွန်​ပြီးနောက် ရက်သတ္တပတ်​၏​ပထမ​နေ့​၊ အရုဏ်တက်​ချိန်​၌ မာဂဒလ​မြို့သူ​မာရိ​နှင့် အခြား​သော​မာရိ​သည် သင်္ချိုင်း​တော်​ကို​သွား​ကြည့်​ကြ​၏။
ထိုစဉ် အလွန်​ပြင်းထန်​သော ငလျင်​လှုပ်​လေ​၏။ အကြောင်းမူကား ထာဝရ​ဘုရား​၏​ကောင်းကင်တမန်​သည် ကောင်းကင်​မှ​ဆင်း​လာ​၍ ကျောက်တုံး​ကို​လှိမ့်ဖယ်​ကာ ၎င်း​အပေါ်၌ ထိုင်​လေ​၏။ သူ​၏​အဆင်း​သဏ္ဌာန်​သည် လျှပ်စီးလက်​သကဲ့သို့​ဖြစ်​ပြီး သူ​၏​အဝတ်​သည် နှင်းပွင့်​ကဲ့သို့​ဖြူ​၏။ အစောင့်​တို့​သည် ကောင်းကင်တမန်​ကို​ကြောက်ရွံ့​သဖြင့် တုန်လှုပ်​၍ လူသေ​ကဲ့သို့​ဖြစ်​သွား​ကြ​၏။
ထိုအခါ ကောင်းကင်တမန်​က အမျိုးသမီး​တို့​အား “ကြောက်ရွံ့​ခြင်း​မ​ရှိ​ကြ​နှင့်။ သင်​တို့​သည် လက်ဝါးကပ်တိုင်​ပေါ်​၌​တင်​ခြင်း​ခံရ​သော​ယေရှု​ကို ရှာ​နေ​ကြ​သည်​ကို ငါ​သိ​၏။ ကိုယ်တော်​သည် ဤ​နေရာ​၌​မ​ရှိ။ အကြောင်းမူကား မိန့်​တော်မူ​ခဲ့​သည့်​အတိုင်း ထမြောက်​တော်မူ​ပြီ။ ကိုယ်တော်​လျောင်း​တော်မူ​ခဲ့​သည့်​နေရာ​ကို လာ​ကြည့်​ကြ​လော့။ ထို့နောက် အလျင်အမြန်​သွား​၍ တပည့်​တော်​တို့​အား ‘ကိုယ်တော်​သည် သေ​သော​သူ​တို့​ထဲမှ ထမြောက်​တော်မူ​ပြီ။ ကြည့်ရှု​လော့။ ဂါလိလဲ​နယ်​သို့ သင်​တို့​ထက်​အလျင်​ဦးစွာ​ကြွ​နှင့်​တော်မူ​ပြီ။ သင်​တို့​သည် ထို​အရပ်​၌ ကိုယ်တော်​ကို​တွေ့မြင်​ရ​ကြ​လိမ့်မည်’​ဟူ၍ ပြောကြား​ကြ​လော့။ သင်​တို့​အား ယခု ငါ​ပြော​ပြီ”​ဟု မြွက်ဆို​လေ​၏။
အမျိုးသမီး​တို့​သည် ကြောက်ရွံ့​ကြ​သော်လည်း အလွန်​ဝမ်းမြောက်​လျက် သင်္ချိုင်း​တော်​မှ အလျင်အမြန်​ထွက်သွား​ကြ​ကာ တပည့်​တော်​တို့​အား ပြောပြ​ရန် ပြေး​သွား​ကြ​၏။ ထိုအခါ ယေရှု​သည် သူ​တို့​နှင့်​တွေ့ဆုံ​လျက်“မင်္ဂလာ​ပါ”​ဟု မိန့်​တော်မူ​၏။ သူ​တို့​သည် ချဉ်းကပ်​၍ ကိုယ်တော်​၏​ခြေ​တော်​ကို ဖက်​ထား​ကာ ကိုယ်တော်​ကို​ရှိခိုး​ကြ​၏။ ထို့နောက် ယေရှု​က“ကြောက်ရွံ့​ခြင်း​မ​ရှိ​ကြ​နှင့်။ သွား​၍ ငါ​၏​ညီအစ်ကို​တို့​အား ဂါလိလဲ​နယ်​သို့​သွား​ရန် ပြောကြား​ကြ​လော့။ သူ​တို့​သည် ထို​နေရာ​၌ ငါ့​ကို​တွေ့မြင်​ရ​ကြ​လိမ့်မည်”​ဟု မိန့်​တော်မူ​၏။

ထို​အမျိုးသမီး​တို့​သွား​ကြ​စဉ်​တွင် အစောင့်​တပ်သား​အချို့​တို့​သည်​လည်း မြို့​ထဲသို့​လာ​၍ ဖြစ်ပျက်​ခဲ့​သမျှ​တို့​ကို ယဇ်ပုရောဟိတ်​အကြီးအကဲ​များ​ထံ သတင်းပို့​ကြ​၏။ ထိုအခါ ယဇ်ပုရောဟိတ်​အကြီးအကဲ​တို့​သည် သက်ကြီးဝါကြီး​တို့​နှင့်အတူ​စုဝေး​၍ တိုင်ပင်​ဆွေးနွေး​ကြ​ပြီးမှ စစ်သား​တို့​အား ငွေ​အမြောက်အမြား​ပေး​လျက် “ ‘ည​အချိန် ငါ​တို့​အိပ်ပျော်​နေ​စဉ် သူ​၏​တပည့်​တို့​သည် လာ​၍ အလောင်း​ကို​ခိုး​သွား​ကြ​သည်’​ဟု ပြော​ကြ​လော့။ ဤ​သတင်း​သည် ဘုရင်ခံ​၏​နား​သို့​ပေါက်ကြား​ခဲ့​လျှင် သူ့​ကို ငါ​တို့​ဖျောင်းဖျ​၍ သင်​တို့​၌​စိုးရိမ်​စရာ​မ​ရှိ​စေရန် ဆောင်ရွက်​ပေး​မည်”​ဟု ဆို​ကြ​၏။ ထိုအခါ စစ်သား​တို့​သည် ငွေ​ကို​ယူ​၍ သူ​တို့​အား သင်ပေး​ထား​သည့်​အတိုင်း​ပြု​ကြ​၏။ ဤသို့ဖြင့် ထို​သတင်း​သည် ဂျူး​လူမျိုး​တို့​ကြား​တွင် ယနေ့​တိုင်အောင်​ပျံ့နှံ့​လျက်​ရှိ​၏။

ထို့နောက် တစ်ဆယ့်တစ်​ပါး​သော​တပည့်​တော်​တို့​သည် ဂါလိလဲ​နယ်​သို့​သွား​၍ သူ​တို့​အား ယေရှု​မှာကြား​ထား​တော်မူ​သော​တောင်​ပေါ်သို့ တက်​ကြ​ပြီး ကိုယ်တော်​ကို​တွေ့မြင်​၍ ရှိခိုး​ကြ​၏။ သို့သော် အချို့​တို့​သည် သံသယ​ဖြစ်​ကြ​၏။ ထိုအခါ ယေရှု​သည် သူ​တို့​ထံသို့​ချဉ်းကပ်​၍“ကောင်းကင်​နှင့်​မြေကြီး​ပေါ်၌ ရှိသမျှ​သော​အခွင့်​အာဏာ​တို့​ကို ငါ့​ထံ​ပေးအပ်​တော်မူ​ပြီ။ ထို့ကြောင့် သင်​တို့​သည်​သွား​၍ လူမျိုး​တကာ​တို့​ကို ငါ့​တပည့်​ဖြစ်​စေ​လျက် ခမည်းတော်၊ သား​တော်၊ သန့်ရှင်း​သော​ဝိညာဉ်​တော်​၏​နာမ​၌ သူ​တို့​ကို​ဗတ္တိဇံ​ပေး​ကြ​လော့။ သင်​တို့​အား ငါ​ပညတ်​ထား​သမျှ​သော​အရာ​အားလုံး​တို့​ကို​စောင့်ထိန်း​ရန် သူ​တို့​ကို သွန်သင်​ကြ​လော့။ ငါ​သည်​လည်း ကပ်ကမ္ဘာ​ကုန်ဆုံး​သည့်​တိုင်အောင် သင်​တို့​နှင့်အတူ အစဉ်မပြတ်​ရှိ​၏”​ဟု မိန့်​တော်မူ​၏။

Sikiliza ရှင်မဿဲခရစ်ဝင် 28