Vama ndum mbeina 21

Akulo d’a awilid’a kandaga d’a awilid’a

1An we akulo d’a awilid’a kandaga d’a awilid’a, kayam akulo d’a adjeud’a kandaga d’a adjeud’a a kal wa woyo, alum ma ngolâ mi nga d’uo d’a. 2An we azì ma ngolâ hAlonina, ni Jerusalem mba awili d’a tcholï akulo gen Alonid’a, ti tchugï aset kä, ti min tat d’igi a min gor weid’a á gat avo mi ndjuvut na. 3An hum del la ngola ti tcholï akulo ata yima zlam mba amula ti dala: Ki tchetchemba, yima kaka hAlonina mi nga aduk suma, mba mi kak ki sed’eziya, azi mba mbut sum mama. Alona tamba mba mi kak ki sed’eziya, mam mba arî Alo mazina. 4Mba mi sed’ezi simina irazi woi pet. Matna mba tchazi d’i, azi mba yor tazi d’oze a tchi tchi ma hohoud’a d’i, ta d’a ted’a nga d’uo mi, kayam ahle suma adjeuna pet a kal wa woyo.

5Mam ma nga kaka yam zlamba amulina mi dan ala: Ki tchetchemba, an le wa ahlena pet awilid’a. Mi dan kua ala: Ang b’ir ahle ndazina kur mbaktumba, kayam zla manda ni zla d’a gagazi d’a ndak ang tin hurung kata. 6Mi dan kua ala: An le wa da’. An ni Alfa, an ni Omega, an nAd’u tinda, an ni Yam mba dabid’a mi. Sama vunam sona, an mba ni hum mbiyo ma lau ma arina á tched’a hawa. 7Suma a mba kus ayînina, an mba ni hazi he d’a hawad’a, an mba narî Alo mazina, azi mba mbut grona. 8Wani suma mandarâ ki suma bei he gagazid’ina ki suma a le sun nda ndjendjed’ina ki suma tchi matna ki suma mizeuna ki suma ve kumana ki suma kud’or fileina ki suma ka zlad’a pet, yi mazi ma kaka ni kur apo d’a aku d’a bibiliu d’a ngal ki sufred’id’a, nala ni mat ma mbàna.

Jerusalem mba awilid’a

9Bugola, ma dingâ tu aduk malaika suma kid’iziya suma a nga ki angulei suma kid’iziya suma a nga oîd’a ki tugud’ei d’a tcho d’a kid’iziya d’a dabid’a abozina, mi mba, mi dan ala: Ang mbeya! An mba ni tagang atcha d’a tela hi Gor timinid’a. 10Muzu’â hAlonina mi vanu, malaikana mi i ki sed’en akulo yam ahina d’a fiyak ka ked’iwurenga. Mi tagan azì ma ngol ma Alona mi tinim iram vama, ni Jerusalem mba tcholï akulo gen Alona d’a tchugï aset kä d’a. 11Subura hAlonid’a ti nga d’i wile kua. Ti nga d’i ngal wiwilik d’igi ahina d’a guzut kal teglesa na, d’igi ahina d’a jaspe d’a ngal wiwilik d’igi kristala na d’a na mi. 12Ti nga nguid’a ki gulumun ma ngol ma fiya’â, vunam dogo yam mbà; malaikana dogo yam mbà a nga ngomom vunamu. Mi nga b’ira avunamu, simina handjaf Israel ma dogo yam mbàna mi nga kua, 13hindi abo ma yorogona, hindi abo ma norâ, hindi abo ma sutna, hindi abo ma fladegena mi. 14Gulumuna hi azì mámina a gum ad’umî kahinad’a dogo yam mbà. A b’ir simina hi suma a sunuzi suma dogo yam mbàna hi Gor timinina atad’u.

15Malaika ma nga mi dan zlad’ina, mi nga kakei d’a lor ra nga ahlena abom á nga azì ma ngol máma ki vun gulumun máma. 16Azì ma ngol máma kengêmi fid’i, fiyagam ki bubuwam nabo tat tu. Malaikana mi ngam fiyagam kakei mamba, kilometred’a dudubud’a mbà yam kikis mbà mi. Bubuwam ki fiyagam mba akulod’a nabo tazi tu mi. 17Malaikana mi nga gulumun máma, fiyagam mba akulod’a ni metred’a dok karagaya yam vahl, ndak yam ngad’a hi sanid’a. Ni hina ba, mi nga ki gulumuna. 18Gulumun máma a minimî ki jasped’a, a min azì máma tamba ni ki lor ra ngal tchitchiling d’igi kotroma na d’a. 19A gad’u gulumuna hazì ma ngol mámina, a minim djifâ ni kahina d’a guzut kal teglesa teteng. Ta avoka ni jasped’a, ta mbàd’a ni safira, ta hindid’a ni agata, ta fid’id’a ni emerota, 20ta vahla ni onisa, ta karagayad’a ni sarduwanda, ta kid’iziyad’a ni krisolita, ta klavandid’a ni berila, ta zlengîd’a ni topasa, ta dogod’a ni krisoprasa, ta dogo yam tud’a ni turkowisa, ta dogo yam mbàd’a ni ametisted’a. 21Vunazi ma dogo yam mbàna, mi nga ki hed’euna dogo yam mbà. Vun ma lara pî mi nga ki hed’eu ma ngal tchitchilingâ. Ir palumba hazì mámid’a ni ki lor ra ngal tchitchiling d’igi kotroma na d’a mi.

22An we nga gong nga kud’ora hAlonid’a kur azì máma d’i, kayam Salad’a Alo ma ad’engêm kal petna azi ki Gor timina a ni gong mamba. 23Azì máma nga mi min afata d’oze tilâ á b’o kurum mbi, kayam subura hAlonid’a nga d’i b’o kurumu, Gor timina ni lalam mamba mi. 24Suma yam andagad’ina a mba tit kur b’o mamba, amulei suma yam andagad’ina a mba mba ki ndjondjoî mazid’a kurumu. 25Vun azì máma a mba dugum mbi, kayam andjeged’a nga d’i. 26Azi mba mba ki subura ki ngola handjaf sumid’a kurumu. 27Wani vama ndjendjed’a d’oze sama le sun nda ndjendjed’a d’oze ma ka zlad’a, mba mi kal kur azì máma d’i, wani ni suma a b’irizi simiyêzi kur mbaktum mba arid’a hi Gor timinid’a hol.

Nu markerat:

Vama ndum mbeina 21: BA

Märk

Kopiera

Jämför

Dela