Hechos 9
9
Jena ruwimela alué Sauli 'ma a'réligo alué resiti 'nátili
1Alué Sauli we'ká rawé eyénale 'we ayoga me'lináliga alué Esukristo oyérame. 'Lige alé 'mi simile napu asale alué wa'lula balé, 2'lige tánale bilé apeli osirúgime lisensia taga ma'chí buinániliga alué ralámuli napu oyérame nile alué nuebo bowé (Esukristo oyérame) napu'lige mochílige alé we'ká u'kuchí re'obachi napu «sinagoga» anilime nile alé wa'lú we'ká riógichi Ramáskochi. Ma'chí buinánile alué 'ma suwábaga riótiri 'lige umugítiri. 'Lige abiena 'la lisensia tánale alué ralámuli Esukristo oyérame karénate bulugá o'towá alé Rusaleni. 'Lige alué apeli newísiga, pe yati simile alué rió alé Ramasko. 3'Lige amulí sébachi alé wa'lú we'ká riógichi 'lige ra'ósale alé 'pákana rewagáchika. 'Lige alué rió 'we rasóleke'é. 4'Lige 'ma wijchí bo'íbale. 'Lige alé bo'igá akele bilé ra'íchili. Anile alué ra'íchili:
―Sauli, Sauli chonigá sairúgame niraga ajtípiché mueka ne'chí 'yuga ―anile alué ra'íchili.
5―¿Chieri ju mué Wa'lula sikaniá? ―rukele alué Sauli.
―Neka pe Esusi júke'é, pe aba alué ju ne napu mué 'yuga ayome ju. 6Jípeko ilísiwa simibóká alé 'mi wa'lú we'ká riógichi. Alé buwéwaká, ne julámala bilé rió alemi napurigá ruyémala chu'símiliká mué ―alarigá anile alué ra'íchili.
7Sauli gompaniérola, alué ralámuli abiena akele alué ra'íchali 'lige tabilé 'wesi etele. 'Lige 'we majaga mochile. 8'Lige ku asísile alué rió Sauli. 'Lige rekó e'nene tabilé ma'chílile alué rió. 'Lige alué gompaniérolaka cha'pile sekala. 'Lige sekachí cha'pigá o'tole alé 'mi wa'lú we'ká riógachi Ramasko. 9'Lige bakiá rawé asale alué Sauli tabilé ma'chíliga, 'lige aminami tabilé go'gá ajtile go'ame, 'lige aminami tabilé ba'wítiri bajiga.
10'Lige asale bilé rió alé we'ká riógachi Ramasko anilichi, Ananíasi anilime rió. 'Lige Esukristo oyérame nile alué rió Ananíasi. 'Lige Esukristo etérole bo'né alué rió. 'Lige alué Esukristo anele alué Ananíasi:
―¡Ananíasi!
'Lige alué Ananíasi anele:
―Tachíribá, mué Wa'lula. Jena ajtíke'é neka.
11'Lige alué Wa'lula anele alué rió Ananíasi:
―Simibóaká alé 'mi galírale alé bowé Wajchígame anilime bo'ígichi Jurasi bejtélachi. 'Lige alé rukéboká alué rió alé Társochi ochérigame rió 'ya bajchá rawé napu Sauli anilime rió ju. Jipe ne'chí 'yuga ra'icha ajtí 'lige aminami e'kali tana ajtí ne'chí. 12Ne 'ma anéturu Sauli mué Ananíasi simélikó alé napu ajtí alué Sauli napurigá nochámala mué alué rió napurigá 'la ku ma'chílimala alué Sauli busila ―alarigá anile alué Esukristo.
13'Lige anele alué Ananíasi:
―Mué Wa'lula, we'ká ralámuli aní alué rió Sauli 'we cha 'sime rió ko. Tabilé 'la nirame karáché alué mué oyérame, 'ma me'linálime karáché alué mué oyérame alé Rusaleni mochígame. 14Jípeko abiénachigó lisensia nígame karáché napurigá cha'pimela alué mué oyérame jemi Ramáskochi mochígame. Alué e'wélala wa'lú re'obachi nulame, alué lisensia 'yale napurigá cha'pimela alué napu nejkúrali tánime ju mué Esukristo ―anele alué Ananíasi.
'Lige tabilé siminálile alué rió Ananíasi napu asale alué Sauli. 'We majale alué rió alué Sauli.
15'Lige anele Esukristo:
―Yati simibóaguru tase che anigá, e'wáwagurú napurigá nulá ne. Aka ne 'ma owítuba alué rió, jipe 'ma ne'chí oyérame júturu alué rió Sauli. Ne julámala alué rió Sauli alé 'mimi napu tabilé ralámuli jurío mochí napurigá ruwimela alué rió ne nila ra'íchali, alé napu e'wélala gobierno mochí abiénachigó, alé napu mochí alué uché jaré ralámuli israelita abiénachigó. 16'Lige 'we resí níliga einámala alué rió alemi, 'we najtepámala alué rió 'we cha nokame ralámuli napu'lige ne nila ra'íchali ruigá eyénachi ―anile Esukristo.
Alarigá ruyele alué Esukristo alué Ananíasi.
17'Lige simile alué Ananíasi alé galírale napu asale alué Sauli. 'Lige alé galírale sébaga alué Ananíasi alé pachá bajkile 'lige nochale alué Sauli. 'Lige anele:
―Mué Sauli napu Esukristo oyérame ju napurigá ne, alué Wa'lula Esusi, alué napu ra'íchale mué 'yuga alé boichimi, jula ne'chí napurigá 'yóomala ne mué napurigá ku 'la ma'chílimala mué busila. 'Lige 'we a'lá bi'lepi na'támala mué Onorúgame Alawala 'yuga ―anele alué Ananíasi.
18'Lige pe yati rujsule alué napu o'póliga chujkúlige alué busila.#9:18 Alué napu busila o'póliga ujchule nile pe alieti napuyeri alué ro'chí gajela napu anilime ju «escama» yolí ra'íchaga. 'Lige alué rujsúsaká pe yati ma'chílile alué rió busila. 'Lige asísile alué rió 'lige rewaráliru alé ba'wichí bochígimi bokuíle napurigá ralámuli 'la machimela alué rió 'ma 'la Esukristo oyérame ko. 'Lige 'ma rewarásiká 19'lige alué rió 'ma go'ale go'ame. 'Lige alésíko 'ma a'walí narele alué rió.
Jena ruwimela Sauli ra'íchaligo Onorúgame nila ra'íchali alé Ramáskochi
20Alué Sauli asale alé wa'lú we'ká riógichi Ramasko anilichi pe u'kabi rawé alué ralámuli Esukristo oyérame 'yuga. 'Lige alué Sauli eyénale alé we'kaná u'kuchí re'obachi napu «sinagoga» anilime nile. 'Lige alé sebasa ra'íchale alué ralámuli jurío 'yuga. Anile:
―Aka alué Esusi 'la Onorúgame Inolá júpaché alé 'pákana rewagáchika nawágame.
21'Lige alué ralámuli 'we e'negá jale alué Sauli Onorúgame nila ra'íchali ra'íchachi alé u'tá re'obachi iligá. Anile:
―¿Ye ju alué rió napu tabilé galeme nile alué ralámuli Esusi oyérame? ¿Tabilé nawale alué rió jena cha'pimea alué Esusi oyérame ralámuli napurigá o'tomela alé Rusaleni e'wélala balé 'yamia? ―anile alué ralámuli.
22'Lige alué Sauli aminacho 'we a'lá benile 'lige abé a'lá benigá ra'íchame nile tabilé chijúnaga tabilé chélagá. Benírile Onorúgame ra'ichálila napu 'ya osirúgime nile, napu anime nile Esusi níligo alué Kristo napu Onorúgame julámili níligo napurigá gu'írimala ralámuli. 'Lige alué ralámuli napu akele alué ra'íchali 'la námale 'la bijchiá ko, tabiléchigo e'wale ko alué ralámuli.
'Lige alué ralámuli abisí tabilé che anigá jábaleke'é. Arigá neyúrileke'é alué Sauli.
Jena ruwimela alué Sauli neyúsaligo alué ralámuli jurío me'linálichi
23'Lige napuíle we'ká ralámuli alé a'kinana we'ká rawé kachi. 'Lige ra'íchale alué we'ká ka napuísa alé. Anile:
―Me'libó'é alué rió ―anile alué ralámuli napuísa alé we'ká ka.
24'Lige bilé rió ruyele alué Sauli me'libólikó:
―Nabí iwigá mochí ralámuli jena Ramáskochi mué me'linalia, rukomi rawemi abiena, alé yochi mochí ―anele.
'Lige alé wa'lú we'ká riógachi Ramáskochi 'we re'pá ilígame nile alué tegoli noligá alé suweke, 'lige 'we ru'nágame nile alué tegoli. 25'Lige bilé rukó jaré alué Sauli gompaniérola simíbale alué Sauli 'yuga alé 'mi we'ká riógachi suweke alé tegochi ewágachi. 'Lige alé sebasa, atabechi ajchagá o'wiga kolígana ma'chí re'kibule.
Jena ruwimela alué ralámuli jurío me'lináliligo alué Sauli alé Rusaleni
26Napu'lige ma'chínasa alué rió Sauli alé Ramasko anilichi, simile alé Rusaleni anilichi wa'lú we'ká riógachi. 'Lige alé Rusaleni alué Esukristo oyérame tabilé najkile napurigá si asimela alué rió Sauli. 'Lige alué ralámuli alué Esukristo oyérame tabilé bijchígale alué rió Esukristo oyérame ko. Pe majaga etéleru alué rió Sauli alé. 27'Lige alué Bernabé anilime rió gu'írile alué Sauli alé. Bayérole alé 'mi napu mochile alué makué oká rió napu nulame nílige Esusi nochálilachi. 'Lige alué Bernabé ruyele alué ralámuli alué rió Sauli etéligo alué Esusi alé boichimi enágichi napu bo'í bowé Ramáskochi simime, 'lige alé ra'íchiligo alué Esukristo alué Sauli 'yuga. 'Lige anile alué rió Bernabé:
―Alé Ramáskochi tabilé majaga ruwile ye rió Sauli alué Esusi ra'ichálila napugiti alué Esusi alarigá 'yáligame alué 'nátili ―alarigá ruwile alué Bernabé anilime rió.
'Lige alué ralámuli alué Esukristo oyérame 'ma a'lá bijchígale alésíko.
―'La bijchiá júkó ―anile. 28Alésíko napuíle alué Sauli alué Esukristo oyérame 'yuga Rusaleni mochígame. 'Lige alué Sauli eyénale alé wa'lú we'ká riógichi Rusaleni bochígimi alué Esusi ra'ichálila ruigá. 'Lige tabilé majaga ra'íchale alué rió Sauli alué Esusi ra'ichálila ruigá. 29'Lige 'we a'wágame ra'íchale alué ralámuli jurío 'yuga napu griego ra'íchame nile. 'Lige alué ralámuli 'ma me'linálele alué rió Sauli. 30'Lige alué jaré ralámuli alué Esukristo oyérame machile alué rió Sauli me'liboli ko. 'Lige alué ralámuli chíboka simíbale Sauli 'yuga alé 'mi uché bilena we'ká riógichi Sesarea anilichi we'ká riógichi. 'Lige alésíko uchéchigo bilena mejká júlale alué ralámuli alué rió Sauli. Tarso anilichi we'ká riógichi nile alé napu juláliru alué rió Sauli. 'Lige alé ochérigame nile alué rió Sauli 'ya bajchá rawé.
31'Lige alué Sauli simisáká alé uché bilena mejká, tabilé na'áuka mochile alué ralámuli jurío Esukristo sayégame alué Esukristo oyérame si pe'wera, alué oyérame napu ejperégame nile alé ejiro Jurea 'lige alé ejiro Galilea 'lige alé ejiro Samaria. 'Lige alué Esukristo oyérame abé rejchirúgame gayénale 'lige 'we a'lá nirame nile alué Wa'lula Esukristo. 'Lige alué Onorúgame Alawala abé a'lá oilárile alué ralámuli 'lige aminacho we'ká ralámuli oyérale Esukristo.
Jena ruwimela Pegro sa'wáligo bilé rió sujírigame
32Alué Pegro we'kaná we'ká riógichi eyénale alué Esukristo oyérame gu'íriga. 'Lige sébale alé bilena we'ká riógichi Lira anilichi we'ká riógichi, alué Esukristo oyérame kólimia simile alemi. 33'Lige alé najtépale bilé rió 'we nayume, Enéasi anilime rió. 'Lige alué rió sujírigame nile. 'Lige osá naó bamí pe bo'ígime nile alué rió, tabilé gayéname nile asisia. 34Pegro anele alué rió nayume:
―Mué rió Enéasi, ye Esukristo 'la 'yómala mué jipe, jípeko 'ma sa'wimela mué nayua. Yati asísiwa mué, ro'minawa pétigame ―anile alué rió Pegro.
'Lige alué rió nayume yati asísile, 'ma sa'wile nayua alué rió. 35'Lige alué ralámuli alé we'ká riógichi Lira anilichi mochígame, 'lige alué Saroni mochígame, napuíle alé napu asale alué rió 'yórigame. Pe e'nemia jsile alué ralámuli alué rió sujírigame sa'wígame. 'Lige alué ralámuli napu ekí nile alé sébagame, 'ma suwábaga bijchígale alué Wa'lula Esukristo ra'ichálila. 'Ma Esukristo oyérame gayénale alué ralámuli.
Jena ruwimela ku ajániligo bilé mukí mukusá
36Alé we'ká riógichi Jopa anilichi asale bilé mukí, Esukristo oyérame nile alué mukí, Tabita anilime nile alué mukí. 'Lige griego ra'íchaga ka Rorka anilime nile alué mukí. 'Lige alué laniá pe chomalí aniame nile griego ra'íchaga. 'Lige alué mukí nabí 'we semáriga 'nátame nile Onorúgame 'yuga. Aminami 'we a'lá nirame nile uché jaré ralámuli, 'we a'lá gu'írame nile alué ralámuli tabilé nígame. 37'Lige nayúnale alué mukí, 'lige mukule alué mukí nayuka. 'Lige alué ralámuli 'we a'lá u'bárele, napurigá nokame nílige alué ralámuli. 'Lige bilé galí nile osámana ilígame. 'Lige 'ma u'barsa alué mukí mukúgame, alé galimopa rekale alué mukí mukúgame. 38Napu'lige mukuchi alué mukí, alué Pegro alé we'ká riógichi Lira asale. 'Lige alé Lira pe a'bé nile alé Jopa yéniga. 'Lige alué ralámuli alué Esukristo oyérame alé Jopa ejperégame akele alué Pegro alemi ajtigáráo. 'Lige yati júlale oká rió napurigá bayémala alué Pegro. 'Lige alué oká rió sebasa alé napu ajtile Pegro, yati bayérole, anele:
―Pe rekó, ¡yati simawa ramué 'yuga! ―anele alé sebasa.
39'Lige alué Pegro yati simile alué oká rió 'yuga alé 'mi napu mochile alué ralámuli. 'Lige alé sebasa yati o'tóliru alé re'pá napu bo'ile alué mukí mukúgame. 'Lige alé we'ká umugí gunámakame mochile. Bochí aniá ilile nalá alué umugí alé re'pá, alé napu bo'ile alué mukí mukúgame. 'Lige alué o'pacha napu súlige alué mukí mukúgame, e'nérale nalaka alué Pegro alué umugí. 40'Lige alué Pegro 'le wichí júlale alué umugí alé mochiga anichi. 'Lige alué Pegro alé 'le wichí julasa alué umugí gunámakame, 'lige chojkóbisiga ilíbale alé a'bé napu bo'ile alué mukí mukúgame. 'Lige Pegro alé chojkóbisiga iligá, 'lige tánele Onorúgame napurigá gu'írimala alué mukí mukúgame. 'Lige 'ma tánesa Onorúgame, 'lige anele alué mukí mukúgame:
―Mué Tabita ku asisi ―anele alé iligá.
'Lige lanésiga yati e'nénele alué mukí mukúgame. 'Lige alué mukí etele alué Pegro alé ilígichi. 'Lige o'weti asísile alué mukí. 41'Lige alué Pegro sekachí cha'pigá o'weti elale alué mukí. 'Lige 'ma o'weti elasa 'lige bayele alué Esukristo oyérame alé ku re'pá napurigá e'némala alué mukí ku ajánagame. 'Lige alué gunámakame umugí abiena bayélechigó napurigá e'némala alué mukí ku ajánagame. 42'Lige pe yati bochígimi machíleru larigá níligo alé we'ká riógichi Jopa. 'Lige we'ká alué ralámuli yati 'we a'lá bijchígile Wa'lula ko Esukristo. 'Lige 'ma Esukristo oyérame nile alésíko alué ralámuli. 43'Lige alué Pegro we'ká rawé asale bejtega alé Jopa anilichi we'ká riógachi alé Simoni galílachi, alué Simoni napu waketa newame nile.
© 2008, Wycliffe Bible Translators, Inc. All rights reserved.