2. Mose 22
22
Äwa Schult auftolen
1Wan een Stäla doabie jefungen woat, daut hee en een Hus nenbrakjt, un dee woat soo sea jeschloagen, daut hee doavon stoaft, saul de Mensch nich fa dän Doot bestroft woaren. 2Es de Sonn oba aul oppjegonen ea hee däm schleit, dan saul hee doafäa bestroft woaren.
Wäa waut stälen deit, saul onbedinjt trigj tolen, un wan hee nuscht haft toom betolen, saul hee vekoft woaren toom de Schult betolen. 3Wan daut läwendje Tia jefungen woat, bie däm wäa daut jestolen haft, auf Rint, ooda Äsel, ooda Schop, dan saul hee dobbelt läwendje Tieren trigj tolen.
4Wan eena Vee opp sien Flekj ooda Wiengoaden nopp lat, un dan daut Vee lat opp eenen aundren sien Flekj ooda Wiengoaden waundren, dan saul hee von sien bastet Flekj ooda Wiengoaden aufjäwen toom trigj tolen.
5Wan Fia utbrakjt, un daut derch Distelkrut derchbrent un waut Hocken vebrent, ooda no een Flekj kjemt, waut noch steit, un daut vebrent, saul dee, dee daut Fia aunjestekjt haft, uk aules trajchtstalen un trigj tolen.
6Wan wäa Jelt ooda aundre Sachen biem Noba lat toom oppbewoaren, un daut dan jestolen woat von doa, dan saul dee waut jestolen haft, wan dee jefungen woat, dobbelt trigj tolen. 7Wan kjeen Stäla jefungen woat, dan lot däm Noba wua daut oppbewoat wia, ver Gott sien Jerecht komen, om faust to stalen, auf hee daut jenomen haft, waut de Noba bie am oppbewoat haud.
8Jiedatsmol wan twee sikj strieden äwa een Oss ooda Äsel ooda Schop ooda Kjleeda ooda irjent waut ut eenem sien Vemieejen, daut see beid sajen daut es äat, sellen see beid ver Gott sien Jerecht jebrocht. Wäa dan schuldich jefungen woat, saul dobbelt trigj tolen. #(8-10) 1Kjen 8,31-32
9Wan eena däm Noba een Äsel ooda Oss ooda Schop ooda een aundret Vee aunvetrut, daut jana daut hoolen saul, un daut dan stoaft ooda daut es beschädicht ooda daut woat wajch jenomen, un kjeena haft jeseenen waut doa wort, 10saul dee Noba sien Wuat jäwen ver däm Harn, daut hee däm Schoden nich aunjerecht haft, un de aundra saul daut aunnämen. Dan es doa nuscht trigj to tolen.
11Wan daut Tia jestolen es, saul de Noba daut trigj stalen. 12Wan daut stekj Vee veräten woat von een willet Tia, saul hee dän Oppwies doavon brinjen, un brukt nich trigj tolen. #1Mo 31,39 13Wan eena vom Noba liet, un daut litt Schoden ooda stoaft, wiels de Ieejendeema nich doa es, dan saul trigj jetolt woaren. 14Es de Ieejendeema oba doabie, dan brukt nuscht trigj jetolt. Es daut Tia opp Bedinjungen utjeliet, dan es de beräde Tolinj jenuach.
15Wan een Maun eene Mejal, dee noch kjeenem vesproaken es, veleiden deit, un bie ar licht, saul hee de jeweenelje Tolinj fa eene Brut fa ar moaken, un ar aus Fru nämen. #5Mo 22,28-29 16Wan äa Voda ar oba goanich aufjeft, saul de jeweenelje Tolinj doch jemoakt woaren.
17Eene Hakjs, eene dee Krauft von beese Jeista brukt, saul nich aum Läwen bliewen. #3Mo 20,6.27; 5Mo 18,10; 1Sam 28,9; Mal 3,5
18Eena, dee sikj met een Tia aufjeft, om met daut Jeschlajchtsvekjia to haben, saul nich läwen bliewen. #3Mo 18,23; 5Mo 27,21
19Wan wäa een Opfa moakt fa irjent een Aufgott, däm saul daut Läwen jenomen. #2Mo 20,3.5; 5Mo 13,7-19; 17,2-7
20Eenen framden sell jie jescheit behaundlen, un däm nich daut Läwen schwoa moaken. Jie sellen doaraun denkjen, daut jie framde wieren en Ägipten. #3Mo 19,33-34; 5Mo 10,18-19
21Jie derwen eene Wätfru ooda een Weisenkjint nich daut Läwen schwoa moaken. #5Mo 27,19; Jes 1,17; Sach 7,10 22Wan daut wäa deit, un dee mie dan om Help aunroopen, woa ekj dee bestemt hieren. 23Daut wudd mie soo jäajenaun sennen, daut ekj junt met daut Schwieet wudd ombrinjen, un june Frues wudden Wätfrues sennen un june Kjinja Weisen.
24Wan jie eenem en mien Volkj, dee oam es, Jelt lieen, dan sell jie daut nich opp Vedeenst utborjen, daut jie Entras kjrieen. #3Mo 25,36; 5Mo 23,20; Spr 28,8
25Wan eena dän aundren siene Dakj aus Birjschoft nemt, saul dee aul ea de Sonn unjajeit, trigj jebrocht woaren. #5Mo 24,10-13 26Daut es siene eensje toom sikj enne Nacht toodakjen. Woo saul hee sest schlopen? Wan soona mie aunroopen wudd om Help, däm wudd ekj secha hieren. Jie weeten doch, daut ekj een grootet Hoat hab.
27Jie sellen Gott nich lastren, un kjeen Fluch opp june Rechta brinjen. #3Mo 24,14-16; Apost 23,5
28Lot daut nich too lang dieren bat jie von june Arnt un von june Eeljprassen fa een Opfa brinjen. Dienen ieeschten Sän saust du mie äwajäwen. #2Mo 13,2.13; 23,19; 5Mo 18,4; Spr 3,9-10 29Daut ieeschte vom Vee un Schop saust du mie uk äwajäwen. Dee sellen säwen Doag bie de Mutta sennen, oba aun däm achten Dach, sell jie dee mie jäwen. #3Mo 22,27
30Jie sellen heilje Menschen sennen fa mie. Jie derwen nich Fleesch äten, waut oppem Launt von Tieren veräten worden es; jäft daut de Hunj. #3Mo 7,24; 19,2; 5Mo 14,21; Hes 4,14; 44,31; 1Pet 1,15
Nu markerat:
2. Mose 22: PB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Plautdietsch Bible © 2003 Kindred Productions and United Bible Societies Association, Inc.