MATEO 1
1
Yra xpenkwlal Jesucrist
(Lc. 3:23-38)
1Laa yra la mén ne nak xpenkwlal Jesucrist nee, Jesucrist ne zëëd xnëz rrey-David no ne zëëd xnëz Abraham.
2Abraham nak xuz Isaac, Isaac nak xuz Jacob, Jacob nak xuz Judá yra bech Judá, 3Judá nak xuz Fares yrup Fares Zara, le xnaa men nak Tamar, Fares nak xuz Esrom, Esrom nak xuz Aram, 4Aram nak xuz Aminadab, Aminadab nak xuz Naasón, Naasón nak xuz Salmón, 5Salmón nak xuz Booz, le xnaa Booz nak Rahab, Booz nak xuz Obed, le xnaa Obed nak Rut, Obed nak xuz Isaí, 6Isaí nak xuz rrey-David, rrey-David nak xuz Salomón, le xnaa Salomón nak men ne wak xewnaa Urías.
7Salomón nak xuz Roboam, Roboam nak xuz Abías, Abías nak xuz Asa, 8Asa nak xuz Josafat, Josafat nak xuz Joram, Joram nak xuz Uzías, 9Uzías nak xuz Jotam, Jotam nak xuz Acaz, Acaz nak xuz Ezequías, 10Ezequías nak xuz Manasés, Manasés nak xuz Amón, Amón nak xuz Josías, 11Josías nak xuz Jeconías yra bech Jeconías tyemp ne wzanofwers men-Babilonia men-Israel wyano men men Babilonia.
12Nga ka men chene wal Salatiel xpee Jeconías. Salatiel nak xuz Zorobabel, 13Zorobabel nak xuz Abiud, Abiud nak xuz Eliaquim, Eliaquim nak xuz Azor, 14Azor nak xuz Sadoc, Sadoc nak xuz Aquim, Aquim nak xuz Eliud, 15Eliud nak xuz Eleazar, Eleazar nak xuz Matán, Matán nak xuz Jacob, 16Jacob nak xuz Xeb xemgyeey Mli ne nak xnaa Jesus ne la ke Crist.
17Chidaa ngwzan wuu kwlotee Abraham axtegue rrey-David, schidaa ngwzan wuu kwlotee rrey-David axtegue chene wzano men-Babilonia men-Israel ne wyano men men Babilonia, schidaa ngwzan wuu nga axtegue ne wal Jesucrist.
Chene wal Jesucrist
(Lc. 2:1-7)
18Zeree wak chene wal Jesucrist: Che nuu Mli xnaa Ne ne ytsëlnya men yrup men Xeb; per antes ne tsuu men yrup men, wakzhiin Mli por xpoder Espíritu Sant. 19Kom kesentyent wen Xeb, wlaandet men nboo men xeblaan Mli; mazdee wlebleedx men nsalzaan men Mli ngueedxendxee. 20Zenga rlebleedx men chene wlalo te xangel Dëdyuzh lo men lo mkaal, re angel guin:
―Xeb ne zëëd xnëz David, ydxedet de ytsëlnyano de Mli, porke mëëd ne gap men, por xpoder Espíritu Sant wuu ne. 21Gap men te mëdbee, ynesela de ne JESUS, porke laa ne yselaa yra xpén ne lo xdol men.
22Wak yra neree chen gak kumplir diiz ne re Dëdyuzh lo profet, laa we nga re:
23Gakzhiin te nzeb-benak, gap men te mëdbee
ne sela Emanuel.
Emanuel rna: Dëdyuzh zu kon laa be.
24Chene wruu mkaal lo Xeb, wlaa Xeb zegne wkyeen xangel Dëdyuzh Xeb. Wtsëlnya Xeb yrup Xeb Mli. 25Per wgaldetgue Xeb Mli axtegue ne wal xpëëd Mli. Lex wnesela Xeb ne JESUS.
Nu markerat:
MATEO 1: zpi
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2010, Wycliffe Bible Translators, Inc. All rights reserved.