ဒေါ ဂုဝ် 1
1
လွင် ဇဝ်ဖြာ ဖာန် ဘ့လေး ကာဒါယ်
1အူ ဆိန့် ဒေါ ဂုဝ် အန် ဇဝ်ဖြာ ဖာန် ဘ့လေး ဘော ဂါင်ဟြာဝ် ဘော ကာဒါယ်။ 2ဒေါ အန် တီ ကာဒါယ် အာဝ် မိုဝ်း အာရိုပ် အန်။ န့ မိူဝ် တူ မိုဝ်း မာဆေ ဒဲင် ကာဒါယ် နီ။ န့ အပ် ဝွင့် ဒဲင် အိုမ် တာင်၊ အိုမ် ဘ့လွင့်။ နဝ်း ဖွိုမ် ဇဝ်ဖြာ မိူဝ် ဟာဝ် နာ ဒဲင် အိုမ် တာင် တီ။
3ဝါယ် အန် တီ ဇဝ်ဖြာ တဝ်း၊ “တဲး န့ ဘ့လာင်။” ဟဲ့ ဟွတ့် ကာလာင်၊ န့ ဘော ဘ့လာင်။ 4ဇဝ်ဖြာ မိူဝ် ယိုဝ်၊ ဘ့လာင် တီ ဟဲ့ ကျ။ ပါယ် တီ ဇဝ်ဖြာ ဟဲ့ ကာယဝ်း ဘ့လာင် ဂါယ် အပ်။ 5ဘ့လာင်၊ အန် စိူဝ် ဆီငဲ။ အပ်၊ အန် စိူဝ် ခဲင် မှိုဝ်။ ဟဲ့ အပ် ဝီ ဘ့လာင်၊ ဟဲ့ နုဝ့် အူ ဆီငဲ။
6ဇဝ်ဖြာ ဝီ တဝ်း၊ “တဲး န့ ဘဲန် ဒူင် တာင် နာ ကာတဲ အိုမ်၊ တဲး န့ ကာယဝ်း အိုမ် အာ ဘ့လာက်။” 7ပါယ် တီ ဇဝ်ဖြာ ဘူင် တဲး န့ ဘဲန် ဂါင်ဟြာဝ်၊ တဲး န့ ကာယဝ်း အိုမ် နာ ခြိုမ် ဂါယ် အိုမ် နာ ဒဲင်။ 8ဂါင်ဟြာဝ် တီ၊ ဇဝ်ဖြာ မိူဝ် တဲး န့ စိူဝ် ဘ့လေန့်။ ပါယ် တီ ပြဲ ဝီ အပ် ဝီ ဘ့လာင်၊ ဟဲ့ နုဝ့် အာ ဆီငဲ။
9ဝါယ် အန် တီ ဇဝ်ဖြာ ဝီ တဝ်း၊ “အိုမ် နာ ခြိုမ်၊ တဲး န့ ကာဇု အူ ပ့လုဝ့်၊ တဲး န့ လိုဝ်း ဒူင် ကာဟဝ်း။” ဇဝ်ဖြာ ဟဲ့ ဟွတ့် ကာလာင်၊ န့ ဘော ဘဲန်။ 10ဒူင် တူ မိုဝ်း အိုမ်၊ ဇဝ်ဖြာ တဲး န့ စိူဝ် ကာဒါယ်။ ဒူင် ကာဇု အိုမ်၊ ဇဝ်ဖြာ တဲး န့ စိူဝ် နမ်မုက်ဆာရာ။ ဇဝ်ဖြာ ဝီ ယွတ် တူတ့်၊ ဟဲ့ ကျ ကာဆဝ်။ 11ဟဲ့ ဟွတ့် ဇဝ်ဖြာ တဝ်း၊ “ဒဲင် ကာဒါယ် တီ၊ တဲး န့ လေး ပေတ့်၊ တဲး န့ မိုဝ်း ဒဝ် အီ မိုဝ်း ဂဝ် အန်။ တဲး န့ မိုဝ်း ဟေ အီ မိုဝ်း ဘ့လေ။ ဟေ ဒွန် မျုဝ်၊ တဲး န့ မိုဝ်း ဘ့လေ အာမျုဝ် အန်။ ခဲင် ဘ့လေ တီ ဒွန် မျုဝ်၊ တဲး န့ မိုဝ်း ကာအာင် အန်၊ ပီ ဝီ ပွိုန် ဆမ် ခဲင် ကာဒါယ်။” ဇဝ်ဖြာ ဟဲ့ ဟွတ့် ကာလာင် ပါယ် တီ ဟေ ဘော ဘ့လေ ဝီ ဘဲန် တူတ့် ဒွန် မျုဝ်။ 12ဒဲင် ကာဒါယ် န့ ဝီ လတ့် ပေတ့် ဂေ ဒဝ် ဘဲန် မျုဝ် ဘဲန် မျုဝ် အီ မိုဝ်း ဂဝ် အာမျုဝ် အန် ဘော ဟေ အီ မိုဝ်း ဘ့လေ ဘဲန် မျုဝ် ဘဲန် မျုဝ်။ ဟေ ဒွန် မျုဝ် မိုဝ်း ကာအာင် အန်။ ဂေ ဒွန် မျုဝ် လတ့် တူတ့် ဒဲင် ကာဒါယ်။ 13ဇဝ်ဖြာ မိူဝ် ယွတ်၊ န့ ကျ တူတ့် ဒွန် မျုဝ်။ ဒေါ အန် တီ ဟဲ့ အပ် ဝီ ဘ့လာင်၊ ဟဲ့ နုဝ့် အူယ် ဆီငဲ။
14ဝါယ် အန် တီ ဇဝ်ဖြာ ဝီ တဝ်း၊ “တဲး န့ မိုဝ်း အူ မျုဝ် အီ ပီ ဘ့လေ ဘ့လာင် ခဲင် ဘ့လေန့်။ မျုဝ် အီ ပီ ဘ့လေ တီ၊ တဲး န့ ကာယဝ်း ကာတဲ ဆီငဲ ဂါယ် ခဲင် မှိုဝ်။ ဆေ အီ ယိုဝ် ဘ့လေ တီ၊ တဲး ဂေ နပ် ပန် မှဝ် န့ ဒီ မိုဝ်း ဘ့လွယ် ဘဲန် မျုဝ် ဘဲန် မျုဝ်၊ တဲး အီ ပွိုန် ဒီ တိး အာခြာဝ် အန်၊ ဆီငဲ အန် ဘော ဆီနမ် အန်။ 15ဘ့လေ ဘ့လာင် တီ လုဝ် ကွယ် ခဲင် ဂါင်ဟြာဝ်၊ တဲး န့ ဘ့လာင် ဒဲင် ကာဒါယ်။” ဟဲ့ ဟွတ့် ကာလာင်၊ န့ မိူဝ် ဘုဝ် ဘဲန် ပါယ် တီ အူ ဇေန့်။ 16ပါယ် တီ ဇဝ်ဖြာ ဖာန် ဘ့လေး အီ ဘ့လာင် တာင် အာ ကာလင်။ ဘူင့် တာင်၊ ဇဝ်ဖြာ တဲး အန် အိုပ် ဆီငဲ ကာတဲ၊ ဘူင့် တျီ့ တဲး အန် အိုပ် ခဲင် မှိုဝ်။ အန် ဇဝ် မိူဝ် ဘူင် ဂေ ဆီမန့် ဘဲန် မျုဝ်။ 17အန် ဇဝ် ဟဲ့ ဟွတ့် ဘူင် ဘ့လေ ဘ့လာင် ဘော ဆီမန့်၊ အန် မိူဝ် ဘ့လေး အုန် ဂေ ခဲင် ဘ့လေန့်၊ တဲး န့ ဘ့လာင် ဒဲင် ကာဒါယ်။ 18တဲး ဂေ ကွယ် ဆီငဲ ကာတဲ ဘော ခဲင် မှိုဝ်၊ တဲး ဂေ ဘော ကာယဝ်း ဘ့လာင် ဂါယ် အပ်။ ဇဝ်ဖြာ ဟဲ့ ဟွတ့် ဘူင် ပါယ် တီ အန် ဝီ ယွတ်၊ န့ ကျ ဒွန် မျုဝ်။ 19ပါယ် တီ ပြဲ ဝီ အပ် ဝီ ဘ့လာင်၊ ဟဲ့ နုဝ့် ဖွုန် ဆီငဲ။
20ဝါယ် အန် တီ ပေါ အူ စိုပ် ဇဝ်ဖြာ ဝီ တဝ်း၊ “တဲး န့ မိုဝ်း ဒုဝ် အီ ကွယ် ခဲင် အိုမ် ဘဲန် မျုဝ် ဘဲန် မျုဝ်၊ တဲး ဂေ ကိူန်။ ဘော ခဲင် ဘ့လေန့် တဲး န့ မိုဝ်း မာဆိမ် အီ ပွိုန် ဘိုန့် ဟာဝ် နာ ဒဲင် ခဲင် ဘ့လေန့်။” 21ပါယ် တီ ဇဝ်ဖြာ ဖာန် ဘ့လေး မာဂါ ဘော အီ တာင် အီ တျီ့ ဘော ဒုဝ် ဆတ်ဒါဝါ အီ ကွယ် ခဲင် အိုမ်၊ တဲး န့ မိုဝ်း ဘဲန် မျုဝ် ဘဲန် မျုဝ်။ အန် ဇဝ် မိူဝ် ဘူင် တဲး န့ မိုဝ်း မာဆိမ် ဂေ ဒုဝ် အီ မိုဝ်း ဖျီင် ဒွန် မျုဝ်။ အန် ဇဝ် မိူဝ် ယွတ် ပီ ဘူင် အန်၊ န့ ကျ။ 22ဟဲ့ ဟွတ့် ဘူင်၊ ဇဝ်ဖြာ မွင့်ကာရာ တဲး ဒီ ဒုဝ် ဆတ်ဒါဝါ ဒွန် မျုဝ်။ အန် တဝ်း၊ “တဲး ဘေ ဘြဲ၊ တဲး ဘေ ကိူန်။ ခဲင် အိုမ်၊ တဲး န့ ဘော နုဝ့် ဒုဝ် ဘဲန် မျုဝ် ဘဲန် မျုဝ်။ ဒဲင် ကာဒါယ်၊ တဲး ဂေ ဒုဝ် အီ မိုဝ်း ဖျီင် ဒွန် မျုဝ် အီ ကြဲ ဒီ ကိူန်။” 23ပါယ် တီ ပြဲ ဝီ အပ် ဝီ ဘ့လာင်၊ တဲး န့ ဘော နုဝ့် ဖန် ဆီငဲ။
24ဝါယ် အန် တီ ဇဝ်ဖြာ ဝီ တဝ်း၊ “တဲး န့ မိုဝ်း ဒုဝ် အီ မိုဝ်း အာဆာက် ဒွန် မျုဝ်။ တဲး န့ မိုဝ်း ဘော ဒုဝ် အီ ကွယ် ဒဲင် ကာဒါယ် ဒွန် မျုဝ်။ တဲး ဂေ ကြဲ ဒီ ကိူန်၊ အာမျုဝ် မှဝ် အာမျုဝ် အန်။” ဟဲ့ ဟွတ့် ကာလာင်၊ န့ ဘဲန် တူတ့် ပီ တဝ်း ဇဝ်ဖြာ။ 25ပါယ် တီ ဇဝ်ဖြာ ဘူင် တဲး န့ မိုဝ်း ဒုဝ် ဆတ်ဒါဝါ အီ ကွယ် ဒဲင် ကာဒါယ်၊ တဲး န့ မိုဝ်း အာမျုဝ် မှဝ် အာမျုဝ် အန်။ ဟဲ့ ဟွတ့် ဇဝ်ဖြာ ဝီ ယွတ်၊ တူတ့် ဒွန် မျုဝ် ဟဲ့ ကျ ကာဆဝ်။
26ဝါယ် အန် တီ ဇဝ်ဖြာ တဝ်း၊ “တဲး အေ ဘူင် ဒူအီ၊ တဲး ဂေ ပီ အေ ဇဝ်ဖြာ။ အာရိုပ် ဒူအီ၊ တဲး န့ ပီ ဇဝ်ဖြာ။ ဂေ ဒူအီ တီ၊ ဂေ လုဝ် အိုပ် မာဂါ အီ ကွယ် ခဲင် အိုမ်၊ အိုပ် ဘော မာဆိမ် အီ ကွယ် ခဲင် ဘ့လေန့်။ ဘော ဒုဝ် ဆတ်ဒါဝါ အီ ကွယ် ဒဲင် ကာဒါယ်၊ တဲး ဒူအီ အိုပ် တူတ့် ဒွန် မျုဝ်။”
27ဟဲ့ ဟွတ့် ကာလာင်၊ ဇဝ်ဖြာ မိူဝ် ဘူင် တဲး န့ မိုဝ်း ဒူအီ၊ တဲး ဒူအီ ပီ အာရိုပ် အန် ဇဝ်။ အန် ဇဝ် ဘူင် ဘော အီဘိုန့် ဘော အီမာယ်၊ တဲး ဂါယ် ပီ အန်။
28ဇဝ်ဖြာ ဝီ မွင့်ကာရာ ဒွါ ဒီ ဂါယ်။ အန် တဝ်း၊ “တဲး ဘာယ် ဟိူင် ဘြဲ ကိူန်၊ တဲး ဒူအီ ကော နုဝ့် ဒဲင် ကာဒါယ် နီ၊ တဲး ဘာယ် ဘော အိုပ် တူတ့် ဒဲင် ကာဒါယ် နီ။ တဲး ဘာယ် ဘော အိုပ် ဂေ မာဂါ အီ ကွယ် ခဲင် အိုမ် ဘော ဂေ မာဆိမ် အီ ကွယ် ခဲင် ဂါင်ဟြာဝ် ဘော ဂေ ဒုဝ် အီ မိုဝ်း အာဆာက် ဒွန် မျုဝ် အီ ကွယ် ဒဲင် ကာဒါယ် နီ။”
29အန် ဇဝ် မိူဝ် တဝ်း၊ “ခဲ့ ကွယ် ဒဝ် အီ မိုဝ်း ကာအာင်၊ ခဲ့ ကွယ် ဟေ အီ မိုဝ်း ဘ့လေ ဂေ ကာအာင်၊ အုဝ် ဒွါ ဒီ ဘာယ်၊ တဲး န့ ဘဲန် ပီ ဒီ ဟူမ် ဘာယ်။ 30ခဲ့ မိုဝ်း ဒုဝ် ဆတ်ဒါဝါ ဒဲင် ကာဒါယ်၊ ခဲ့ ကွယ် မာဆိမ် ခဲင် ဘ့လေန့်၊ ခဲ့ ကွယ် ဒုဝ် ဘဲန် မျုဝ် ဘဲန် မျုဝ်၊ အုဝ် ယီ ဒွါ ဂေ ဟူမ် ပေတ့် အီ လတ့် ဒွန် မျုဝ်။” ဇဝ်ဖြာ ဟဲ့ ဟွတ့် ကာလာင်၊ န့ ဘော ဘဲန် ပါယ် တီ။ 31ဇဝ်ဖြာ မိူဝ် ယွတ် တူတ့် ပီ ဘူင် အန် ဒွန် မျုဝ်။ န့ ဟဲ့ ကျ ကာဆဝ်။ ပါယ် တီ ပြဲ ဝီ အပ် ဝီ ဘ့လာင်၊ ဟဲ့ နုဝ့် ဒဝ် ဆီငဲ။
Nu markerat:
ဒေါ ဂုဝ် 1: pce
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2023, Wycliffe Bible Translators, Inc. All rights reserved.