Matío 2
2
Wɔ zhɛ́‑mecɔʼ saŋ é ega eshʉ̄ʼɛ á njʉ́ɔ Yɛɛ́so
1Mɛ́ le zhí á Yɛɛ́so, á tésɔŋ Bétlehɛm á apak ŋgɔŋ Yudéa, ŋguʼ Efɔ Elōde. Emɔ̄ʼ wɔ zhɛ́‑mecɔʼ saŋ, é lɛ efhó á alāʼ pɔ́p, á mbuʼ esaáʼ‑nu, éshʉ̄ʼ á Yelósalɛm. 2Ŋ́kó éwú, ńziŋɛ nzɛ́ttɛ ŋ́gɛ: «Efɔ epuɔ Yúda yīi, mɛ́ ke zhí á yí lā, a egɔ́? Pek ke jʉ́ɔ á cɔʼ saŋ yi, á tó á mbuʼ esaáʼ‑nu, tɛ́ eshʉ̄ʼɛ páʼa, ŋ́gɔ̄ á ŋgyá mekuʼ mí. » 3Ńté á nzɛ́ttɛ anu jʉɔ mɛ́t, Efɔ Elōde á júʼ, ḿbú ncɔ̄ʼ, mbɔɔ epuɔ Yelósalɛm metsem. 4Ńcúʼte wɔ nɔŋ‑epɔʼ epi melʉɛ epuɔ Yúda metsem pɔ́ wɔ kɛ́ʼte‑mbé Ndém, ńzɛ́tte á wɔ́p ŋ́gɛ, mɛ́ le tí á ntē aŋwaʼne Ndém ŋ́gɛ, mɛ́ e láʼ ezhí á Nzaʼ‑Ŋkhʉ égɔ́? 5Pɔ́ shúŋ á yí ŋ́gɛ: «Á Bétlehɛm, á ntē Yudéa ega, melaʼ mīi ntswi‑ŋke Ndém a le tí ŋ́gɛ: 6«Wu Bétlehɛm á ntē Yudéa, te zéŋ ŋgwák nnɛ̄t ju, nzwiŋ wú é teē ntɔ́k eyi emɔ̄ʼ metésɔŋ Yudéa. Efɔ yīi a a láʼ esáʼ á Islaɛl alāʼ zá, a a láʼ etó á mbū wu. » 7Elōde á júʼ épúp, ńtɔ́ŋ wɔ zhɛ́‑mecɔʼ saŋ á ntsem, ńzɛ́tte á wɔ́p ŋ́gɛ: «Pɛ ke zī á lejʉ̄ɔ cɔʼ saŋ mɛ́t, tɛ efhó kwaʼ eséŋɛ́ ɛ́?» 8Pɔ́ pɛ́te eshúŋ á yí. Á lɛ ntó á wɔ́p á Bétlehɛm ŋ́gɛ: «Pɛ egʉ̄ɔ éwú, ńchʉ́ nnɛ̄t efāʼ á mɔ́ mɛ́t á mbɔŋɔ́ tɛ njʉ́ɔ á yí, éshʉʼ eshúŋ á gá, tɛ́ meŋ egʉɔ ŋgyá azá mekuʼ á mbū yí. »
9Pɔ́ júʼ épúp, ńdɛ ntsé á mɛnzhɛ, ńnɔŋ nzīŋɛ, ńzéŋ njʉ́ɔ á cɔʼ saŋ yīi, pɔ́ ke fhó á mbuʼ esaáʼ‑nu ŋgīŋne, á zéŋ ŋgɔ́ á mvhɔ pɔ́p nzīŋɛ, pɔ́ nɔŋ nzhɛ̄nɛ á yí. Á gʉɔ tɛ ŋkó á mba yīi mɔ́ a lɛ éwú, ńtshí á taʼ ajʉʼ, a te zéŋ ŋŋɛ̄nne ɛ́. 10Pɔ́ zéŋ njʉ́ɔ á cɔʼ saŋ mɛ́t páʼā, ŋ́gáŋte, ḿbú ŋgwɛ̄ á mía lekāk. 11Ńdɛ ŋkó á ŋgyā, ńjʉ́ɔ á mɔ́ pɔ́ mɛ́ wɔp Malía, ńtswíʼte á esī ŋgyá mekuʼ mɔ́. Ńtāʼ epa tsɔ́p, éfók á gɔ́ɔl pɔ́ aŋsaŋ#2.11 É si ŋgɔ́ mmɔʼ ntií elɛ, ńtē nzwiŋ tɛʼ. mbɔɔ alamńda#2.11 Mɛ́ tɔɔ́ŋ ntií alamńda jʉɔ mɛ́t mé ashuŋne Fláŋsi lɛ Myrrhe. zīi á teē nzwiŋ, ńdɔk njʉ́ɔ á yí. 12Pɔ́ le shʉ̄ʼ nnɔŋ mbīŋɛ nzem mé alāʼ zɔ́p, ḿbiŋ ndɔ̄k nzhɛ ndɛʼɛ, melaʼ mīi Ndém a ke lɔ̄k njʉɔ‑athū, ńtɔ̄ʼ ŋ́gɛ, ndɛ́ʼ pɔ́ zéŋ ntsīa á lezēŋ Elōde.
Mɛ́ é ega ndɔ̄kɔ á mɔ́, ŋ́kʉ ŋgʉ̄ɔ mé Ejīpto
13Wɔ zhɛ́‑mecɔʼ saŋ é piŋ nzem épúp, cɔʼ Atsyapuɔ á lɛ ŋŋwāk á ntē njʉɔ‑athū á mbū Yosɛ́p, ńdé á mbū yí ŋ́gɛ: «Lu á esī, ńdɔ̄k á mɔ́ mbɔɔ mɛ́ wɔp, ŋ́kʉ ŋgʉ̄ɔ mé Ejīpto, ńnáŋ éwú, tɛ meŋ mé eláʼ nzéŋ ntswī mé wu ŋ́gɛ, o epīŋ nzem. Elōde a á si ŋgɔ̄ á efaāʼ mɔ́, ézwhí. » 14Yosɛ́p á júʼ épúp, ńdū á esī etsōʼ, ńdɔ̄k á mɔ́ pɔ́ mɛ́ wɔp, éswhine ŋgʉ̄ɔ mé Ejīpto. 15Ńnáŋ éwú, tɛ Elōde á láʼ ŋkwhʉ́. Púp, anu zīi Atsyapuɔ Ndém a le lɔ̄k nchu ntswi‑ŋke yi ndé, á lɔkɔ mbūɔ̄. A le lé ŋ́gɛ: «Meŋ á tswi ŋ́gɛ, méŋ ga a efhó á Ejīpto mbīŋ nzem. »
Elōde a á ega ntswīi mɛ́ zwhítɛ epɔ̄ meswī á Bétlehɛm
16Elōde á shʉʼ nzhɛ́ á légɛ, wɔ zhɛ́‑mecɔʼ saŋ é ke gɛtté á yí, ntɔ̄ŋ yí é fuʼ, á tó ŋ́gɛ mɛ́ egʉ̄ɔ á Bétlehɛm, mbɔɔ ánɛ ŋgʉ̄ŋ zí ntsem, ńzwhíte epɔ̄ meswī ntsem, tɛ ndáʼ ntshí ánɛ epi pɔ́ é wɛ ŋguʼ pīa, á lefhō ánɛ afʉʼ zīi, wɔ zhɛ́‑mecɔʼ saŋ é ke shúŋ á yí ŋ́gɛ, cɔʼ saŋ a ke tóō. 17Á gɔ́ páʼa mɛ́t, ńdɔk mbō páʼ Jelemi ntswi‑ŋke Ndém a le lé ŋ́gɛ:
18«Mɛ́ é júʼ ŋiŋ á gɔ́ á tésɔŋ Láma, ńchʉ̄ɛ ŋguŋ.
Ńjúʼ ŋiŋ á gɔ́ éwú ndāa, ŋ́gyáa nchu yí.
Ŋ́gɔ́ á Lashɛ̄ɛ, a laa ewɔŋkhʉ̄ pí, páʼ pɔ́ té zɛ́t,
a piīŋ te si ŋkɔ̄ŋɔ ŋ́gɛ, ŋiŋ a eláŋte á yí í. »
Mɛ́ é ega ndɔ̄kɔ á mɔ́, éfhɔ́ɔ á Ejīpto mbīŋɛ nzem
19Elōde á shʉʼ nnáŋ tɛ ŋkwhʉ́, cɔʼ Ndém á ŋwak á ntē njʉɔ‑athū, á mbū Yosɛ́p á Ejīpto. 20Ńdé á mbū yí ŋ́gɛ: «Lu á esī, ńdɔ̄k á mɔ́ pɔ́ mɛ́ wɔp ŋgʉ̄ɔ mé alāʼ epuɔ Islaɛl, melaʼ mīi epuɔ pīi, pɔ́ ke nɔ̄ŋ efaʼa á lewhʉ̄ mɔ́, é kʉʉ̄ŋ ŋkwhʉ́te. » 21Yosɛ́p á lu á esī, ńtswíʼ á mɔ́, pɔ́ a mɛ́ wɔp é gʉɔ mé Islaɛl. 22Ŋ́kó éwú, ńjúʼ á légɛ Aakelaos a ke jhʉ́ ŋgyā mɔʼɔ́ yi Elōde, tɛ yí mé cʉ́ʼɛ esáʼa Yudéa, ńcɔ̄ʼ á yí á legʉɔ mé éwú. Ndém á shʉʼ á ntē njʉɔ‑athū, ńtswɛ̄te á yí ŋ́gɛ, a ecʉ́ʼɛ ŋgʉ̄ɔ áa mé apak ŋgɔŋ Ŋgaliléa. 23Á kó éwú, ńnáŋ ánɛ tésɔŋ yīi mɛ́ tɔɔ́ŋ lɛ Naázalɛt. Púp, á lɔk mbō páʼ metswi‑ŋke Ndém é le té njhʉ̄ ndé ánɛ Nzaʼ‑Ŋkhʉ ŋ́gɛ: «Mɛ́ e láʼ etɔ́ŋ á yí lɛ, ŋiŋ Naázalɛt. »
Nu markerat:
Matío 2: ybb
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© CABTAL