Romag 8
8
Luwah taa nyàj dõ kɨtakul Ndil kɨ Kunjɗang
(Oo Gal 3:13-14; Gal 5:16-25)
1Kɨtɔ 'nten tajigla takɨgang goto dɔ degt'n ĩn kam dãrot kɨkɨɗa kɨ Jeju Krist. 2Kɨtɔ tɔg lo Ndilɨn ndɨ adj kumkajir kam Jeju Krist't õɓe dɔmt, ad mĩ girr tɔgt lo majal kɨ tɔg lo koi al. 3Mberkɨnda lo Moij asɨ kad adj kaj al, kɨta deg'n tõ kam dãrodt, ad asɨn tel rod go mberkɨndat al. Na Luwah la kɨ Ngonɨn kam dɔningt ad un ro de kɨ tit dãro kɨmajal, kɨtakad ɔrrɨn majalg. Titbe la Luwah gangɨn ta dɔ majalt kɨ ngarkam degt. 4Luwah ɗa titbe kɨtakad tɔlɨn kon mberkɨnda tit'n mberkɨnda ndajɨn mbera kad kɨ ndian kɨgo Ndilt, na kɨgo dãrot al. 5Kɨtɔ deg kɨ ngéɗanya kɨgo nyurkõt lo dãro ye, kamd i dɔ nyurkõgt lo dãro, na deg kɨ ngéɗanya kɨgo Ndil Luwaht ye, kamd i dɔ nyagt kɨ ɗa kɨgo Ndilt. 6Ĩla kɨ ndɨ kɨ nda kamj dɔ nyurkõgt lo dãro a ne, j'a kɨ j'oi. Na ĩla ndɨ kɨ ɗa nya kɨgo lo Ndilt a ne, j'a kɨ ngah kumkajir kɨ kam kɨsokɨber. 7Kɨtɔ deg'n nyurkõ kɨ dãrot õɓe dɔdt ĩn madngéta Luwah; ndɨ telɨn rod girr tɔgt lo mberkɨnda lo Luwah al, asɨn tel rod goot al bat. 8Deg'n ndɨn girr tɔg nyurkõt lo dãro ye, asɨn ɗa nya kɨ nel Luwah al. 9Na ĩn taa ne, nyaɗasɨ i kɨgo nyurkõt lo dãro al, na i kɨgo ndigt lo Ndil Luwah'n ndɨ ngarkamsɨt, 10Ĩla Jeju Krist i kamsɨt a ne, rota dãrosɨ i kɨ koi kɨtɔ majal, na Ndil Luwah ndɨ adsɨ kumkajir kɨtakad i telɨn ne deg kɨdenesew. 11Na ĩla Ndil Luwah'n ad Jeju Krist ɓai ku ngékoit ndɨ kamsɨt a ne Luwah kɨ ngekad Krist Jeju ɓai ku ngékoit ye, a ad dãrosɨ kɨ koi nõ kumkajir kɨtakul Ndil Luwah kɨ ndɨ kɨ kamsɨ. 12Kɨtɔ 'nten, ngankom girra i dɔjt, na i girra nyaɗa kɨgo ndilt tã, na i lo nyaɗa kɨgo dãrot al. 13Ĩla i ndɨn kɨ dɔsɨ dõ a ne, kari na a oin. Na ĩla i nyan nyaɗasɨg kɨgo nyurkõt lo dãro kɨta ɗa nya kɨgo Ndil Luwaht a ne, a i ndɨn kumkajir. 14Kɨtɔ deg tube'n Ndil Luwah ndɨ ɔrrd ta ɗob ye, ĩn ngan Luwah. 15Kɨtɔ Ndilɨn Luwah adsɨ ye, i Ndil kɨ ndɨ hɔsɨ ɓert al, ndɨ ndasɨ ɓoolt al tɔ, na i Ndil Luwah'n telsɨ ngan Luwaht. Kɨtakula la j'asɨ kunɨn Luwah j'an: I Bɔwj.
16Ndil Luwah kɨ dɔn nda tan nat kɨ ndilj an. Jĩ ngan Luwah. 17Ĩla jĩ ngan Luwah a ne, j'a kɨ ngah nyamajg'n Luwah unɨn kɔn an n'an n'ad deg lon. Ĩn ngégana dɔ nyamajgt'n non nat kɨ Krist, ĩla kɨ ngahkõ nat sia a ne, j'a kɨ ngah kɔsɨgon nat sia tɔ.
Luwah a ad kɔsɨgon ngãi
(Oo Jã 10:27-30)
18Kɨtɔ m'ger maj kad kõg'n ndɨ kɨ ngah dɔkaglot kɨ ɓone, j'asɨ kad kɨ mbɔj nat kɨ kɔsɨgon'n Luwah a adj nõ al. 19Nyag tube'n Luwah ndahd ye, ndɨ ngoon kaglo'n Luwah a tee hɔi kɨ kɔsɨgon kɨ ɗa ngereng ad nganɨng oon. 20Nyag tube'n Luwah ndahd ye, la dɔd girr tɔgt kɨ pãbe, na i kɨgo ndigt lod al, na kɨgo ndigt lo Luwah. Be kaa ne, nya ndahkamdɔt to nõ kɨtad. 21Kɨtɔ, nya kɨ ndahg, ndɔ mad ĩn kɨɓe a ngahn dɔd a taanyand dõ girr tɔgt lo ɓer kad tujɨn al, kad ngahn dɔ kɨmaj kɨ tɔitɔi, tit'n ngahn Luwah ngan ne dɔd ye be. 22Kɨtɔ kɨ ger nyakɨndahg ndɨ tõn ɗusɨɗusɨ, ndɨ ngahn kõ tit dekɨdẽ'n to kooj ndɨ ɗaa be. 23I nyandahg hã ngahn kõ kɨ kɨɗad al, na jĩn Luwah adj Ndilɨn tit kand kɨ dasabang, ad i kadkarig kɨdasabang lo kadkarig lo Luwah tube ye, kɨ ndɨ kɨ tõ ɗusɨɗusɨ kamjt, kɨ ngoon Luwah kad telj nganɨnt, kad badɔ dãroj ɔrrjɨn kamkõt. 24Kɨtakul kam kɨ ndadɔt la j'ajɨn ye, na ĩla j'oon nya tã kɨ ndahnkamj dɔt a ne, i kam kɨ ndadɔt kɨ jeje al. Nõ nda kamɨn dɔ nyat'n ndɨ oo a? 25Na ĩla ndɨ kɨ ndah kamj dɔ nyat kɨ j'oo al ɓaitɔ a ne, i kɨ hɔtɔgba la ndɨ kɨ ngoon ye. 26Titbe tɔ la Ndil ndɨ ɗan sej kɨta jĩ deg kɨ tõ. Kɨtɔ kɨ ger ɗob kɔ nya kam keltat kɨ Luwah loj al. Na Ndil Luwah ndɨ elta kɨ Luwah kɨ ngarkamɨn kɨtaagbe kɨ tõ ɗusɨɗusɨ kɨ dum kel kɨtaj. 27Na Luwah kɨ ngendio ngarkam deg ger nya'n Ndil ndig kɨta Ndil ndɨ kɔ kɨta deg kɨjaɓat kɨgo ndigt lo Luwah.
Kand tar lo Luwah
(Oo Epe 1:3-12; Rom 5:1-11; Jã 10:27-30)
28Kɨ ndɨ kɨ ger maj Luwah ndɨ ɗa kɨla kam nyagt tube kad maj urrɨn ngétar Luwah, ad i deg'n Luwah kund kɨgo kɔjɗat lon. 29Kɨtɔ deg'n Luwah gerd kete ye, ndahd kete woi kad telɨn tit ngonɨn, kɨtakad ngona, i ngon derr ku ngankõt ngãibe. 30Deg'n Luwah ndahd kete woi ye, ĩn la Luwah kund ho ye; deg'n Luwah kund ye, ĩn la Luwah ɔrrta dɔdt ho ye, na ĩgɨn Luwah ɔrrta dɔdt ye, Luwah ad'd kɔsɨgon tɔ.
Nya mad kɨ asɨ gangj nat kɨ tar lo Luwah goto
31Lon titbe ye ka j'an ɗi dɔ nyagt 'nten a? Ĩla Luwah i nat sej a ne, nõ asɨ ndoorj a? 32Luwah'n hã asɨ kɔrr ngonɨn kɨ kɔsɨdɔn kɨ gog al, na laa kɨ koit gan gootj tube ye, titbãi hã a adj nyag tube butbut kɨ dɔt be al a? 33Nõ a un dɔ kɨ mbedg lo Luwah a? Luwah ĩ kɨɓe ɔrrta dɔdt. 34Nõ a hɔj kɨ ta a? Krist Jeju oi kɨtaj, kɨtɔi 'nten, ɓai lo koit, ndɨ ko jikõ Luwaht, ndɨ kɔ kɨtaj. 35Nõ asɨ gangj nat kɨ tar lo Krist a? Kamkɔl a ke jarongot? Darondo a ke ɓo kɨ so, ro kɨ kil yolel, a ke so ta koit, a ke tanyakat't? 36Kɨgo tat'n ndangɨn kam maktubt anan: Kɨtatɔi la ndɨ tɔljɨn ne kɨ sĩ mbã kàd udɨn ye. Oojɨn tit batg kɨ ɗan lo tɔldt be.
37Na kam nyagt'n non tube jĩ kɨ tɔi ngétetɗɔɔ kɨtakul Krist ngetarj. 38Kɨtɔ m'ger kɔi kɔi ad kamm sokɨber, ke koi, ke ndɨ kɨ dɔ dõ, ke malaikag, ke bɨradɔ ngékõɓeg, ke nyag kɨ tajigla, ke nyag'n a ɗen, ke tɔgg, 39ke lo kɨ ngal kɨ dõ, ke lo kɨ kokɨɓing kɨber, ke nya mad kɨ ndah kɨ asɨ gangj nat kɨ tarɨn Luwah ɔj'j kam Krist Jejut kɨ Bɨraɓe loj goto.
Nu markerat:
Romag 8: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.