Kɨlag 16
16
Timote aw nat kɨ Pol kɨ Silas
1Pol aw tee kam ɓet kɨ Derb, kamla tɔi aw Listɨr. Nõbe ngendoo mad lo Jeju ndit nõ tɔa i Timote. Kõa i Juip kɨ tel ngetaata lo Krist, na bɔwa i Grek. 2Ngétaata lo Krist kɨ kam ɓet kɨ Listɨr ho Ikonium ho, man naj maj ngãi dɔ Timotet. 3Pol ndig kad aw sen; ada ja gaj kɨta Juipg'n ndɨn kam dɔningt'n non gerɨn kad bɔw Timote i Grek. 4Pol kɨ Silas awɨn, a lan go ɓeg, a elɨn deg kɨ ngétaata lo Krist mber'n ngombangkɨlag kɨ kɨbo lo ngékawnag kɨ Jerusalem ndan deg kad telɨn rod go ndɨ kunt'n non.
5Kɨtɔ 'nten ngékawnag ngangɨn ne kam kadkamt lod, kɔrd kaa ne, bɨla kɨ dɔt dɔt kɨndɔgndɔg.
Pol oo nyakamndilt kam ɓet kɨ Troas
6Lon ten kam dɔning Ajit ye, Ndil Kɨkunjɗang ɔgd la mber ta lo Luwah, ad ndan dɔning Pirji kɨ dɔning Galati gangɨn. 7Lon aw teen nderbe kad dɔning Mysit ye, ɗa kɨ n'awɨn dɔning Bitinit; na Ndil Jeju ɔgd dɔ, nya ta ɗob ad'd al. 8Kɨtɔ 'nten ndan dɔning Mysi gangɨn, kamla awɨn takumkaat kɨbo kɨ Troas. 9Na dan lot ndɔ, Pol oo nyakookamndilt, oo de mad kɨ Masedɔant ɗa kɨ njan dõ, kɔ Pol kɨ rotĩn an: I gang bahbo kat kɨ Masedɔan, na i ɗe i ɗa sej.
10Tajigt, lon Pol oo nya'n non kam ndilt ye, kɨ sah kad j'aw kam dɔning Masedɔant. Jĩ kɨ kam kɨ ger ɓet kad i Luwah la ndɨ kunj kad kɨ la mber Hoita kɨmaj tit nu ye.
Lidi ad kamɨn Bɨraɓe Jeju kam ɓet kɨ Pilip
11Kɨ ɓai kam toot kɨbo kam ɓet kɨ Troas, kɨ sumba koor lo kɨ Samotrasɨt kɨɗing sew. Loti got kɨ ɓa taj kɨ Nẽapolist. 12Nõbe j'un dɔj kɨ ɓebot kɨ Pilip. Pilip i ɓe kɨbo ngãi kam dɔning Masedɔant i ɓebo kɨ kam ɓekõt lo Romag, kɨ ɗa ndɔg asɨ tat kam ɓet'n non. 13Ndɔ taakò lo Juipg la kɨ tee kam ɓet kɨ tabit ndog bɔrrt kɨ tɨga, j'aw ta baht mad. Kɨtɔ kɨ j'oo a j'an: Lot'n non j'a kɨ ngah lo kelta kɨ Luwah lo Juipg tit, kɨ ndɨ ber, j'elta dekɨdẽg'n kawɨn na kɨ nat. 14Kɨmad ku dekɨdẽgt'n non tɔa i Lidi, oojɨna ɓebot kɨ Tiatir. Lidi i ngeɗaw kub kɨ kɨrre wor wor, kamla i ngeɗa nya kɨgo lo Luwaht, ad dekɨdẽ'n non nel mbin kɨ rojt. Bɨraɓe tee ngarkama kad nel mbin oon dɔ tag lo Pol maj. 15Ɗa baptem nat kɨ ngékɨɓe lon tube. Ndɨjej an: Ĩla oomɨn tit de kɨ ngetaata lo Bɨraɓe jeje a ne, j'awɨn ɓe lom kad i ndɨnt. Ɗaj bee ad j'aw kɨ hɔ lo ndɨ roat.
Lan Pol kɨ Silas dangait kam ɓebot kɨ Pilip
16Ndɔ mad, lon ndɨ kɨ j'aw lo keltat kɨ Luwah ye, ngon kɨdẽ mad ɗe ndɔdj, aw kɨ ndil kɨmajal kamɨnt nõ, ĩn ada tɔg ndõ tee ad a ɔrr girr nyag'n ɓet a ɗa deg. Ngah nya ngãi ad ngéng kɨtakul teen a ndõ nõ. 17Lon ngon kɨdẽ'n non ooj ye, a ndulo goj kɨ Pol, a ko kɨ ndin kɨbo an: Deg'n ɗan ĩn ɓerkɨlag lo Luwah kɨ Ngetɔitɔi, ɗa dan deg ɗob kaj. 18Ngon kɨdẽ'n non a ɗa titbe kɨndɔgndɔg. Ad Pol ɓawong, na mbel gidɨn ndáng ndil kɨmajal'n non an: Kam tɔ Jeju Krist't i tee kɔ kam dekɨdẽt'n ɗan. Tajigt ndil tee kɔ kamat.
19Na lon ngéag oon kad nya ngah nya lod'n ndan kamd dɔt goto ye, hɔn Pol kɨ Silas, ndɔrɨnd awɨn sed suku nõ ngékõɓegt. 20Awɨn sed nõ ngégangtagt lo romag, na elɨn anan: Deg'n ɗan ĩn Juipg, na ɗan ad ta ɓai ngãi kam ɓet loj.
21Ɗa ndoon deg nyabelɓeg kɨ mbah kokɨrojt, sumba kad jĩ deg kɨ Romat kɨ tel roj goot al ho, kɨ ngom al ho. 22Koosɨdeg ɓan wong kɨ tɨngabil kɨ Pol kɨ Silas. Romag kɨ ngégangtag ngĩn kubg rodt kɔ, na ndand kɨ ndeh. 23Lon ndand kɨ ndeh riw riw woi ye, land dangait kamla ndan mber ngengom dangai kad ngomd maj. 24Lon bɨradɔ dangai oo ta titbe ye, lad kam dangait keme kɔrɔng, la kag njadt.
25Na danlot, Pol kɨ Silas ndɨ elɨn ta kɨ Luwah ho, ndɨ ɔsɨn pa ndubɨn ne Luwah ho. De dangaig kaa ne, oon dɔ ndid. 26Tentenbe, yee dɔning kɨbobe hurd rukɨ, mbã ad kuj dangai yee yɨkɨtyɨkɨt. Tentenbe tabitg teen tad, jinjir dɔɔ de dangaig ɓain ta nat ɓatil-ɓatil. 27Lon bɨradɔ ngengom dangai ndool dɔ ɓit oo tabitg lo dangai ɗan tag tube ye, hɔ kiyaɗɔɔ lon tui hawat kɨ'n tɔlɨn ron, oo a an: Deg kɨ dangait ãin na. 28Na Pol ko kɨ ndin kɨbobe an: Ot ɗa roi majal, kɨta jĩ ne tube.
29Kamla bɨradɔ ngengom dangai ndɨje kad ɗen kɨ lamba, and kanangbe kam dangait kɨ ɓool kɨ ro ndad yatɨt, so kɨ nja Polt kɨ Silas. 30Ad'd teen kɨ tɨga, kamla ndɨjed an: Bɔwmg, ɗi maj kad m'ɗa kad m'ngan kaj a?
31Turɨna anan: Adkami Bɨraɓe Jeju, na a aj, ĩ kɨ ngékɨɓe loi.
32Elɨna ta lo Bɨraɓe kɨ deg tube'n ndɨn kam kujt loa. 33Kaglot kɨ ndɔ nõ, bɨra dɔ ngengom dangaig aw kɨ Pol kɨ Silas tugo ta doog lod, tajigt ad ɗana baptem nat kɨ deg kɨ ɓe loa tube. 34Aw sed kam kujt lon ad'd nyasa kad san. De'n non ɗa ronel nat kɨ ngékɨɓe lon kɨta tel ngetaata kɨ ta Luwaht. 35Lon loti ye, ngégangtag lan ngéɗɔɔg kad elɨn bɨradɔ ngengom dangai an: Ɔrr deg'n non i nyad dõ ad awɨn.
36Bɨradɔ ngengom dangaig elta'n non Pol an: Ngégangtag la elmɨn kad kɨ m'ɔrrsɨ kɔ kam dangait ye, tajigla i teen, na awɨn kɨ lapia.
37Na Pol elta ngengom dangaig an: Kɨ kanj kad gangɨnta dɔjt, ndajɨn mbukɨmbukɨ kɨ tɨga wang nõ degt, jĩn jĩ Romag ye, hɔjɨn lajɨn dangait, na tajigla ndɨ tuɓanjɨn gid tilt e? A i titbe al. Ad ĩn kɨɓeg kɨ dɔd ɗe ɔrrjɨn kɔ kam dangait 38Ngan ngékɨlag telɨn kɨ tag'n non kɨ ro ngégangtagt lo romag. Lon oo gerɨn kad ĩn romag ye, ɓoolɨn, 39ɗe ndɨjen kam kɨsokɨber kokɨro Polt kɨ Silas, kamla ɔrrɨnd kɔ kam dangait, ndɨjend kad teen kam ɓet lod kɔ. 40Pol kɨ Silas teen kam dangait, awɨn ɓe lo Lidi, lon ngahn ngankõ ngétaata lo Krist tit ye, adɨnd tɔg kamla ɓai awɨn ye.
Nu markerat:
Kɨlag 16: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.
