Tuk 34
34
Buɔ̱ŋ Dina kɛ buɔ̱m
1Kɛ cäŋ kɛl ci nya Je-kɔb nya ciekdɛ ni Leya mi cɔal i̱ Dina kac raar kɛ ɣöö bɛ wä muɔŋä kä män wec. 2Kä mëë ci Cɛ-kɛm min la gat Ɣä-mor raan Iwi min la kuäär wec jɛ nɛn, cuɛ jɛ käp kä cuɛ jɛ ka̱n kɛ buɔ̱m. 3Kä nɛ̈nɛ jɛ, min ci Dina tɛth lɔɔcdɛ kɛ ɣöö cɛ jɛ go̱r ɛn ɣöö de̱rɛ la ciekdɛ, cuɛ ruac kɛ jɛ ni kɔ̱c kɛ ɣöö bɛ lɔcdɛ jak kä tɛth. 4Kä ni ɛn wa̱nɔ cuɛ gua̱n ni Ɣä-mor jiök i̱, “Ɣän göörä kuën nya mi.” 5Kä mëë ci Je-kɔb ɛ liŋ ɛn ɣöö ca nyaadɛ ni Dina ŋar ŋar, cuɛ lɔcdɛ ka̱p piny kɛ ɣöö ci gaatkɛ wä yi̱en ɣɔ̱ɔ̱k kä cuɛ thokdɛ dɛ̈ŋ thi̱n amäni lunydiɛn jɔk.
6Ɛ jɛn cu gua̱n Cɛ-kɛm ni Ɣä-mor jiɛɛn kä cuɛ ben kä Je-kɔb kɛ ɣöö bikɛ nɔmɔ ben ca̱a̱t kɛɛl. 7Kä min ci gaat Je-kɔb luny jɔk kɔɔr ɣɔ̱ɔ̱k, cukɛ thuk tɔ̱tɔ̱ liŋ, kä cuɛ lo̱ckiɛn waŋ a bɛ kɛ kɔ̱p kɛ ŋɛ̈ɛ̈ny kɛ ɣöö Cɛ-kɛm cɛ ji̱ I-thɛ-rɛl dhɔ̱l kɛ känidɛ kɛ nya Je-kɔb, dhɔa̱a̱l mi /ca dëë liɛŋ piny. 8Duundɛ ɣöö cu Ɣä-mor ruac kɛ kɛ i̱, “Ɛpuc, gatdä ni Cɛ-kɛm nhɔkɛ nyaadun. A jɛ kuɛɛ kuɛn. 9Kä banɛ cu tekɛ kuën kamnikɔn. A kɔ kuɛnkɛ nyieekun, kä bia nyieekɔ kuɛ̈n. 10Inɔ, yɛn dërɛ cu cieŋ kɛ kɔ kɛɛl kä bi wecda cua wecdun. Ciëŋɛ kä ja̱lɛ thi̱n kɛ pe̱k lɔaacdun, kä tëmɛ rɔ̱ mun thi̱n.” 11Kä Cɛ-kɛm cuɛ gua̱n kɛnɛ dämani Dina ku jiök i̱, “Pa̱lɛ ɣä min cä la̱t, kä bä tin diaal tin bia thi̱ec ka̱m yɛ. 12Jakɛ pe̱k kuen kä wä nhial ce̱tnikɛ min go̱rɛ, kä bä kɛ ŋun. Duundɛ ɣöö bia nyal ka̱m ɣä.” 13Kä nɛ̈nɛ jɛ, cu gaat Je-kɔb Cɛ-kɛm kɛnɛ gua̱n ni Ɣä-mor pɛl, kɛ ɣöö cɛ nyimandiɛn ya̱r. 14Kä cukɛ kɛ jiök i̱, “/Cakɔ nɔmɔ dëë cäp ɛn ɣöö dëëkɔ nyimaara ka̱m wut mi /ka̱n cuɛl, kɛ ɣöö nɔmɔ ɛ buar kä kɔ. 15Bakɔ jɛ ka̱m yɛ kɛ luɔt kɛl, ɛ ɣöö yɛn bia la kɛl kɛ kɔ kɛ cuël tutni diaal rɛydun. 16Ɛ jɛn bakɔ nyieekɔ cu ka̱m yɛ kɛ kuën, kä bakɔ nyieekun cu kuɛ̈n. Bakɔ cu cieŋ kɛ yɛ kɛɛl kä bakɔ cua do̱r kɛl kɛ yɛ. 17Kuɛ la ɣöö, mi /cia cuël bi nhɔk, bakɔ nyaada naŋ kä bakɔ cu wä.” 18Cu Ɣä-mor kɛnɛ gatdɛ ni Cɛ-kɛm ruacdiɛn nhɔk. 19Kä cu ŋuɛ̈t ɛ wä la̱t ni kä kɛɛl, kɛ ɣöö cɛ nya Je-kɔb nhɔk ɛlɔ̱ŋ, kä ɛ jɛn ram kɛl in luɔ̱thkɛ ni jɛ ɛlɔ̱ŋ thok duëël gua̱n.
20Cu nɔmɔ tuɔɔk, mëë ci Ɣä-mor kɛnɛ gatdɛ ni Cɛ-kɛm cop thok wec in la duɔl nɛɛkiɛn thi̱n, cukɛ ruac kɛ ji̱ wec wä kɛ i̱, 21“Kɛn nɛy ti̱ti̱ kɛ ji̱ maarä kɛ kɔn, kɛ kui̱ ɛmɔ akɛ cieŋ muundan kä akɛ jäl thi̱n, kɛ ɣöö tëë kɛ gua̱a̱th rɛy wec ɛ kɛ kui̱diɛn. Kuɛ̈nɛ nyieekiɛn kä akɛ kuɛ̈nkɛ nyieekɔn. 22Kä cukɛ kɛ jiök bä ɛn ɣöö ci nɛy tɔ̱tɔ̱ jɛ lar i̱ bikɛ cieŋ kɛ kɔn kɛɛl kä bikɛ la do̱r kɛl kɛ kɔn kɛ luɔt kɛl kärɔa, ɛ ɣöö tut diaal rɛydan ba kɛ cuɛ̈l ce̱tkɛ min tekɛ kɛ. 23Ɛ jɛn bi kuakiɛn kɛnɛ ɣɔ̱ɔ̱kiɛn cu la nyinkɔn. Inɔ, kuanɛ min ca go̱r ɛ kɛn la̱t kɛ ɣöö de̱e̱kɛ cu cieŋ kɛ kɔn kɛɛl.” 24Cu wutni diaal tëë ca rɔ̱ dol ɛn thok wec ruac Ɣä-mor kɛnɛ gatdɛ ni Cɛ-kɛm nhɔk, kä cuakɛ cuɛ̈l.
25Kɛ kɔr ni̱ni da̱ŋ diɔ̱k guäth ëë ŋot buɔ̱ɔ̱tkiɛn kɛ bɛc, cu gaat Je-kɔb da̱ŋ rɛw Cim-on kɛnɛ Lii-bay tin la gaat man Dina pa̱ny ben jäl ramɔ kɛ thɛpdɛ, kä cukɛ coth rɛy wec a thil mi gaŋkɛ, kä cukɛ wutnikɛ diaal näk, 26amäni Ɣä-mor kɛnɛ gatdɛ ni Cɛ-kɛm. Kä cukɛ Dina nööŋ raar due̱e̱l Cɛ-kɛm kä cukɛ wä. 27Täämɛ cu duɔth gan Je-kɔb tin kɔ̱ŋ ben bä, kä cukɛ kɛ ben nyɔk kɛ gi̱t, kä cukɛ dhɔr rɛydɛ thol, kɛ ɣöö ca nyimandiɛn ŋar ŋar. 28Cukɛ detkiɛn naŋ kɛ ɣɔ̱ɔ̱kiɛn kɛ muɔ̱likiɛn, ŋɔak diaal tëë te rɛy wec amäni tëë te dɔɔr. 29Cukɛ kuakiɛn diaal pɛc kɛnɛ gaatkiɛn kɛ mänkiɛn, cu mäni tin diaal tin te rɛy ti̱ecni cukɛ kɛ thol. 30Ɛn wa̱nɔ cu Je-kɔb Cim-on kɛnɛ Lii-bay ku jiök i̱, “Yɛn cia ɣä jak kä ram mi ba nyir ɛ ji̱ Kɛ-naan kɛnɛ ji̱ Pɛ-rii-dhi tin ciaŋkɛ ro̱l ɛmɛ, kä cia kɛ̈kdä ya̱r rɛydiɛn. Mi wäkɛ rɔ̱ mat, bikɛ ɣä mak piny, kä bä cu li̱w kɛɛl kɔnɛ thok duëëlä, kɛ ɣöö kuiy nɛɛkä.” 31Kä cukɛ kac nhial kɛ jɛ i̱, “A dëëkɔ nyimaara ku jak kä cieŋɛ ce̱tkɛ ram mi riär?”
Nu markerat:
Tuk 34: nusNHB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Nuer Bible © Bible Society in South Sudan 1998,2012.