San Juan 18

Sákjuíko sin Jesús tsjakꞌechjina

(Mt. 26:47-56; Mr. 14:43-50; Lc. 22:47-53)

1A̱ndá ti ó kjuixin ndáchro chꞌin Jesús kaín tíha, ndá jehe chꞌan la ko ti sin kꞌuájiko chꞌan la kꞌuatóye̱ sin ti tsa̱ka sítji ìnta̱ itꞌin Cedrón. Mé ntiha itjen ijnko huerto siín nchónhña inta la ntiha kꞌuíxehen sin. 2Kja̱xin Judas, ti nkexro sinchekji ti chꞌin Jesús, mé nohe kixin ntiha itjen ti huerto kixin ntiha nkoya̱xón tónkotséko chꞌin Jesús ti sin kꞌuájiko. 3Méxra̱ Judas la kjuíji ntiha, kjuíjiko nchónhña ti sin soldado la ko iso policía kuènté ti ni̱nko ichrꞌán ti sin ncha̱tꞌá tꞌe̱to̱an la ko ti sin fariseo. La kjuíji sin xraá sin espada la ko xrohi tꞌinkaséñaxín ti kjuíjixín sin. 4A̱ndá chꞌin Jesús ó nohe kaín ti nkehe tsꞌatsínka, la kóchjina, la sa̱o kjuanchankí, ndáchro:

―¿Xá nkexro ti xritjéyára?

5Ndá jehe sin ndáchro sin:

―Xritjeyáni ti chꞌin Jesús tsíkji̱xi̱n Nazaret.

Ndá kjuáte̱he chꞌin Jesús ndáchro:

―Janhan tíha.

A̱ndá Judas, ti nkexro tsíkjinchekji ti chꞌin Jesús, mé ntiha tjenkákjan chꞌan ikui chꞌan. 6A̱ndá ti ó kjuáte̱he chꞌin Jesús kixin jehe chꞌan tíha, ndá jehe sin kjuixin iton sin, la kꞌuitsínka sin. 7A̱ndá chꞌin Jesús xíkjanchankí, ndáchro:

―¿Xá nkexro ti xritjéyára?

Ndá ndáchro sin:

―Tjeyáni ti chꞌin Jesús tsíkji̱xi̱n Nazaret.

8Ndá chꞌin Jesús ínaá ndáchro:

―Ó kjuixin tjo̱nka̱ra kixin janhan tíha. Ti janhan xritjéyára la ti̱to̱héra sátsji ti sin xríki̱a̱n.

9Mé xi̱kaha ndáchro chꞌin Jesús kixin tsoxiteyá ti nkehe tsíndáchro chꞌan: “Itꞌéni, ti sin kjuánjua, la ninkexró kꞌuitjáñahña.” 10Ndá chꞌin Simón Pedro kuakitsje ti espada kuènté la kóchríjin ndatsjon chjina ijnko ti nkexro itꞌin Malco, ti nkexro chꞌehe ixra̱ ti ncha̱tꞌá tꞌe̱to̱an. 11#Mt. 26:39; Mr. 14:36; Lc. 22:42.*A̱ndá chꞌin Jesús ndáche ti chꞌin Pedro:

―Tjakꞌéchji̱na ti espada méhe̱. Ti kꞌue̱to̱an Tꞌaná kixin itsjé tsjasótena la, ¿á jehya ticháxi̱n xi̱kaha tso̱hen ní?

Chꞌin Jesús kjuákꞌe nkayakon ti ncha̱tꞌá tꞌe̱to̱an

(Mt. 26:57-58; Mr. 14:53-54; Lc. 22:54)

12A̱ndá ti sin soldado la ko ti sin comandante la ko ti sin policía judío kuènté ti ni̱nko mé itsé sin ti chꞌin Jesús la kjuínchenteto sin. 13Ndá sákjuíko sin chꞌan ndo̱e ti chꞌin Anás, ichꞌe̱e ti chꞌin Caifás, ti ncha̱tꞌá tꞌe̱to̱an ti nánó a. 14#Jn. 11:49, 50.*Ti chꞌin Caifás mé ti nkexro tsíndáche ti sin judío kixin ícha jína nkoko̱a chojni chrókꞌuenyákohe̱n ti nación.

Pedro kjuínchemá kixin chóxinhña ti chꞌin Jesús

(Mt. 26:69-70; Mr. 14:66-68; Lc. 22:55-57)

15Chꞌin Simón Pedro la ko íjnko ti nkexro kuékꞌajiko chꞌin Jesús mé nkáchréhe̱ sin ti chꞌin Jesús. A̱ndá ti íjnko chꞌin mé xráxín chóxin chꞌan ti ncha̱tꞌá tꞌe̱to̱an, méxra̱ kꞌuixenko chꞌan ti chꞌin Jesús ti nda̱sin ti ndo̱e ti ncha̱tꞌá. 16Kjánchó chꞌin Pedro la ndója ó kuíto̱he. A̱ndá ti íjnko nkexro kꞌuájiko chꞌin Jesús xráxín chóxin ti ncha̱tꞌá tꞌe̱to̱an mé kꞌuaxrje chꞌan la nixje̱he̱ chꞌan ti tjan tjenta ndója ti nda̱sin la chrónoéhe̱ chꞌan tjan ndá kjuajon tjan kjuachaxin kꞌuíxehen ti chꞌin Pedro. 17A̱ndá ti tjan tjenta ti ndója nda̱sin mé kjuanchankíhi tjan ti chꞌin Pedro:

―¿Á jehya kja̱xian xriko̱a ti nkexro a ní?

Ndá chꞌin Pedro ndáchro:

―Náhí, xríki̱a̱nhña chꞌan.

18Ndá imá kókin ntiha ndá ti sin chꞌexín ixra̱ la ko ti sin policía mé kjuaka sin xrohi la tjejóxin to̱té sin chjixro̱he sin. La koí chꞌin Pedro tjechjíxro̱he chꞌan ntiha.

Ti ncha̱tꞌá tꞌe̱to̱an kjuanchankíhi ti chꞌin Jesús

(Mt. 26:59-66; Mr. 14:55-64; Lc. 22:66-71)

19Ndá ti ncha̱tꞌá tꞌe̱to̱an kjuankíxin kjuanchankíhi ti chꞌin Jesús kixin nkexro ti sin kꞌuájiko chꞌan la ko nkehe ti kjuako chꞌan. 20Ndá kjuáte̱he chꞌin Jesús ndáchro:

―Noxín kjuakꞌé kjuàkua, kꞌuíkon kaín chojni. Xráxín kꞌuékjáko̱xia̱n kaín nchia xrakoaxin ti sin judío la ko ti ni̱nko tónkotséxin sin la ninkehó nkehe kjuáko̱hya ómó. 21Ndá, ¿nkekuènté janhan tjanchankia kaín tíha? Chrokjuanchankíhí ti sin kuíhin nkexrín kjuàkua. Jehe sin la kjá nohe sin ti nkehe kjuàkua ―ichro chꞌin Jesús.

22La na̱ntá kjuixin ndáchro chꞌin Jesús tíha, ndá ijnko ti policía kuènté ti ni̱nko, mé chjéhe nkayakon ti chꞌin Jesús la ndáchro:

―¿Á xi̱kaha tsjate̱hé ti nkehe tjanchankí ti ncha̱tꞌá tꞌe̱to̱an ní?

23Ndá kjuáte̱he chꞌin Jesús, ndáchro:

―Ti nduáhya ti nkehe xrja̱nká la chro̱nka nkehe tíha. A̱ndá ti ndoá ti nkehe xrja̱nká, ¿la nkekuènté kꞌoká?

24Ndá chꞌin Anás kꞌue̱to̱an kixin tjechróntetoxíhin chꞌin Jesús sátsjiko sin ti itjen chꞌin Caifás, ti ncha̱tꞌá tꞌe̱to̱an.

Pedro ínaá xíkjinchemá kixin chónhña ti chꞌin Jesús

(Mt. 26:71-75; Mr. 14:69-72; Lc. 22:58-62)

25Ndá chꞌin Simón Pedro mé na̱xa̱ tjexín chꞌan to̱té chꞌan tjechjíxro̱he. Ndá ijnko nkexro kjuanchankíhi ti jehe chꞌan, ndáchro:

―¿Á kja̱xinhña xriko̱a ti nkexro i ní?

Ndá chꞌin Pedro kjuínchemá ínaá, ndáchro:

―Náhí, chónhña ti nkexro a.

26A̱ndá ijnko ti nkexro chꞌehe ixra̱ ti ncha̱tꞌá tꞌe̱to̱an, na̱xa̱ kjéhya ti nkexro tsíkóchríjihin Pedro ndatsjon, mé kjuanchankí ndáchro:

―¿Á jehya jaha ti kꞌuíkua̱n tjeko̱a chꞌan ti huerto ní?

27Ndá chꞌin Pedro xíkjinchemá ínaá kixin jehya chꞌan tíha. Ndá xrína̱hña tuénxín itsje ijnko kochi̱ntólá.

Chꞌin Jesús kjuákꞌe nkayakon ti chꞌin Pilato

(Mt. 27:1-2, 11-14; Mr. 15:1-5; Lc. 23:1-5)

28Ndá ti ó kꞌuínkaséña kꞌuaxrjexín sin ndo̱e chꞌin Caifás, sákjuíko sin chꞌin Jesús ti palacio tꞌe̱to̱axín ti gobernador. Ndá ti ó kjuíji sin ntiha la ti sin judío la kꞌuixenhña sin ti palacio kixin ti chrókꞌuixehen sin la chrókuamá sin ti ijie̱ siín ntiha la í xrokjuahya sinie sin ti nkehe tsꞌixin ti kia Pascua. 29Ndá chꞌin Pilato kꞌuaxrjexín ti nchia itjen tꞌe̱to̱an la kjuanchankí, ndáchro:

―¿Xá nke ijie̱ chónta ti nkexro i?

30Ndá kjuáte̱he sin ndáchro sin:

―Ti chróchóntahya chꞌan ijie̱ la chrókjui̱kohyani chꞌan ntihi.

31Ndá kꞌue̱to̱an chꞌin Pilato, ndáchro:

―Sátjikoára chꞌan, nchekito̱exínra ti iji̱é chꞌan éxi ndáchro ti ley kuèntára.

Ndá kjuáte̱he ti sin judío, ndáchro:

―Jeheni chojni judío la chóntahyani kjuachaxin tsꞌóñáni ninkexró.

32 # Jn. 3:14; 12:32. *Mé xi̱kaha xiteyá ti nkehe tsíndáchro chꞌin Jesús kixin nkexrín tsꞌenxín chꞌan. 33Ndá chꞌin Pilato xíkꞌixehen ti nchia itjen tꞌe̱to̱an, ndá kꞌuéye̱he̱ ti chꞌin Jesús la kjuanchankí, ndáchro:

―¿Á jaha ti rey kuènté ti sin judío ní?

34Ndá ndáchro chꞌin Jesús:

―Ti nkehe tjánchánkia la, ¿á jahuá kjuénka̱yáxian ní, o̱ íjnko nkexro chrónka?

35Ndá kjuáte̱he chꞌin Pilato, ndáchro:

―¿Xá á janhan ijnko judío ní? Ti sin chjasán la ko ti sin ncha̱tꞌá tꞌe̱to̱an mé kjui̱ka̱o sin ti jaha. ¿Xá nkehe kjui̱chꞌe?

36Ndá kjuáte̱he chꞌin Jesús ndáchro:

―Ti kjuachaxin chonta janhan la jehya kuènté ti chjasintajni. Náhí. Kixin ti chrókóxi̱kaha, la itsjé ti sin kuénta̱na la chrókjuajo̱nko ti sin judío kixin chrótséhya sin ti janhan, la chrókjui̱ka̱ohya sin ti janhan ntihi; kjánchó ti kjuachaxin chonta janhan la jehya kuènté chjasintajni.

37A̱ndá chꞌin Pilato kjuanchankí, ndáchro:

―¿Á chaxín jaha ijnko rey ní?

Ndá kjuáte̱he chꞌin Jesús, ndáchro:

―Janhan ti rey ndáchrua jaha. Janhan kokjína la ko kꞌuinka chjasintajni kixin tso̱xrja̱nka ti nkehe chaxín ndoá. Kaín ti sin titekaon ti nkehe chaxín ndoá mé tjejótihin sin ti nkehe tjàkua.

38Ndá ndáchro chꞌin Pilato:

―¿Xá nkehe ti nkehe chaxín ndoá?

Ndá kjuixin kjuanchankí chꞌin Pilato tíha, ndá kꞌuaxrjexín chꞌan ntiha, la sákjuí chꞌan ti tjejó ti sin judío, la ndáchro chꞌan:

―Kꞌuitjáhya ninkehó ijie̱ chónta ti nkexro i. 39Kjánchó jahara la ó kuáhanra kixin ti kia Pascua la tjánjua kjuachaxin kixin tsꞌaxrje ijnko nkexro tjechjina. ¿Á tjinkáonra kixin tsꞌatjánta ti Rey kuènté ti sin judío ní?

40Ndá kaín sin kꞌóyako sin, ndáchro sin:

―Ti chꞌin a, la náhí. Tꞌa̱tjánta Barrabás.

Kjánchó Barrabás mé ijnko chojni tjasin kjuanínkaon.

Lär dig mer om El Nuevo Testamento, Salmos y Proverbios

San Juan 18

Populära bibelverser från San Juan 18

Populära bibelverser från
San Juan 18