Recording of the Inuktitut NT without background music.

Eastern Arctic Inuktitut Bible © Canadian Bible Society, 2012, 2021. ℗ Hosanna 2023

Inuktitut - CBS (NT) Non Drama

Inuktitut - CBS (NT) Drama

ᔩᓱᓯᐅᑉ ᐊᔪᕆᕐᑐᕐᐰᑦ ᐊᑦᔨᐅᔪᑎᒍᑦ, ᐅᖃᕐᓗᓂ: “ᑍᑦᓱᒪᓂ ᐊᖑᑎᑕᖃᓚᐅᕐᐳᖅ ᐱᕈᕐᓰᕕᖕᒥᓂ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᔪᒥᒃ, ᐃᑎᕐᓴᓕᐅᕐᓗᓂ ᐅᐂᓂᑦ ᐃᑦᓯᔭᕐᑕᐅᕕᒃᓴᖓᓂᒃ, ᑕᕝᕙᓂ ᐃᒡᓗᓕᐅᕐᐳᖅ ᐳᕐᑐᔪᒥᒃ ᖃᐅᔨᓴᕐᕕᒃᓴᒥᒃ, ᐱᕈᕐᓰᕕᒃ ᐊᑐᕐᑕᐅᑎᑉᐹ ᑲᒪᔨᐅᓂᐊᕐᑐᓄᑦ, ᐱᔭᕇᕋᒥ ᓄᓇᐅᑉ ᐊᓯᐊᓄᑦ ᐊᐅᓪᓚᕐᐳᖅ. ᐱᕈᕐᑐᓂᒃ ᐅᐂᓂᒃᓴᓂᒃ ᑲᑎᕐᓯᕕᒃ ᓇᓪᓕᐅᑎᖕᒪᑦ, ᐱᔨᒥᓂᒃ ᑎᓕᓯᕗᖅ ᐱᕈᕐᓰᕕᖕᒥᒃ ᑲᒪᔨᐅᑎᑕᒥᓄᑦ, ᑖᓐᓇ ᐂᒃᓯᖁᓪᓗᒍ ᐱᕈᕐᑐᕕᓃᑦ ᐃᓚᖏᓐᓂᒃ ᐱᑎᑕᐅᔪᒪᓪᓗᓂ. ᐱᕈᕐᓰᕕᓕᕆᔪᑦ ᑖᓐᓇ ᑎᒍᕚᑦ ᐋᓐᓂᕐᓯᕐᓗᒍᓗ, ᐅᑎᕐᑎᑉᐹᑦ ᓱᓇᒥᒡᓘᓐᓃᑦ ᓇᒃᓴᕐᑎᓐᓇᒍ. ᐱᕈᕐᓰᕕᖕᒥᒡᓕ ᐱᖁᑎᓕᒃ ᑎᓕᓯᒃᑲᓐᓂᕐᐳᖅ ᐱᔨᒥᓂᒃ, ᑖᒃᑯᐊ ᐱᕈᕐᓰᕕᓕᕆᔪᑦ ᐋᓐᓂᕐᐹᑦ ᓂᐊᖁᐊᒍᑦ, ᒥᑕᐅᑎᒋᓪᓗᒍ ᐊᐅᓪᓚᕐᑎᑉᐹᑦ. ᐱᕈᕐᓰᕕᖁᑎᓕᒃ ᑎᓕᓯᒃᑲᓐᓂᕐᐳᖅ ᐱᔨᒥᒃ ᐊᓯᐊᓂᒃ, ᐱᕈᕐᓰᕕᓕᕆᔪᑦ ᑖᓐᓇ ᑐᖁᑉᐹᑦ; ᐊᓯᖏᓪᓗ ᐊᒥᓱᑦ ᑍᒤᓕᐅᖃᑦᑕᕐᐰᑦ, ᐃᓚᖏᑦ ᐋᓐᓂᕐᓯᕐᓗᒋᑦ ᐃᓚᖏᓪᓗ ᑐᖁᓪᓗᒋᑦ. ᐱᕈᕐᓰᕕᖁᑎᓕᒃ ᑎᓕᔭᒃᓴᑐᐊᖃᓕᕐᐳᖅ ᐃᕐᓂᕐᒥᓂᒃ ᓇᒡᓕᒋᒻᒪᕆᒃᑕᒥᓂᒃ; ᑭᖑᓪᓕᕐᐸᐅᑎᓪᓗᒍᓗ ᐃᕐᓂᓂ ᑎᓕᒋᕚ ᑖᒃᑯᓄᖓ, ᐅᖃᕐᓗᓂ, ‘ᐃᕐᓂᕋ ᐃᓕᕋᒋᓂᐊᕐᐹᑦ.’ ᐱᕈᕐᓰᕕᓕᕆᔪᑦ ᐃᒻᒥᖕᓄᑦ ᐅᖃᖃᑎᒌᓕᕐᐳᑦ, ‘ᑖᓐᓇ ᑕᕝᕙ ᑭᖑᕐᖑᑦᔨᔪᒃᓴᖅ; ᐊᑏ, ᑐᖁᓚᐅᕐᓚᕗᑦ, ᑖᑦᓱᒪ ᑭᖑᕐᖑᑎᔭᒃᓴᖏᑦ ᐱᑖᕆᓂᐊᕋᑦᑎᒍᑦ.’ ᑕᕝᕙ ᑎᒍᕚᑦ ᑐᖁᓪᓗᒍ, ᑎᒥᖓ ᐃᒋᑉᐹᑦ ᐱᕈᕐᓰᕕᐅᑉ ᓯᓚᑖᓄᑦ.
“ᖃᓄᕐᓕ ᑕᕝᕙ ᐱᕈᕐᓰᕕᖁᑎᓕᒃ ᐱᓛᓕᕐᐸ? ᑎᑭᑦᓱᒫᕐᐳᖅ ᐱᕈᕐᓰᕕᓕᕆᔩᑦ ᑐᖁᑦᓴᕐᑐᕐᓗᒋᑦ, ᐱᕈᕐᓰᕕᒃ ᐊᓯᖏᓐᓄᑦ ᑲᒪᒋᔭᐅᖁᓕᕈᒫᕐᐹ. ᐅᓇ ᐅᖃᓕᒫᕐᓯᒪᓐᖏᓚᓯᐅᒃ ᒎᑎᐅᑉ ᐅᖃᐅᓯᖏᓐᓂ?
‘ᐅᔭᕋᒃ ᐃᒡᓗᓕᐅᕐᑎᓂᑦ ᓇᕐᕈᒋᔭᐅᔪᖅ,
ᑖᓐᓇ ᐱᓪᓚᕆᐅᓂᕐᐸᐅᓪᓗᓂ ᑎᕆᖅᑰᓕᕐᐳᖅ;
ᑕᒪᓐᓇ ᐊᑕᓂᐅᑉ ᐱᓂᐊᓚᐅᕐᐹ,
ᓴᖅᑭᔮᕐᓂᖓ ᐅᕙᑦᑎᓐᓄᑦ ᑕᑯᒥᓇᕐᑐᕐᔫᕗᖅ!’”
ᑖᒃᑯᐊ ᔩᓱᓯ ᑎᒍᔪᒪᒐᓗᐊᕐᐹᑦ, ᐃᓄᒐᓴᒡᔪᐊᓂᒡᓕ ᑲᑉᐱᐊᓱᒃᐳᑦ, ᒪᓗᒍᓱᓕᕋᒥᒃ ᑕᒪᑐᒧᖓ ᐊᑦᔨᐅᔪᒧᑦ ᐅᖃᐅᓯᐅᓂᕐᒥᖕᓂᒃ; ᑍᒤᒻᒪᑦ ᕿᒪᒃᐰᑦ ᐊᓯᐊᓄᐊᓕᕐᓗᑎᒃ.


ᐹᕆᓯᑦ ᐃᓚᖏᑦ ᐃᕉᑕᓯᐅᓪᓗ ᒪᓕᒃᑎᖏᑕ ᐃᓚᖏᑦ ᔩᓱᓯᒧᐊᖁᔭᐅᕗᑦ, ᐊᐱᕐᓱᕐᓗᒍ ᓇᓗᓕᕐᑎᓐᓇᓱᐊᕈᒪᓪᓗᒍ. ᑖᒃᑯᐊ ᔩᓱᓯᒧᐊᕋᒥᒃ ᐅᖃᕐᐳᑦ, “ᐊᔪᕆᕐᑐᐃᔩ ᖃᐅᔨᒪᒐᑦᑕ ᓱᓕᔪᒥᒃ ᐅᖃᖃᑦᑕᕋᕕᑦ, ᐃᓄᐃᑦ ᐃᓱᒪᖏᑦ ᓯᕘᕋᒋᓇᒋᑦ ᓱᓕᑦᓯᐊᕐᑐᒥᒃ ᐅᖃᕐᐸᒃᑲᕕᑦ; ᐃᓄᐃᑦ ᖃᓄᐃᑦᑑᓂᖏᓐᓂᒃ ᑲᒪᒋᖏᓐᓇᕕᒋᑦ, ᐊᔪᕆᕐᑐᖃᑦᑕᕋᕕᒋᑦ ᓱᓕᔪᒥᒃ ᒎᑎᐅᑉ ᐱᓂᐊᕐᑕᐅᖁᔭᖏᓐᓂᒃ. ᐅᖃᐅᑎᓚᐅᕐᑎᒍᑦ, ᐱᖁᔭᑦᑎᓐᓄᑦ ᐊᑭᕋᕐᑐᕐᐹᑦ, ᑖᒃᓰᔭᕈᑎᓂᒃ ᑐᓂᓯᖃᑦᑕᕈᑦᑕ ᓰᓴᕆᒧᑦ ᐅᕝᕙᓗ ᑐᓂᓯᖃᑦᑕᕆᐊᖃᓐᖏᓚᒍᑦ?”
ᔩᓱᓯᐅᑉ ᐱᖏᑦᓯᕐᓱᕋᓱᐊᕐᓂᖏᑦ ᖃᐅᔨᒪᒐᒥᒋᑦ ᐅᖃᐅᑎᕔᑦ, “ᓱᖕᒫᑦ ᐅᕙᓐᓂᒃ ᐆᒃᑐᕋᓱᐊᕐᐱᓰ? ᑮᓇᐅᔭᖅ ᕾᑕᐅᓚᐅᕐᓕ, ᑕᑯᓚᐅᕐᓚᒍ.”
ᑮᓇᐅᔭᒥᒃ ᑐᓂᓯᕕᒋᕚᑦ. ᔩᓱᓯᐅᑉ ᐊᐱᕆᕔᑦ, “ᑭᓇᐅᑉ ᑮᓇᓐᖑᐊᖓ, ᑭᐊᓗ ᐊᑎᖓ?”
ᑖᒃᑯᐊ ᑭᐅᕚᑦ, “ᐊᖓᔪᖅᑳᕐᔪᐊᑉ ᓰᓴᕆᐅᑉ.”
ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᐊᖓᔪᖅᑳᕐᔪᐊᖅ ᓰᓴᕆ ᑐᓂᓯᕕᒋᓯᐅᒃ, ᐱᖏᓐᓂᒃ, ᒎᑎᓗ ᑐᓂᓯᕕᒋᓗᒍ ᐱᖏᓐᓂᒃ.”
ᑖᒃᑯᐊ ᔩᓱᓯᐅᑉ ᑭᐅᑦᔪᑎᖓᓂᒃ ᑲᒪᕕᒃᔪᐊᕐᐳᑦ.


ᑭᖑᓂᖓᒍᑦ ᓵᑦᔪᓰᑦ ᐅᐸᒃᐹᑦ, ᑖᒃᑯᐊ ᐃᓄᖕᓂᒃ ᑐᖁᖓᔪᓂᑦ ᒪᑭᕝᕕᒃᓴᖃᖏᓐᓂᕅᕙᒃᑐᑦ, ᔩᓱᓯᒧᐊᕐᐳᑦ ᐊᐱᕆᓪᓗᒍ ᐅᖃᕐᐳᑦ, “ᐊᔪᕆᕐᑐᐃᔩ, ᒨᓯᓯᐅᑉ ᐱᖁᔭᕐᑖᕐᑎᓚᐅᕐᐹᑎᒍᑦ, ‘ᐊᖑᑦ ᓄᓕᐊᓕᒃ ᑐᖁᒃᐸᑦ ᕿᑐᕐᖓᕐᑖᓚᐅᕋᓂ, ᑕᕝᕙ ᓄᑲᖓᑕ ᐅᐃᒡᒐᕐᓂᖅ ᓄᓕᐊᕐᑖᕆᔭᒃᓴᕆᕚ ᑖᒃᑯᐊᒃ ᕿᑐᕐᖓᕐᑖᖁᓪᓗᒋᒃ, ᕿᑐᕐᖓᖏᑦ ᑐᖁᓚᐅᕐᑐᒧᑦ ᕿᑐᕐᖓᕆᔭᐅᓂᕋᕐᑕᐅᖁᓪᓗᒋᑦ.’ ᑍᑦᓱᒪᓂ ᓄᑲᕇᒃᑕᖃᓚᐅᕐᐳᖅ ᐊᖑᑎᓂᒃ 7ᓂᒃ; ᐊᖓᔪᒃᖠᕐᐹᖅ ᓄᓕᐊᓂᒃᐳᖅ, ᕿᑐᕐᖓᕐᑖᓚᐅᕋᓂᓗ ᑐᖁᕗᖅ. ᑕᕝᕙ ᓄᑲᖓᑕ ᐊᕐᓇᖅ ᓄᓕᐊᕐᑖᕆᕚ, ᑖᓐᓇᑦᑕᐅᖅ ᑐᖁᒋᕗᖅ ᕿᑐᕐᖓᕐᑖᓚᐅᕋᓂ; ᓄᑲᖓᑕ ᐱᖓᔪᖓᑦ ᑍᒫᑦᓮᓐᓇᖅ ᐱᒋᕗᖅ. ᑖᒃᑯᐊ ᓄᑲᕇᑦ 7 ᑖᑦᓱᒥᖓ ᐊᕐᓇᒥᒃ ᓄᓕᐊᓂᓚᐅᕐᐳᑦ, ᑕᒪᕐᒥᒃ ᕿᑐᕐᖓᕐᑖᓚᐅᕋᑎᒃ ᑐᖁᓚᐅᕐᐳᑦ. ᑭᖑᓪᓕᕐᐸᐅᓪᓗᓂᓕ ᐊᕐᓇᖅ ᑐᖁᒋᕗᖅ. ᑐᖁᖓᔪᑦ ᒪᑭᑉᐸᑕ ᒪᑭᕝᕕᒃᓴᐅᔪᒫᕐᑐᒥ, ᓇᓪᓕᐊᑦᑕ ᑖᓐᓇ ᐊᕐᓇᖅ ᓄᓕᐊᕆᓛᕐᐸᐅᒃ? ᑖᒃᑯᐊ ᖃᑕᓐᖑᑎᒌᑦ 7 ᑕᒪᕐᒥᒃ ᓄᓕᐊᕆᓚᐅᕐᒪᑦᔪᒃ.”
ᔩᓱᓯᐅᑉ ᐅᖃᐅᑎᕔᑦ, “ᐃᒫᒃ ᐱᑦᔪᑎᖃᕐᖢᓯ ᑕᒻᒪᕋᑦᓯ, ᒎᑎᐅᑉ ᐅᖃᐅᓯᖏᑦ ᖃᐅᔨᒪᖏᓐᓇᑦᓯᐅᒃ ᐊᒻᒪᓗ ᒎᑎᐅᑉ ᐱᔪᓐᓇᕐᓂᖓ ᖃᐅᔨᒪᓇᒍ. ᑐᖁᖓᔪᓪᓕ ᒪᑭᒃᑯᑎᒃ, ᓄᓕᐊᓂᒃᐸᒍᒫᓐᖏᓚᑦ ᐅᐃᓂᒃᐸᖏᓪᓗᑎᒡᓗ, ᐂᖏᓖᑎᑐᑦ ᕿᓚᖕᒦᑦᑐᑎᑐᑦ ᑍᒤᑦᓱᒫᕐᐳᑦ. ᑐᖁᖓᔪᑦ ᒪᑭᑎᑕᐅᓂᖓᓂᒃ ᐅᖃᕐᓯᒪᔪᓂᒃ ᐊᒡᓚᖕᓂ ᐊᑐᐊᕐᓯᓚᐅᕐᓯᒪᓐᖏᓚᓰ ᒨᓯᓯᐅᑉ ᐊᒡᓚᖏᓐᓂ ᐅᖃᐅᓯᖃᕐᑐᓂᒃ ᐅᕐᐱᒐᕐᒥᒃ ᐃᑯᐊᓚᔪᒥᒃ, ᑕᕝᕙᓂ ᐅᓂᒃᑲᐅᓯᕐᒥ ᒎᑎᐅᑉ ᒨᓯᓯ ᐅᖃᐅᑎᓚᐅᕐᒪᒍ, ‘ᐅᕙᖓ ᐂᑉᕋᕼᐋᒻ ᒎᑎᖓ, ᐂᓴᑭᐅᓪᓗ ᒎᑎᖓ, ᔧᑰᓪᓗ ᒎᑎᖓ?’ ᒎᑎ ᐃᓅᔪᓄᑦ ᒎᑎᐅᕗᖅ, ᑐᖁᖓᔪᓪᓕ ᒎᑎᒋᓐᖏᓛᑦ; ᑍᒤᒻᒪᑦ ᑕᒻᒪᕐᓯᒪᓪᓚᕆᒃᐳᓯ.”


ᐱᖁᔭᓂᒃ ᐃᓕᓮᔩᑦ ᐃᓚᖓᑦ ᑕᒪᑐᒥᖓ ᐅᖃᖃᑎᒌᒃᑎᓪᓗᒋᑦ ᑐᓵᕗᖅ, ᑕᑯᒐᒥ ᔩᓱᓯᐅᑉ ᓵᑦᔪᓰᑦ ᑭᐅᑦᓯᐊᕐᒪᒋᑦ, ᑍᒤᒻᒪᑦ ᔩᓱᓯᒧᐊᕐᐳᖅ ᐊᐱᕆᓪᓗᒍ, “ᓇᓪᓕᐊᑦ ᐱᖁᔭᓂᑦ ᑕᒤᓐᓂᑦ ᓯᕗᓪᓕᕐᐸᐅᔭᕆᐊᖃᕐᐸ?”
ᔩᓱᓯᐅᑉ ᑭᐅᕚ, “ᐅᓇ ᑕᕝᕙ ᓯᕗᓪᓕᕐᐸᐅᔪᖅ ᐱᖁᔭᓂᑦ, ‘ᐃᓴᕆᐊᓕᒥᐅᖑᔪᓯ ᑐᓴᕆᑦᓯ! ᐊᑕᓂᖅ ᒎᑎᕗᑦ, ᑖᓐᓇ ᐊᑕᓂᑑᕗᖅ. ᐊᑕᓂᖅ ᒎᑎᓯ ᓇᒡᓕᒋᔭᒃᓴᕆᕙᓯ ᐆᒻᒪᑎᑦᓯᓐᓄᑦ ᑕᒤᓐᓄᑦ, ᑕᕐᓂᑦᓯᓐᓄᓪᓗ ᑕᒤᓐᓄᑦ, ᐃᓱᒪᑦᓯᓐᓄᓪᓗ ᑕᒤᓐᓄᑦ, ᐱᔪᓐᓇᕐᓂᑦᓯᓐᓄᓪᓗ ᑕᒤᓐᓄᑦ.’ ᐂᑉᐸᖓᓗ ᐃᒤᓕᕗᖅ, ‘ᐃᓅᖃᑎᓯ ᓇᒡᓕᒋᔭᒃᓴᕆᕙᓯ ᓇᖕᒥᓂᖅ ᓇᒡᓕᒋᓂᕐᑐᑦ.’ ᐊᓯᖏᓐᓂᒃ ᑖᒃᑯᓇᖓᑦ ᐱᓪᓚᕆᐅᓂᕐᓴᓂᒃ ᐱᖁᔭᕐᑕᖃᓐᖏᓚᖅ.”
ᐱᖁᔭᓂᒃ ᐃᓕᓮᔨ ᔩᓱᓯᒧᑦ ᐅᖃᕐᐳᖅ, “ᐊᔪᕆᕐᑐᐃᔩ, ᓱᓕᑦᓯᐊᕐᐳᑎᑦ; ᑕᒪᓐᓇ ᓱᓕᖕᒪᑦ ᓲᕐᓗ ᐅᖃᕋᕕᑦ, ᐊᑕᓂᖅ ᑭᓯᒥ ᐊᑕᐅᓯᐅᖕᒪᑦ, ᑖᑦᓱᒪ ᐊᓯᐊᓂᒃ ᒎᑎᑕᖃᓐᖏᓚᖅ, ᑖᓐᓇᑐᐊᖅ ᑭᓯᐊᓂ. ᐃᓄᒃ ᒎᑎᒥᒃ ᓇᒡᓕᒍᓱᒃᑐᒃᓴᐅᖕᒪᑦ ᐆᒻᒪᑎᒥᓄᑦ ᑕᒤᓐᓄᑦ, ᐃᓱᒪᒥᓄᓪᓗ ᑕᒤᓐᓄᑦ, ᐱᔪᓐᓇᕐᓂᕐᒥᓄᓪᓗ ᑕᒤᓐᓄᑦ, ᐃᓅᖃᑎᒥᓂᒡᓗ ᓇᒡᓕᒍᓱᒃᑐᒃᓴᐅᓪᓗᓂ ᐃᒻᒥᓂᒃ ᓇᒡᓕᒋᓂᕐᒥᑐᑦ, ᑖᒃᑯᐊᒃ ᐱᓪᓚᕆᐅᓂᕐᓴᐅᕘᒃ ᑐᓂᕐᕈᑕᐅᖁᔭᐅᔪᓂᑦ ᐆᒪᔪᕕᓂᕐᓂᒃ ᑐᓂᕐᕈᓯᕐᕕᒥ, ᑐᓂᕐᕈᑕᐅᖁᔭᐅᓯᒪᔪᓂᓪᓗ ᑕᒤᓐᓂᑦ.”
ᔩᓱᓯᐅᑉ ᖃᐅᔨᒐᒥᐅᒃ ᑭᒡᒍᓯᖓ ᓯᓚᑐᔪᒻᒪᕆᐅᖕᒪᑦ, ᐅᖃᐅᑎᕚ, “ᒎᑎᐅᑉ ᐊᑕᓂᐅᕕᖓᓄᑦ ᐅᖓᓯᒍᓐᓃᕐᐳᑎᑦ.”
ᑕᒪᑐᒪ ᑭᖑᓂᖓᒍᑦ ᑭᓇᒧᓪᓘᓐᓃᑦ ᔩᓱᓯ ᐊᐱᕆᔭᐅᔪᒪᔪᓐᓃᕐᐳᖅ.


ᔩᓱᓯ ᑐᒃᓯᐊᕐᕕᒡᔪᐊᕐᒥ ᐊᔪᕆᕐᑐᐃᓪᓗᓂ, ᐅᖃᕐᐳᖅ, “ᓱᖕᒪᓂᒃᑯᐊ ᐱᖁᔭᓂᒃ ᐃᓕᓮᔩᑦ ᐅᖃᕐᐸᑦ ᙭ᔅᑑᓯ ᑍᕕᑎᒧᑦ ᑭᖑᕚᕆᔭᐅᓂᐊᕐᓂᕋᕐᖢᒍ? ᑍᕕᑎ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᐃᓱᒪᑖᕐᑎᑕᐅᓪᓗᓂ ᐅᖃᓚᐅᕐᐳᖅ:
‘ᐊᑕᓂᖅ ᐊᑕᓂᓐᓄᑦ ᐅᖃᕐᐳᖅ, “ᐅᕙᓂ ᑕᓕᕐᐱᓐᓂ ᐃᒃᓯᕙᒋᑦ, ᐊᑭᕋᕐᑐᕐᑎᖕᓂᒃ ᐃᓕᓯᖅᑳᕐᑎᓐᓇᖓ ᐃᑎᒐᕕᑦ ᐊᑖᓄᑦ.”’
“ᑍᕕᑎᐅᑉ ᐊᑕᓂᕐᒥᓂᒃ ᑍᖕᒪᒍ; ᖃᓄᖅ ᑕᕝᕙ ᙭ᔅᑑᓯ ᑍᕕᑎᐅᑉ ᑭᖑᕚᕆᒐᔭᕐᐸᐅᒃ?”
ᐃᓄᒐᓴᒡᔪᐊᑦ ᐊᒥᓱᑦ ᔩᓱᓯᒥᒃ ᓈᓚᒃᐳᑦ ᖁᕕᐊᓱᒡᓗᑎᒃ.


ᐊᔪᕆᕐᑐᕐᓗᒋᑦ ᐃᒫᒃ ᐅᖃᕐᐳᖅ, “ᖃᐅᔨᓴᑦᓯᐊᕆᑦᓯ ᐱᖁᔭᓂᒃ ᐃᓕᓮᔨᓂᒃ, ᐱᓱᑲᑕᒍᒪᕙᖕᒪᑕ ᐊᓐᓄᕌᕐᓯᒪᓗᑎᒃ ᑕᑭᔪᓂᒃ ᐅᓕᒡᔪᐊᓂᒃ, ᐃᒃᐱᒋᔭᐅᑦᓯᐊᕐᓗᑎᒃ ᓂᓪᓕᐅᑦᔭᐅᔪᒪᕙᒃᓗᑎᒃ ᓂᐅᕕᕐᕕᖕᓂ. ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂ ᐱᐅᓂᕐᐹᓂ ᐃᒃᓯᕙᐅᑕᖃᕈᒪᕗᑦ, ᐅᐱᓐᓇᕐᓂᕐᐹᓂᓗ ᐃᓂᖃᕈᒪᕙᒃᓗᑎᒃ ᓂᕆᕕᒃᔪᐊᕐᑐᖃᕐᑎᓪᓗᒍ. ᐅᐃᒡᒐᕐᓃᑦ ᓴᖐᑦᑐᕐᓂᐊᒐᕆᓪᓗᒋᑦ ᐱᖁᑎᖏᓐᓂᒃ ᐋᑎᕆᕙᒃᐳᑦ ᐊᖏᕐᕋᖏᓐᓂᑦ, ᑭᖑᓂᖓᒍᑦ ᑕᑯᓐᓇᕐᑕᐅᔪᒪᓪᓗᑎᒃ ᑕᑭᔪᓂᒃ ᑐᒃᓯᐅᑎᖃᑦᑕᕐᐰᑦ. ᑍᒤᒻᒪᑦ ᓱᒋᐊᕐᑕᐅᓂᒃᓴᖏᑦ ᐊᖏᓂᒃᓴᐅᔪᒫᕐᐳᑦ.”


ᔩᓱᓯ ᑐᒃᓯᐊᕐᕕᒡᔪᐊᑉ ᑮᓇᐅᔧᕐᕕᖓᑕ ᖃᓂᒋᔮᓄᑦ ᐃᖏᑉᐳᖅ, ᑕᑯᓐᓈᓕᕐᓗᓂ ᐃᓄᖕᓂᒃ ᑮᓇᐅᔧᕐᕕᖕᒧᑦ ᐃᓕᐅᖅᑬᔪᓂᒃ. ᐊᒥᓱᑦ ᐊᔪᕐᓴᖏᑦᑐᑦ ᑐᓂᓯᕗᑦ ᑮᓇᐅᔭᓂᒃ ᐊᒥᓱᓂᒃ. ᑭᖑᕐᖓᒍᓪᓕ ᐅᐃᒡᒐᕐᓂᖅ ᐊᔪᕐᓴᕐᑐᖅ ᑕᒪᐅᓐᖓᕆᕗᖅ, ᐃᓕᓯᓪᓗᓂ ᑮᓇᐅᔮᖕᓂᒃ ᒪᕐᕉᖕᓂᒃ ᒥᑭᔪᑯᓘᖕᓂᒃ. ᐃᓕᓐᓂᐊᕐᑎᓂ ᕾᖁᓪᓗᒋᑦ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᑖᓐᓇ ᐅᐃᒡᒐᕐᓂᖅ ᐊᔪᕐᓴᕐᑐᖅ ᑐᓂᓯᕗᖅ ᐊᖏᓂᕐᐹᒥᒃ ᐊᓯᓕᒫᒥᓂᑦ. ᐊᓯᖏᑦ ᑐᓂᓯᕗᑦ ᐊᑐᕐᓂᐊᖏᑕᒥᖕᓂᒃ ᐊᔪᕐᓴᖏᑦᑑᒐᒥᒃ; ᐅᓇᓕ ᐊᕐᓇᖅ ᐊᔪᕐᓴᕐᑑᓪᓗᓂ ᑐᓂᓯᕗᖅ ᐱᒋᔭᑐᐊᒥᓂᒃ, ᐃᓅᑦᔪᑎᒃᓴᑐᐊᒥᓂᒡᓗ.”

Lyssna på ᒫᑯᓯᐅᑉ ᐊᒡᓚᖏᑦ 12