Text: © The Bible Society of Zambia, 2003 Audio: ℗ 2012 Hosanna

Lunda - 2003 Edition (Drama - NT)

The Holy Bible in Lunda Ndembu © United Bible Societies, 2003. 

Hatachi hadiŋi Izu, Izu dadiŋi naNzambi. Izu dadiŋi Nzambi.
Diyi wadiŋi naNzambi hamu, kufumisha kutachi.
Yuma yejima ayileŋeli kudi yena. Hikwekala chuma chaleŋeluwu chakubula yena kuchileŋaku.
Mudi yena mwadiŋi wumi, wumi owu wadiŋi chejeji chawantu.
Chejeji ochu chatoŋekaŋa mumwidima, mwidima hiwatwesheli kujima chejejuku.
Kwenjili iyala wumu atemesheluwu kudi Nzambi, ijina dindi Yowanu.
Yeniwu wenjili ekali chinsahu chachejeji ochu, kulonda ejima akakuhweleli chakushimunayi yena Yowanu.
Yena hadiŋi diyi chejejuku; wenjili kulonda akekali chinsahu chachejeji ochu.
Chejeji chalala chenzaŋa mumpata yamunu mwishina, chatoŋekelaŋa antu ejima.
Yena wadiŋi munu mwishina; mpata yamunu mwishina ayileŋeli kudi yena, ilaŋa akwampata yamunu mwishina hiyamwilukiluku.
Wenjili mwiindi yomweni, antu indi yomweni hiyamutambwiluku.
Ilaŋa ejima amutambwili, wayinkeli wanta wakwikala anyana kaNzambi, wowenawa akukuhwelela ijina dindi.
Wena chavwalikiluwu, hiyavwalikili kumashi hela mwatoŋwelaŋawu antu hela mwavwalikaŋawu antuku, avwalikili kudi Nzambi.
Izu hidikwikala muntu; washakamini mukachi ketu, hitukubanjila lubanji lwakulema kwindi, lubanji lwakulema kwaMwana kaTata wumu hohu, wenzala luwi niwalala.
Yowanu hakwikala chinsahu chakumushimuna, hakubidika nindi, Yeniwu diyi nateneni, nami Kukunlondela wámbadikami, muloŋa yena wadiŋi kwoku ami kanda nivwaliki.
Kukwinzala kwindi wejima wetu tunatambuluku, niluwi lwakulunjika haluwi.
Muloŋa nshimbi yenjilili mudi Mosi, hakwila luwi niwalala wenjilili mudi Yesu Kristu.
Hikwekala muntu wamonahu dehi Nzambuku, owu Mwana wumu hohu wekala muntulu yaTata, diyi namulumbululi chachiwahi.


Diwu wunsahu washimwini Yowanu, hatemesheluwu aYudeya atupristu nawaLevi afumi kuYerusalema ayi kudi yena, amwihuli nawu, Yeyinyi?
Hakuyileja chalumbuluka chikupu nindi, Ami hiniKristuku.
Wena hiyakumwihula nawu, Indi dinu yeyinyi? Yeyi Elija tahindi? Yena nindi, Nehi. Nawu, Wuyenowu kaprofwetu tahindi? Yena hakwakula nindi, Nehi.
Dichi hiyakumwihula cheŋi nawu, Yeyinyi? Muloŋa tunakeŋi kutwala mazu kudi antu atutemesha. Eyi aweni waditenaŋa neyidi?
Yena nindi, Yami
Mbila nabidikaŋa muchinkalampata nami,
Ololenu njila yaMWANTA;
mwomwahosheli kaprofwetu Isaya.
Hadi owu atemesheluwu hadiŋi aFwarisewu;
hiyakumwihula nawu, Neyi eyi hiwuKristu hela Elija hela yenowu kaprofwetuku, ochu wajimikilaŋadi?
Yowanu hakwakula nindi, Ami najimikaŋa mumenji; mukachi kenu munemani muntu mwabula kwiluka;
yena wukunlondela, ami hinateli kumusubula nkwabiluku.
Yumiyi ayilili muBetani hambadi yamusela yaYodana, kwajimikilaŋayi Yowanu.

Chikunachi, Yowanu hakumona Yesu wudi nakwinza kudi yena, nindi, Talenu Mwana kaMukoku waNzambi, mukwakufumisha nshidi yawakwampata yamunu mwishina.
Diyi iwu nateneni nami, Kukunlondela iyala wambadikami, muloŋa yena wadiŋi kwoku ami kanda nivwaliki.
Hela ami, hinamwilukiluku. Chinenjili nakujimika mumenji, nalondeli nami nakamumwekeshi kudi aIsarela.
Yowanu hakushimuna wunsahu nindi, Namweni Spiritu nakusuluka mwiwulu neyi katela, hakushakama hadi yena.
Hela ami, hinamwilukiluku; ilaŋa owu wantemesheli nakujimika mumenji, diyi wanlejeli nindi, Muntu iwakamona Spiritu hakusuluka nakushakama hadi yena, diyi mukwakujimika mudi Spiritu Wajila.
Ami nachimoni namesu, hinukwikala chinsahu nami, Diyi Mwana kaNzambi.

Chikunachi nawa cheŋi, Yowanu hakwimana niatumbanji twindi ayedi hamu.
Hakushinshika Yesu chakwendayi, nindi, Talenu Mwana kaMukoku waNzambi.
Awa atumbanji twindi ayedi hiyakumutiya chakuhoshayi, niwena hiyakumulondela Yesu.
Yesu hakushetumuka hakuyimona chadiŋi nakumulondelawu, hakuyila nindi, Mudi nakukeŋadi? Wena hiyakumwakula nawu, Eyi Rabi; chaya mukwila nawu Ntaŋishi; washakama kudihi?
Yena hakuyila nindi, Inzenu mutali. Dichi ayili amweni kwashakaminaŋayi; ifuku odu hiyakushakama nindi; kwela dehi melela.
Wenawa ayedi atiyili chahosheliyi Yowanu amulondeli Yesu, wumu wadiŋi Anderi, manakwaShimona Petulu.
Diyi wasambilili kuwana manakwindi yomweni, Shimona, hakumuleja nindi, Tunawani dehi Mesiya; chaya mukwila nawu, Kristu.
Yena hakumuleta kudi Yesu. Yesu hakumutala swi-i, nindi, Eyi wuShimona, mwana kaYowanu, akakutumba nawu, Kefwasi; chaya mukwila nawu, Petulu (ilola).

Chikunachi cheŋi, hakwila nindi, Tukuya muŊaliliya. Awana niFwilipu. Yesu hakumwila nindi, Nlondi.
Fwilipu wadiŋi muntu wakuBeteseda, mukala waAnderi naPetulu.
Fwilipu hakuwana Nataneli hakumwila nindi, Tunawani muntu atenenuwu kudi Mosi munshimbi, nikudi atuprofwetu, diyi Yesu wakuNazareta, mwana kaYosefu.
Nataneli hakumwila nindi, Chuma chachiwahi chitweshi kufuma muNazareta? Fwilipu hakumwila nindi, Inzaku wutali.
Yesu hakumona Nataneli wudi nakwinza kudi yena, hakumutena nindi, Talenu kaIsarela kakeni wakadi makasu.
Nataneli hakumwila nindi, Wunaŋiluki ŋahi? Yesu hakumwakula nindi, Chiwadiŋi mwishina dachikuyu, Fwilipu kanda akutambiki, nakumona.
Nataneli hakumwakula nindi, Eyi Rabi, yeyi Mwana kaNzambi, yeyi Mwanta waIsarela.
Yesu hakumwakula nindi, Wunakuhweleli nanochu chinakwili nami nakumona mwishina dachikuyu, tahindi? Wamba kamona yacheŋi yakubadika yeniyi.
Hakumwila nindi, Chalala chalala, nukuyileja nami, mwamba kamona iwulu hidikwenzuluka, niaŋelu aNzambi hiyakukandama nakusuluka hadi Mwana kaMuntu.

Lyssna på Yowanu 1