Zimbazi 19
19
1Yili ciba wuwe muciwa, ninga wuli mwihuwilwa.
Si nho kuwa wuli mulambi, kanyhi wuli mulele.
2No wilowe nawo, hono wuwe wusina wizuce, si wuswanu.
Nazo nghani zo musunho, zitajilaga munhu mu mbali.
3Wanhu wanji nawo, weyihodangaga mu mikalile yawo weneco,
so metumo gawo go wulele, na hanyuma,
wawa kumuhosa Muwaha Mulungu.
4Ne wanhu wagoli,
nawo watugaga wendece wawo nhondo zose.
Ninga i waciwa,
hamba ne wacefu wono wena nawo wakuwafutila.
5Na hono wulonje zo wulambi mu mahakama,
kotuga wulipicizwe, kowa wusina nzila yo kuponela.
6Munhu wo wose,
yendile yatuje wendezwe kuli wanhu we lilumbo.
Kanyhi wenji,
wono wendile wawe wendece kuli wono walavyaga vipegwa.
7Sunga ne wanduguze wo muciwa,
wawezaga siwamwendile yaye.
Kanyhi kekalaga yasina wendece wakwe.
Hamba yahidimbale muno ho yawatuje,
ninga sikosuma yaye.
8Wuhidimbale muno mu wiyijize, wuzikumbucile na
zono wukwiyijiza, nagwe komoteswa.
9Na hasina munhu, mono kalongaga zo wulambi mu
mahakama, mono si kalipizizwaga no kongomela.
10Ne walele, si wanojeye wekale mu winji we zisawo,
Ne wetumami, si wanojeye wateme mu wanhu we lilumbo.
11Na hono wuwe wina mahala, kokwiyimila likuwo lyako.
Na hono yunji yakusutizye, yowa nghani swanu muno,
hono wulece kuzicelelela zizo, zono yakutendeye.
12Likuwo lyo mutemi, lihwanile ngholoma ye lisimba.
Ninga wendezwe wakwe, winha buhe mu mahanze.
13No mwana mulele, kamuletelaga sogwe wugaye.
Nayo mucekulu we liwanjilila,
yehwanile mvula ye lihwela.
14Heya, munhu kosuma kuhala kaya,
hamonga ne zisawo ze walezi wakwe.
Ninga Muwaha Mulungu yali wene,
yo kosuma kumupela mugolece we mahala.
15Ale du, weze mudoba hono gwegwe wendile kuwa mudoba,
wugone nhongo.
Ninga wumanye vyono nzala yokwinjila.
16Wugakamisaje malajilizo go Mulungu,
nagwe holeka kokwikala vilo vinji mu wikale wako.
Ninga hono wugabedegale, ale, kofwa.
17Na lono wukuwataza vinhu waciwa,
yinha kotya wukuviwika kuli Muwaha Mulungu.
Nayo Muwaha Mulungu,
hanyuma kanyhi yakukugomolela.
18Wuwafundaje wanago lono wakali wadodo,
lono wena no wupelu wo kugabocela mafundo.
Ninga hono wulece kuwafunda,
wukuwapela cilejeho co kwihodanga weneco.
19Na hone munhu yena likuwo lyono likwaka musunho,
agwe mulekaje,
hambi nha kokwidinghulila wulipicizwe wakwe mweneco.
Ninga hono wuwone vyono kosuma kumutaza kamonga mwi'kuwo lyakwe,
ale, wulece kukatala kumutaza.
20Na hono wuwe wuli mupelu kuwuhuliciza wulanjize we wayago,
lizuwa linji nagwe kotuga mahala.
21Heya, i wanhu wosuma kwiwicila nghani nyinji zo kwituma.
Ninga wuhile wo Muwaha Mulungu, wo wufisilizwaga du.
22Yo nghani ya cevu ciwaha,
hono wuwe wuli cilya cilya.
Kanyhi ciba i waciwa, si nhe wanhu walambi.
23Hono wumogope Muwaha Mulungu,
nagwe ho kokwikala vilo vinji mu wikale wako,
hamba nghani yo yose 'mbi,
si yokwagana yaye.
24Wanhu wanji, mbeka wadoba muno muno,
wakufutigwa sunga kuwanyhile ndigwa mu milomo yawo.
25I wanhu wedunhumuzi, yiwanojeye watuje wulipicizwe,
ho wanji nawo, wono si wazimanyile zono ziwanojeye kwituma,
ho wefundile mumo.
Na hono wuwe ne mahala, kokwifundila mu wulanjizwe.
26No mwana mono kamugazaga sogwe no kumuwinga nyina.
Yo mwana mono kakozaga soni, no kuleta cevu.
27Gwe mwanangu, hono wuleme mafundo,
nha cinji wukulema zinghani zo wumanye.
28Hawezaga hasina ling'ani,
lono muhomelezi yakuwa yena wuhile wo kumutamisa yunji.
Ne wanhu wabi nawo, nha wendile muzinzi wo wubi.
29Ne wanhu we lizeze, wewikanize so wutowangwe.
Cigogo Bible © Bible Society of Tanzania, 2002.