Zimbazi 18
18
1Wanhu wono wetemanulaga ne wayawo,
walondolaga ze masulumizi gawo weneco.
Wesumanizaga na zono wayawo wakuwona zo swanu.
2No mulele si kacelelelwaga, hono yawe yakwizuka hamba ng'o.
Langa mwene kasakaga kwilajila du, vyono mumanya vyose.
3Nawo wubi ne cevu, vibitanaga hamonga.
Ne lilumbo hono likuwucile, wuzaga wubedegalwe.
4Ne zinghani zo munhu, gawezaga go mahala,
Genha malenga ge cisolo, nhe 'kolongo likuhuluma.
5Si viswanu kumuhijila mbejele u munhu musutyi,
no kwajiliza ling'ani yo munhu we ling'ani.
6Na kolo zinghani zo wiwanganile zo wulele zikwanza,
Mwene yakulonga zo wutowe.
7No munhu mono yasina mahala,
kalongaga zinghani zo kwiyambuza mweneco.
Nayo kebatilwaga mu zinghani zakwe mweneco.
8Ne zinghani zo kupwepwelwa, ziwezaga zili muzinzi.
Nase cendile muno kuzihulicila!
9No mudoba ku milimo, yo munhu mubi muno,
Yehwanile no munhu muhodanji.
10Nayo Muwaha Mulungu, wo munala we vilungo,
hono i wanhu we ling'ani,
wosuma kwihundika no kuwa wapolile.
11Nawo wagoli, wawonaga nha vyono,
sawo yawo yosuma kuwadima nhe lilulu litali,
kanyhi nhe majinji matali,
gono gali vilungo, gono galipilime likaya.
12U munhu mwinenenyhezi, yo katugaga lilumbo.
Ninga i wedunhumuzi, wali mu nzila yo wongomele.
13Weze wina ngola, lono wukali si napitula cinji,
Ninga hono wuwe wuli musupu ku wupitule,
kokwiyinjiza mu wu wula mahala no wutovulwe.
14U muhe wako wo wokusikamya mu wusocele wako.
Ninga hono wuwusuputule,
no witumbilo wako wokwajilila.
15I wanhu wono wena wizuce,
nhondo zose wekalaga wahidimbazi,
kanyhi wendile no kwiyijiza.
16Na hono wuwe kusaka mwiwone no munhu we lilumbo,
agwe mutegulilaje cipegwa du, hodu,
kowa kupelu kwiwona nayo.
17No munhu mono kalongolaga kupitula zinghani mu mahakama,
nhondo zose mwene, kewonanga yali ling'ani,
sunga kolo mono yakumudaya, yakumuwuza mawuzo.
18Na hono wanhu wejete we vilungo,
wawe wena wiwanganile mu mahakama,
ale, kula yo yosuma kuzilamula zinghani zizo.
19Wumutazaje nduguyo, nayo kolokucitila,
kolowa nhe lijinji lyono likamile kuli 'gwe.
Ninga hono mugombane nayo,
ale, nayo hamba si kolokupela wutazi yaye.
20Ne mikalile yako,
yomema mikalo ye zinghani zono kuwa kuzilonga.
21Ne zinghani zono wukuwa kuzilonga,
zosuma kuwukamisa wumi wako hamba kuwongomeza.
Holeka kobocela nha vyono zinha zinghani zako.
22Hono wumutuje mugolece muswanu,
mbeka watuga cinhu ciswanu.
Nayo yikulajila vyono, Muwaha Mulungu yakwendile.
23Na lono munhu muciwa yakulomba,
kalombaga yakwineneleza.
Ninga munhu mugoli, kapitulaga ko wukali du.
24Wiyendi wunji, si wujendelelaga vilo vinji.
Ninga wiyendi wunji nawo, wucizaga na wono muli ndugu.
Cigogo Bible © Bible Society of Tanzania, 2002.