Zimbazi 20
20
1Wung'wela wo wujimbi, wuletaga mazozo,
no kumunoza munhu kawa mulele.
Kanyhi yo nghani ya wulele du,
munhu kuwa mung'wela.
2Yikunojeye wumogope mutemi,
lono yakolwa ne likuwo,
nha vyono kuyogopaga simba,
lono yikukoloma.
Na hono wumukoze likuwo,
wukwiwulaga go mweneco.
3No wu wula mahala wose,
wusagahizaga wiwanganile.
Ninga hono wileje muli zizo,
alo lo lukumyo luswanu.
4No mulimi mudoba,
hono yalece kulima migunda yakwe,
mu vipango vyono vinojeye,
hamba si kokwambulila cinji.
5Ne mahweso go munhu, gehwanile ne malenga,
gono gali mwi'sima litali muno.
Ninga hamba nhavivyo, u munhu we mahala,
vyo kosuma kuganega du.
6Ne wanhu wose, wendile kwiwona wali cihuliko,
kanyhi wehuwilwa.
Ninga u mwihuwilwa, yo nani mono komuwona!
7Wamotile wana, wono wena sogo yawo mwihuwilwa,
kanyhi mono yakwituma ze ling'ani.
8U mutemi, kekalaga mwi'goda lyakwe
lyo wuling'anizi yawumanyile wubi,
no kuwuwona ne meso gakwe.
9Alu mwene, ho yuli mbeka munhu, mono kosuma kutya,
vyono si yakuhoswa ne ciselinji cakwe,
mono yakondya kwiyeza wubi wakwe?
10Muwaha Mulungu,
si yakwendezwa ne wanhu wono wakwitumamila vipimo,
ne vijelo vyono si vili ling'ani.
11Sunga no mwana mudodo,
kelajilaga nha vyono yenha,
mu metumo gakwe.
Nagwe kosuma kumumanya,
hono mwana yuyu muswanu na yali ling'ani.
12Nayo Muwaha Mulungu,
yacipelile meso go kuwonela,
ne makutu go kuhulicila.
13Na hono witumamile vipango vyako vyose mu nhongo,
na mbeka kociwapa.
Holeka yikunojeye witume milimo,
holeka nagwe kotuga ndigwa nyinji.
14No munhu wo wose mono kagulaga cinhu,
nhondo zose katezaga wuguzi wukamu.
Ninga kolo yawuya kwakwe kukaya,
nhondo ho yakulumba.
15Na hono yiwe nhondo zose,
kuzimanyaga zono kulongaga ale,
kowa wina cambuzi ciwaha si nhe zahabu ne fweza.
16No munhu mono kowa mulele, sunga yehuwize,
nha vyono komulipila mujenzi migawa yakwe,
ayo yimunojeye, sawo yakwe yisolwe yipinjikwe.
17Ne cinhu co cose, cono kocitujila mu zinzila zimbi,
ha lulongozi, kosuma kucitumamila nha ndigwa swanu,
ninga hanyuma, cowa nha musawawa mu mulomo wako.
18Weze kuzibocela zinghani ziswanu,
holeka nagwe komoteswa.
Ninga wulece kwinjila caka mu wulugu,
lono wukali nehwesa viswanu.
19Nago maheho, si gahundikaga ze cinyele,
holeka agwe, wilegaje ne wanhu walonji-lonji.
20Na hono wuwalijite walezi wako,
wumi wako wozima,
nha vyono tala yizimaga, kuwa kutitu tuku.
21Mu nghango yo kuyitujila musunho sawo yako,
yo nghango yiyo kanyhi du, vyo yomalika,
hamba kukutaza cinji.
22Wulece kumulipiciza yunji,
so wubi wono yakutendeye.
Ninga agwe, wumwitumbile du Muwaha Mulungu,
nayo yo kokulipila.
23Muwaha Mulungu, si yakwendezwa ne wanhu,
wono wakwitumamila vipimo, ne vijelo,
vyono si vili ling'ani.
24Muwaha Mulungu, yo yaciwicila zinzila zetu,
alu nani kanyhi, mono kosuma kuyimanya,
nzila yo wumi wakwe mweneco?
25Weze kwamula kwihwesa viswanu,
lono wukali si nehuwiza,
i cinhu cono komulavizya Mulungu.
Hanyuma yilece kukupela wukalale.
26U mutemi we mahala,
kosuma kumumanya kamonga du u munhu mono yasutizye,
nayo komulipiciza yasina lusungu.
27Muwaha Mulungu, yacipela mutima ne ciselinji,
holeka si cidahile kwihundiciza i zetu yaye.
28Nayo mutemi, kajendelelaga no wutemi wakwe du,
hono yawe yatemile mu ling'ani, ne mbeka, no lusungu.
29Cikuwa kuvizina vilungo vyo wuzelelo,
no kuwa ne cogopo kuli zimvwi ze wakombi.
30Hanji kuwezaga, wusungu wuwaha,
kucinoza cikawanize i mijendele yetu.
Cigogo Bible © Bible Society of Tanzania, 2002.