Zimbazi 17
17
1Ciba kulya nhonje cilumanga hamonga
no mulamu mu nhumbula.
Si nho kulya ndigwa nyinji swanu,
mu kaya yono yina no wiwanganile.
2U mwitumami mono ketumaga no wulula,
komutema no mwana wo mutwawe mono si kazicelelelaga yaye.
Kanyhi kohala ne lifungu lyakwe.
3Zahabu na fweza, vikuwa kujelwa no moto.
Nayo nhumbula yo munhu yijelwaga no Muwaha Mulungu.
4I wanhu wabi, wahulicizaga mahweso mabi.
Nawo i walambi, wahulicizaga mahweso go wulambi.
5Na hono wuwe kuwasekanga i waciwa, ale,
wumanye vyono wukumutovula Mulungu mono yawawumba.
Na mono kasecelelaga wugazice wo munhu yunji, kolipicizwa.
6I wakombi, weyilumbilaga muli wezukulu zawo,
nha vyono nawo wazelelo welumbilaga muli wasogo zawo.
7Ne wanhu we lilumbo,
si walongaga zo wulambi yaye.
Nawo walele,
wasina hamba nghani ye cambuzi yono wolonga.
8Wanhu wanji wehwesaga vyono,
mulimo wo kulavya mafupo,
wuwezaga nha wuganga,
nawo wehuwiye vyono wosuma kuwapela wutazi.
9Na hono wusace wanhu wakwende, ale,
weze kuwanenela kuli zono wakukusutizya.
Akuno wukukumbucila nha vyono masutya gawulagaga ndugu.
10U munhu wo wizuce, keyijizizaga mu wutacilwe,
ninga mulele, keyijizizaga mu wutowe nghanghulo yigana.
11Nalyo lifwa, lyowaziza ko wukali i wanhu wabi,
wono waletaga mazozo nhondo zose.
12Kanyhi ciba, hono mwitang'anile ne dubu,
lyono walihizize mana galyo,
si nho kwitang'anila no munhu mulele,
mono yakwipiganza ne zinghani zo wulele.
13Hono wuwe kulipaga ziswanu ku zimbi,
nagwe si kotujila lukulu yinji 'mbi mu kaya yako.
14Mwamulizo wo wuma,
wihwanile munhu mono yakujida malenga.
Holeka ciba kuwuleka wiwanganile,
lono mukali si nafikana kutali.
15Mono yakumuhosa we ling'ani,
na mono yakutya mubi yo weling'ani.
Wose wawo vyono wejete,
yiwifyo kuli Muwaha Mulungu.
16Si viswanu munhu mulele,
yetumamile sawo so wulondola wizuce,
hambi nha yasina mahala.
17Wono weyendile,
walajilaga nhondo zose zo wendo wawo.
Na we ndugu nawo wetazilizaga mu wugaye.
18Ninga u munhu mono yasina mahala,
yo kehuwizaga vyono komulipila yunji mugawa wakwe.
19Nawo i wenda wubi, wo wenda wugaye.
Na mono konjelezaga wutali wo mululu wakwe,
kelondolelaga wugazice.
20Na mono kehwesaga zimbi no kulonga makani mabi,
si kotuga ziswanu, langa wongomele.
21Ne wana wono wendile kwituma zinghani zo wulele,
co cevu no wukalale kuli sogo yawo.
22Wuseci nawo, wokupela muwili muswanu,
wono wusina wunyoganyoga.
No wukalale we mapango gose,
wo wufwa mhola mhola.
23Mahakimu wabi, wabocelaga mafupo cinyele,
ho wazajilize nzila zo wuling'anizi.
24Munhu mono yena wizuce,
kehwesaga kwituma ze mahala.
Ninga mono yasina mahala, kebitilaga caka du.
25No mwana mulele, kamuletelaga sogwe wusungu du.
Hamonga no wukalale wuwaha kuli nyina yakwe.
26Kanyhi si viswanu yaye,
kumulifya fayini munhu mono yasina lisutya.
Ne ling'ani yikuwa kulekwa,
lono wanhu waswanu wakulipicizwa.
27No munhu mono kewonaga yali mu mbeka,
si kalonganjikaga nghani nyinji yaye mapango gose.
Ne wanhu wono wendile kwikala no mulamu,
wena wizuce we mbeka.
28Ninga kanyhi, hamba munhu mono yasina mahala mulele,
kosuma kwihwesa nha vyono yena mahala no wizuce,
hono yawe nayo kekalaga yanyamaye,
no kuwimila mulomo wakwe wulece kulonga-longa.
Cigogo Bible © Bible Society of Tanzania, 2002.