Zimbazi 16
16
1Ase cihwesaga zetu,
ninga Mulungu yo yena nghani ye ndumilizo.
2Agwe wukwihwesa nha vyono zose zono kwitumaga,
kunozaga viswanu.
Ninga Muwaha Mulungu yo kazijelaga zinhunizo zayo.
3Holeka yikunojeye wumukoze Muwaha Mulungu metumo gako.
Ne mahweso gako ho gokangazwa.
4U Muwaha Mulungu,
yaviwumba vinhu vyose ko wuhile wakwe mweneco.
Ninga wuhile we wabi, wobedyanjizwa.
5Ninga Muwaha Mulungu, si yendile wanhu wedunhumuzi yaye.
Holeka si komuleka munhu we nhavivyo yalece kulipicizwa.
6Holeka weze na cihuliko, kanyhi mwihuwilwa.
Nayo Mulungu kokunenela wubi wako.
Weze na cihuliko kuli Muwaha Mulungu wako,
holeka nagwe si zokwijelela i zimbi.
7Na hono wuwe kumwendeza Muwaha Mulungu,
kosuma kuwanoza ne walugu wako mwiyende nawo.
8Yili ciba wuwe na cidodo cono wina,
cono wucitujiye mu nzila ye ling'ani,
si nho kuwa na vinhu vinji vyono wuvitujiye
mu nzila yono si ye ling'ani.
9Agwe kosuma kuwikaniza mahweso gako.
Ninga Mulungu yo katongaga mu witume wayo.
10Mutemi yo munya kudumula zinghani zose.
Ne zinghani zakwe, si kasutyaga mu wuling'anize.
11U Muwaha Mulungu kendezwaga ne vipimo vye ling'ani
no wuguzi wono wuling'aniciye.
12Ne watemi nawo yiwanojeye weleje na zo wubi.
Hambi ling'ani nha yo yinozaga wutemi wuwa wuli vilungo.
13No mutemi yendile kuzihulika ze mbeka.
Nayo yawendile muno wono walongaga zo mugoloka.
14No munhu we mahala,
kajelaga muno kumusangalaza mutemi.
Vyono hono mutemi yakolwe ne likuwo, ale, yunji kofwa.
15No wendezwe wo mutemi,
wihwanile mavunde gono gatonyezaga mvula ye mafuso,
namo mo mo wuli wumi.
16Na mbeka, yili ciba wuwe na mahala hamonga no wizuce,
si nho kuwa na zahabu hamonga na fweza.
17Ne wanhu we ling'ani, si wakolaga mu zinzila zo wubi.
Holeka nagwe wiyihengaje go mweneco,
wiwone kono wudomile kwihi.
Hambi nha yokuponya wumi wako.
18Wiwoni, wulongozaga ku wuhodanjice.
Nawo widunhumuzi kwi'fwa.
19Yili ciba winenenyheze no kwikala mu wuciwa.
Si nho kuwa mwi'puga lye wedunhumuzi,
no kuhanga nawo muli vyono wapumhile.
20Wuzibate zono wukwijizwa, holeka nagwe komoteswa.
Wumwitumbile Muwaha Mulungu, nagwe kosangalala.
21U we mahala mu nhumbula,
kamanyicilaga mu wutanje wakwe.
No muzinzi we zinghani zakwe wonjelezaga wumanye.
22Ne mahala, wo muvwilo wo wumi kuli we mahala.
Ninga hono wujele kuwejiza i walele,
wokwajiliziza bwete vipango vyako.
23Ne wanhu wono wena wizuce,
wamulaga kwihwesa, ho walonga.
Na kolo wakulonga, nghani zawo zikwendeza.
24Ne zinghani ziswanu zihwanile wuci.
Ku wujeze zili muzinzi, kanyhi swanu na mu muwili wako.
25Ne nzila yono agwe wukwihwesa yo swanu,
Ninga yokulongoza kwi'fwa.
26Ne nzala yo mwitumami,
yimunozaga ho yetume yahidimbaye.
Hambi nha yakuhila yegutye nzala yakwe.
27Ne wanhu wabi nhondo zose walondolaga nzila zo
kuwatamisiza wanji.
Sunga ne zinghani zawo, zinyanyaga vibi nha moto.
28Ne maheho, gatandazwaga ne wanhu wabi.
Hambi nha wekalaga wakusagahaza zimbi,
no kusonjeza wanhu, no kuwatemanula.
29I wanhu wagazi, wawakongaga wendece wawo,
no kuwenjiza mu wongomele.
30Wawalanjile wanhu wono wakusekanga,
akuno wakunghonyeza ne meso, wakunyihweseza i zimbi.
31No wikala mumi vilo vinji,
co cihumbilizwa ce wanhu we ling'ani.
Ne zimvwi nazo, wo mukumbo wo lukumyo.
32Yili ciba hono wuwe si wuli mupelu kwi'kuwo,
si nho munhu wa vilungo.
Kanyhi, yili ciba wuwe no wiyimizi,
si nho kutema mu makaya gose.
33I wanhu watowaga kula,
ho wawumanye wuhile wo Mulungu.
Ninga Mulungu mweneco, yo yena lipitulo.
Cigogo Bible © Bible Society of Tanzania, 2002.