Zimbazi 11
11
1U Muwaha Mulungu,
sikendezwaga ne wanhu wono
wetumamilaga vipimo vyo wukoci.
Ninga mwene,
kendezwaga ne vipimo vye ling'ani.
2Ne wanhu iwedunhumuzi,
wokozwa cevu kamonga.
Ninga mahala gali muli wenenenyhezi.
3Na hono wuwe wuli munhu muswanu,
winenenyhezi wokutonga.
Ne wanhu wose wono si wehuwilwa,
wokongomezwa no wu wula kuwa no wihuwilwa.
4Ninga wugoli hamba si wulakutaza cinji yaye
mwizuwa lyo kufwa.
Ninga wihuwilwa wokuponya wumi wako.
5Wihuwilwa wuyinozaga mikalile yo munhu muswanu
yiwa miswanu.
Ninga u munhu mubi,
kolofwa ku soko yo wubi wakwe.
6Wiling'ano wumuponyaga munhu mwinenenyhezi.
Ninga mono si mwihuwilwa,
kegwizaga mweneco no wubi wakwe.
7Na lono munhu mubi yakufwa,
kafwizaga hamonga no witumbilo wakwe.
No witumbila zo wugoli,
wowa nghani ya bwete du.
8Wanhu we ling'ani wakuwa kudimwa mu zimbali.
Langa i wabi,
zimbali ziwazizaga.
9Zinghani za wono wasina cogopo co Muwaha Mulungu,
zosuma kukwajiliza.
Ninga mahala ga wono wali ling'ani,
gosuma kukuponya.
10Ne likaya lisangalalaga lono we ling'ani
wakumota.
Na hono i wanhu wabi wafwe,
i wanhu wasangalalaga.
11Ne likaya litogozwaga lono wanhu we ling'ani
wakumota.
Ninga likaya lihodanjikaga ku soko ye makani ge wanhu wabi.
12Yo nghani ya wulele du yo kuwabedegala wanji.
Ninga hono wuwe munhu mono wina mahala,
konyamala twii.
13No munhu muhesi,
si kalonjelwaga nghani ze cinyele.
Langa wumwitumbile munhu mwihuwilwa.
14Ne likungugo ligwizaga hono hawe hasina wutonji.
Na mu winji we wanyamhala mo wuli wusume.
15Na hono wihuwize vyono komulipila
mujenzi mugawa wakwe,
kokwitajila mu mbali bwete.
Ciba hono wulece kwiyinjiza mu nghani yiyo.
16No mucekulu musindile,
yena lilumbo nhondo zose.
Ninga mucekulu mono si mutuvu,
yo nghani ya cevu du.
No munhu mudoba,
si katujilaga lukulu sawo.
Ninga munhu mupiligazi ku milimo,
kagolipaga.
17Kosuma kwinozeza ziswanu go mweneco
hono wuwe no lusungu.
Ninga hono wuwe wuli jila,
kokwitamisa wuli wene.
18Ne wanhu wabi,
si watugaga cambuzi co cose yaye.
Ninga hono witume ze ling'ani,
nagwe kohumbilizwa.
19Mono yakamile mu wiling'ano kowumipa.
Ninga mono katyatyaga wubi, kofwa.
20Muwaha Mulungu yawasulile i wanhu wo wuhile wubi.
Ninga yawendile wono wetumaga zo mugoloka.
21Na mbeka i wabi wolipicizwa, ninga
we ling'ani woponywa.
22U wuswanu we futa yo mucekulu,
hono wulece kuhanga no wuswanu we nyikala yakwe,
wuswanu wakwe wowa nhe nyamwidole ya zahabu
yono mvwice mu mhula ye ngubi.
23Wuhile wa we ling'ani nhondo zose wowu,
wetume ziswanu du.
Ninga i wabi kolo watuga vyono wakusaka,
hodu wose wakukolwa likuwo.
24Ko wali wanji wono wetumamilaga sawo zawo
nha vyono wendile,
ninga vyo wakucila kugolipa du.
Na ko wali wanji wono wetumamilaga sawo yawo
ko wulanjilizi muno,
ninga vyo wakucila kuciwapa muno.
25Weze no wucemezi, nagwe komoteswa.
Weze kuwapela wanji wutazi,
holeka nagwe kotuga wutazi.
26Wanhu wamulijitaga munhu
mono kahundikaga wuhemba,
yalindiye yatuje wuguzi wuswanu.
Ninga wamukumyaga mono kawaguzizaga wuhemba.
27Hono wuwe wupiligaye mu wulondola ziswanu,
wanhu wokwenda.
Ninga hono wuwe wuli mulondola zimbi,
nazo zimbi zokutuga.
28Nawo wono wetumbiye zisawo zawo,
wololagala nhe mahamha mwi'bahu.
Ninga we ling'ani womoteswa nhe mahamha mwi'fuku.
29No munhu mono kaletaga ciyagalo mu kaya yakwe,
ku ndumilizo si kokwambulila cinji yaye.
Nawo walele nhondo zose wowa wetumami we wanhu we mahala.
30Wiling'ano wuletaga wumi.
Ninga wugazi, wuwuwusaga.
31Ne wanhu waswanu,
watugaga cihumbilizwa cawo baha hono yinze.
Holeka wumanye vyono i wabi hamonga ne wanyo wubi wose,
wololipicizwa.
Cigogo Bible © Bible Society of Tanzania, 2002.