Zimbazi 12
12
1Munhu wo wose mono yendile wumanye,
yuyo kendaga no kulanjizwa lono yasutya.
Kanyhi yo nghani ya wulele,
munhu mono si yendile kulanjizwa.
2Muwaha Mulungu kendezwaga ne wanhu waswanu.
Ninga kawahosaga i wehwesa zimbi.
3Wubi si wumusikamyaga munhu yaye.
Ninga i we ling'ani,
wekalaga wasikame.
4U mucekulu musindile,
lye 'lumbo ne nyemo kuli mulume wakwe,
ninga mucekulu mono kamukozaga cevu u mulume wakwe,
yehwanile lilonda libi muno,
mu mafupa gakwe.
5I weling'ani, wokutendela viswanu.
Ninga i wabi, wosaka wakukonje du.
6Ne zinghani ze wanhu wabi, ziwulagaga.
Ninga zinghani za we ling'ani,
ziwaponyaga wono wakuzibocela.
7Ne wanhu wabi wafwizaga wakuleka wasina wana.
Ninga kaya ya we ling'ani, yokwikala.
8Hono wuwe wina mahala, wanhu wokulumba.
Ninga hono wuwe wuli mulele, wanhu wokubedegala.
9Yili ciba wuwe nha vyono winha,
wukwiyitujila ndigwa mu milimo yako.
Si nho kwinoza nha wuli munhu we lilumbo,
akuno ho wuli nzala.
10No munhu muswanu,
kazidimaga viswanu mitugo zakwe.
Ninga i wanhu wabi,
wali jila ku zi mitugo zawo.
11No munhu muhidimbazi kulima,
kekalaga yena ndigwa.
Ninga kwajiliza vipango so nghani zono zisina cambuzi,
yiyo yo nghani ya wulele du.
12Ne wanhu wabi,
wose walondolaga zo wituma makani mabi du.
Ninga we ling'ani wekalaga wasikame.
13No munhu mubi kegwizizaga mu zinghani zakwe mweneco.
Ninga we ling'ani kokwiponya mu wugaye.
14Ne cihumbilizwa cako,
cowa cili mu nghango ya zono kuzilongaga,
na zono kwitumaga.
Kopegwa vyono yikunojeye.
15Ne wanhu walele,
nhondo zose wene wehwesaga nha vyono wali ling'ani.
Ninga we mahala wahulicizaga kuli zo wulanjizwe.
16Likuwo lyo mulele kalilajilaga calinze.
Ninga we mahala,
si wendaga kwikoza cevu yaye.
17Na lono wukulonga ze mbeka,
ling'ani yikunozwa.
Ninga muhomelezi wo wulambi,
kayajilizaga ling'ani.
18Ne zinghani ze caka,
zikuwa kucinya nho mumaje.
Ninga zinghani zo munhu we mahala, ziponyaga.
19No munhu mulambi,
kekalaga vilo vicefu mono'nze.
Ninga munhu mono kalongaga ze mbeka,
kekalaga cibitilila.
20Wukoci wuli mu zinhumbula za wono wehwesaga zimbi,
ninga kuli wono wetumaga ku so ziswanu, wowona nyemo.
21Kanyhi hasina cinji cibi
cono cowaziza i wanhu we ling'ani.
Ninga i wabi, wambulilaga magayo du.
22Nayo Muwaha Mulungu yawasulile i wanhu walambi.
Ninga kendezwaga na wono wetumaga ze mbeka.
23I wanhu we mahala,
wahundikaga zono wazimanyile.
Ninga i walele,
wanzalikaga zo wulele wawo.
24No wituma milimo ko wupiligazi,
wokupela wutule.
Ninga wudoba, wokunoza wuwe muwanda.
25Ne mahwele,
gosuma kukuwusiza nyemo yako.
Ninga nghani swanu,
zosuma kukusangalaza.
26U munhu we ling'ani,
yo kawezaga mutonji wo muyagwe.
Ninga zinzila zo munhu mubi,
ziwatongaga ku wajilile.
27Nagwe hono wuwe mudoba,
hamba si kosuma kwiwutila vya kumwande.
Ninga hono wuwe wuli mupiligazi mu milimo,
kosuma kwiwutila vya kumwande.
28U wiling'ano, yo nzila yo wumi.
Ninga wubi, yo nzila ye lifwa.
Cigogo Bible © Bible Society of Tanzania, 2002.