Zimbazi 10
10
Zimbazi za Solomona
1Azi zo mbazi za Solomona, yakutya,
U mwana mono yena mahala,
kayisangalazaga nhumbula yo sogwe.
Ninga umwana mulele,
kamuletelaga nyina wusungu wukali muno.
2Sawo yono koyitujila mu nzila zo wubi,
yisina cambuzi.
Ninga wiling'ano,
wuponyaga mu wufwe.
3Muwaha Mulungu si kowaleceleza
i wanhu waswanu wawe wali nzala.
Langa kowaleka i wabi wekale si wavitujile vyono wakuvisaka.
4Hono wuwe wuli mudoba,
kokwiletela wuciwa,
ninga hono wuwe mupiligazi ku milimo, kogolipa.
5U munhu we mahala,
kakongholaga mbela nhwanga yakwe lono yakondya kupya.
Ninga yo nghani ya cevu,
munhu kuwa wugonile,
mu madaha ge mhwanga.
6U munhu muswanu katugaga wumoteswe.
Ninga zinghani zo munhu mubi,
zigubikaga wugazi.
7Ne wanhu waswanu wowa kukumbucilwa nha wumoteswe.
Ninga i wanhu wabi,
matagwa gawo gowa kuwola kamonga du.
8Ne wanhu we mahala,
wabocelaga mafundo maswanu kamonga.
Ninga i wanhu wono walongaga zo wulele,
awo wokongomezwa.
9I wanhu we ling'ani, wali mu mulamu,
kanyhi wali mu wucitilwe.
Ninga wono wasina cihuliko, womanyika.
10No munhu mono si yakuyityatya mbeka,
kaletaga mazozo.
Ninga mono yakutacila calinze,
kaletaga mulamu.
11Ne zinghani zo munhu muswanu,
wo muvwilo wo wumi.
Ninga zinghani zo munhu mubi,
zigubukaga wugazi.
12Lusulo, luletaga wiwanganile.
Ninga wendo, wugubikaga masutya.
13Iwanhu wono wena wizuce,
walongaga ze mahala.
Ninga i wanhu walele,
awo wakusaka kulipicizwa du.
14Nawo we mahala,
wakuwa kutuga wumanye mu nghango yawo.
Ninga zinonga ze walele,
ziletaga mazozo mbela mbela.
15Wugoli wuwatazaga wagoli,
nawo wuciwa wuwahodangaga i waciwa.
16Ne cipegwa so mulimo muswanu, wo wumi.
Ninga wubi wonjelezaga mukwelekwele wo kujendelela kwituma wubi.
17Ne wanhu wono wazibocelaga ze mafundo,
wawo wowumipa.
Ninga wanhu wono si wendile kuvumila ze masutya gawo,
wali mu mbali.
18No munhu mono kahundikaga simbili yakwe,
yuyo mulambi.
No munhu mono yendile kukumusa nghani zo wulambi,
munhu yuyo mulele.
19Mu winji we zinghani zako,
no wubi mo winjililaga mumo.
Ninga hono wuwe wina mahala,
yili ciba wuwe si wuli mulonji muno.
20Ne zinghani zo munhu muswanu,
zihwanile fweza swanu.
Ninga mahweso go munhu mubi,
gasina cambuzi.
21Ne zinghani zo munhu muswanu,
ziwaletelaga cambuzi wanhu wenji.
Ninga kosuma kwiwulaga wuli wene,
so nghani za wulele du.
22U wumoti wo Muwaha Mulungu,
wo wugolifyaga.
Ninga wituma milimo kwe vilungo,
si wokugolifya yaye.
23Kanyhi yo nghani ya wulele kusangalalila mu zimbi.
Ninga i wanhu wono wena wizuce,
wendezwaga ne mahala.
24Nawo we ling'ani,
watugaga vyono wasakaga.
Ninga iwabi, watugaga cono wakucogopa.
25Na hono civulavumbi cize,
ciwakwenghwelezaga wanhu wabi.
Ninga wanhu we ling'ani,
wekalaga nhondo zose, wapolile du.
26Wulece kumupela mulimo wako munhu mudoba yakwitumile,
hambi u munhu yuyo nha kokupaya mu meno gako nha pilipili,
kanyhi kowa nha malyosi gono gokufunyhila mu meso gako.
27Holeka agwe,
wumuhulice Muwaha Mulungu,
holeka kokwikala vilo vinji mono'nze.
Ninga i wanhu wabi wafwizaga na lono vipango vyawo vikali nafika.
28No witumbilo we wanhu waswanu,
wuwapelaga wusangalale.
Ninga i wanhu wabi,
wawezaga wasina witumbilo wo wose.
29Muwaha Mulungu kawadimaga wanhu we ling'ani.
Ninga kawongomezaga wose i wetuma zimbi.
30Iwanhu we ling'ani,
wokwikala mu wudimwe vilo vyose.
Ninga i wanhu wabi,
si wowumipa mono yinze.
31Ne wanhu we mahala,
walongaga zinghani ze mahala,
ninga u lulimi lono lulongaga zimbi,
lodumulwa.
32Kanyhi i wanhu we ling'ani,
wakuwa kumanya ziswanu zono ziwanojeye walonje.
Ninga i wanhu wabi nhondo zose,
walongaga zinghani zono zidahile kuwatamisa wanhu.
Cigogo Bible © Bible Society of Tanzania, 2002.