ISAYA 60
60
Vukhumi Vuliitsa Khuvaho vwa Yerusalemi
1Yivi litaala likali lia Yerusalemi, sinjila;
shichila vulavu vwovwo vwitsi,
khandi vukhumi vu Mwami Nyasaye
vumali khulolekha khu yivi.
2Heenzi, shisuundi shimwaminyi lilova
shisuundi shikali muno shimwaminyi vandu,
navutswa Mwami Nyasaye aliitsa khuva na munyi
khandi vukhumi vwevwe vuliitsa khulolekha khu munyi.
3Vandu vi tsimbia tsindi valiitsa khwitsa khu vulavu vwovwo,
khandi vami valiitsa khwitsa khulola vulavu vwovwo mu mavwevwe.
4Heenzakhu iyi neyo ulole shikholekhanga;
voosi vakananga halala, vitsanga khu yivi;
vaana vovo vi shiyayi valiitsa khurula ihale wene,
vaana vovo vi shikhana vachinjwi mu makhono.
5Nalwo lwa uliitsa khulola ma wang'ang'e.
Uliitsa khutechela nu vuyaanzi;
shichila livishilu mu inyanza liliitsa khulerwa khu yivi,
miandu chia vandu vi tsimbia tsindi
chiliitsa khwitsa khu yivi.
6Tsingamia tsinyishi tsiliitsa khuva shia havundu hosi
mu shivala shioshio,
tsingamia tsindoro tsia Midiani nende Efa;
voosi valiitsa khwitsa khurula Sheba.
Valiitsa khukhulerela itsahabu nende vubani
nivitsominya vulahi vu Mwami Nyasaye.
7Viayo via makondi koosi ka Kedari
viliitsa khwitsa khu yivi,
mamiiko ka Nebayotsi kaliitsa khukhurumishila;
kaliitsa khuhuchililwa khuli vihanwa vi misango khu vwaali vwanje,
makhole Litempeli lianje litakatifu
khuva nu vukhumi vunyishi khuvira khuli liavetsanga.
8Ni vanga viina yava vapulukhanga khuli malesi,
khuli vituti vikalukhanga mu vitsu viavo?
9Ni tsimeli tsirulanga mu vivala vili ihale wene,
tsiu khuraanga ni tsimeli tsia Tarishishi.
Tsileranga vaana vovo khurula ihale wene,
halala ni ifetsa nende itsahabu yavo,
khuha Mwami Nyasaye, uli Nyasaye wenyu luyali,
nali Nyasaye Mutakatifu wa Israeli,
uli nu Vukhumi wa Israeli,
shichila neye wachila numukhuminywa.
10Mwami Nyasaye avoolanga,
“Vacheni valiitsa khulomba vuyia masisi koko,
vami vavo valiitsa khukhurumishila;
shichila niitsa khukhusalilitsa mu vurima vwanje,
navutswa khurulana khu vulahi vwanje
niitsa khukhuvela tsimbavasi.
11Vilivwa viovio viliitsa khwikukha khumatukhu koosi;
viliitsa khulekhwa khwikalwa mbasu nu vutukhu;
vandu valiitsa khuvirilamu ni vakhulerelanga miandu
chia vandu vi tsimbia tsindi,
vami vavo ni va vaheleshitsanga.
12Navutswa luhia inoho vwami
vuliitsa khwambakhana khukhurumishila vuliitsa khutiva;
vandu vi tsimbia tsienetso valiitsa khutivitswa.
13“Uliitsa khuheelwa vukhumi vu muliru kwa Lebanoni kunyolanga,
misala chi mitalakwa, musiyenze nende ipainiati,
khurumishilwa khusiaya havundu hanje hatakatifu;
ninzi niitsa khukhuha vukhumi havundu haseenanga.
14Vaana va vandu vamunyashitsanga
valiitsa khwitsa khukhwinamila;
yavo voosi vakhuchayanga valiitsa khukhwinamila
nivakhulaanga Litaala likali liu Mwami Nyasaye,
uli Nyasaye weru,
litaala lia Sayoni lia Nyasaye, uli Mutakatifu weru.
15“Khali niiva walekhwa khandi wayambakhanwa,
vuchila mundu khukhalakanyila mu yivi,
niitsa khukhukhola khuva litaala likali li tsingulu
khandi lilahi havundu haliitsa khuva nu vuyaanzi khumatukhu koosi.
16Uliitsa khulerelwa shiukhulia na vandu vi tsimbia tsindi;
vami valiitsa khukhulerela shiukhulia shilahi shiene.
Nalwo lwa uliitsa khumanya ndi ninzi Mwami Nyasaye, uli Muhonyinyi wowo,
khandi Muhavini wowo, Nyasaye Uli Ikulu khu Viosi wa Yakobo.
17“Niitsa khukhulerela itsahabu havukono wu mukasa,
shivia havukono hi ifetsa.
Niitsa khukhulerela mukasa havukono wi tsikhuyi,
vivia havukono ha machina.
Milembe chiliitsa khumwimilila,
khandi likhola liu vulunji liliitsa khuva khuli mwamihi.
18Liyooko liu khusalilitsa vandi
liliitsa khuvula khuhulilikhanakhu mu shivala shioshio;
inoho livitivitswa inoho liononyinywa mu shivala shioshio.
Navutswa uliitsa khulaanga masisi koko vuhonyinyi
khandi vilivwa viovio litsominywa.
19“Liuva liliitsa khuvula khuva vulavu vwovwo mbasu,
inoho mweli khumwashila,
shichila inzi Mwami Nyasaye
niitsa khuva vulavu vwovwo mihika ni mihika.
Inzi Nyasaye wowo niitsa khuva vukhumi vwovwo.
20Vuveleli vwovwo vuliitsa khutukha khushiahakamo,
shichila inzi Mwami Nyasaye
niitsa khuva vulavu vwovwo mihika ni mihika,
khandi vulavu vwovwo vuliitsa khutsililila khuvaho
khuvira vwi liuva nende mweli.
21Nalwo lwa vandu vovo voosi valiitsa khuva valunji
valimenya mu shivala mihika ni mihika.
Navo viseevu via naraaka,
nu kuli muhinzilu kwanje kwa nakhola,
nikanyalikha vambe vukhumi.
22Woyo ulolekhanga khuva muti khu munyi
aliitsa khuva lwivulu lwa vandu vanyishi,
ulolekhanga muti khuvira voosi
aliitsa khuva luhia lukali.
Ninzi Mwami Nyasaye;
niitsa khukarweshitsa vwangu mumatukhu kenyekhanga.”
© The Bible Society of Kenya, 2013