ᒨᓯᓯ ᓯᑕᒪᖏᑦ 25
25
ᐃᓴᕆᐊᓕᒥᐅᑦ ᐱᐅᕆᒦᓐᓂᖏᑦ
1ᐃᓴᕆᐊᓕᒥᐅᑦ ᓄᖅᑲᖓᓚᐅᕐᐳᑦ ᓯᑎᒻᒥ, ᐃᓄᐃᓪᓗ ᓄᓕᐊᒐᕐᓂᒃ ᐱᖃᑎᖃᖃᑦᑕᓕᓚᐅᕐᐳᑦ ᒧᐊᐱᒥᐅᑦ ᐊᕐᓇᖏᓐᓂᒃ. 2ᑖᒃᑯᐊ ᕾᖁᔨᖃᑦᑕᓚᐅᕐᒪᑕ ᐃᓴᕆᐊᓕᒥᐅᓂᒃ ᒎᑎᓐᖑᐊᒥᖕᓄᑦ ᑐᓂᕐᕈᓯᕌᖓᒥᒃ, ᐃᓄᐃᓪᓗ ᓂᕆᖃᑦᑕᓚᐅᕐᐳᑦ ᐹᒻᒪᒃᑎᕐᓗᑎᒡᓗ ᒎᑎᓐᖑᐊᖏᓐᓄᑦ. 3ᑍᒤᒻᒪᑦ ᐃᓴᕆᐊᓕᒥᐅᑦ ᑐᒃᓯᐊᖃᑕᐅᓕᓚᐅᕐᐳᑦ ᐰᓕ-ᐱᐅᕆᒥ, ᐊᑕᓂᐅᓪᓗ ᓂᓐᖓᐅᓯᖓ ᐆᒻᒪᕐᐳᖅ ᐃᓴᕆᐊᓕᒥᐅᓄᑦ.
4ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᐃᓄᐃᑦ ᓯᕗᓕᕐᑎᓕᒫᖏᑦ ᑎᒍᒃᑭᑦ ᐸᓯᔭᒃᓴᐅᔪᑦ ᕿᒥᓪᓗᒋᑦ ᐊᑕᓂᐅᑉ ᓵᖓᓂ, ᐅᓪᓘᑎᓪᓗᒍ, ᐊᑕᓂᐅᑉ ᓂᓐᖓᐅᒪᓂᖓ ᐃᓴᕆᐊᓕᒥᐅᓂᒃ ᕿᒤᖁᓪᓗᒍ.” 5ᒨᓯᓯ ᐃᓴᕆᐊᓕᒥᐅᑦ ᐃᓱᒪᓕᐅᕐᑎᖏᓐᓄᑦ ᐅᖃᕐᐳᖅ, “ᐃᓄᖁᑎᓕᒫᓯ ᑐᖁᕋᕐᓯᒋᒃ ᑐᒃᓯᐊᖃᑕᐅᔪᑦ ᐰᓕ-ᐱᐅᕆᒥᐅᑕᕐᒧᑦ.”
6ᐃᓴᕆᐊᓕᒥᐅᑦ ᐃᓚᖓᑦ ᐊᖑᑦ ᐃᓚᒥᓄᐊᕈᑦᔨᕗᖅ ᐊᕐᓇᒥᒃ ᒥᑎᐊᓂᒥᐅᑕᕐᒥᒃ ᒨᓯᓯ ᑕᑯᓐᓇᕐᑎᓪᓗᒍ ᐃᓴᕆᐊᓕᒥᐅᓪᓗ ᕿᐊᑎᓪᓗᒋᑦ ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓᓂ. 7ᐱᓂᕼᐋᓯᐅᓪᓕ ᐃᓕᓯᕆᐅᑉ ᐃᕐᓂᖓᑕ, ᐂᕉᓂᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᖑᑕᖓᑕ, ᑕᑯᒐᒥᐅᑉ, ᒪᑭᑉᐳᖅ ᐃᓄᒋᐊᒃᑐᕐᔪᐊᑦ ᐊᑯᕐᖓᓐᓂᑦ ᓇᐅᒃᑯᑎᒥᒃ ᑎᒍᓯᓪᓗᓂ; 8ᐊᖑᑦ ᐃᓴᕆᐊᓕᒥᐅᑕᖅ ᒪᓕᒃᓴᕐᐹ ᑐᐱᖓᓄᑦ ᐃᑎᕐᓗᓂ ᑕᒪᕐᒥᒃ ᐊᑕᐅᑦᓯᒃᑯᑦ ᑲᐱᓪᓗᒋᒃ ᐃᓴᕆᐊᓕᒥᐅᕐᓗ ᐊᖑᑦ ᐊᕐᓇᕐᓗ. ᑍᒫᒃ ᐋᓐᓂᐊᓇᕐᑐᖅ ᑐᖁᕅᔪᖅ ᓄᖅᑲᕐᐳᖅ ᐃᓴᕆᐊᓕᒥᐅᓂᑦ. 9ᓂᓐᖓᐅᒪᕕᐅᓂᕐᒧᑦ ᑐᖁᕅᔪᒧᑦ ᑐᖁᔪᑦ 24,000ᐅᓚᐅᕐᐳᑦ.
10ᑕᕝᕙ ᐊᑕᓂᖅ ᐅᖃᓕᕐᐳᖅ ᒨᓯᓯᒧᑦ, ᐅᖃᕐᓗᓂ: 11“ᐱᓂᕼᐋᓯ ᐃᓕᓯᕆᐅᑉ ᐃᕐᓂᖓᑕ, ᑐᓂᕐᕈᓯᕐᑎᑦᓯᔨᐅᑉ ᐂᕉᓂᐅᑉ ᐃᕐᖑᑕᖓᑕ, ᐃᓴᕆᐊᓕᒥᐅᓄᑦ ᓂᓐᖓᐅᒪᓂᕋ ᓄᖅᑲᕐᑎᑉᐹ, ᐊᒃᓱᕈᕐᓗᓂ ᓴᐳᑦᔨᔪᒪᓪᓚᕆᖕᒪᑦ ᐅᕙᑦᑐᑦ ᐅᐱᒋᔭᐅᓂᕋ ᐃᓄᖕᓄᑦ ᐱᓪᓗᒍ, ᐃᓴᕆᐊᓕᒥᐅᓂᒃ ᓴᐳᑦᔨᔪᒪᓪᓗᓂ ᓄᖒᑦᓯᖁᓇᖓ ᑖᒃᑯᓂᖓ ᑲᔪᓯᔪᒪᓂᓐᓄᑦ. 12ᑍᒤᒻᒪᑦ ᐅᖃᐅᑎᒍᒃ ᑕᑯᒋᑦ, ᐊᖏᖃᑎᒌᖕᓂᕐᒥᒃ ᑐᓂᓯᕕᒋᕙᒋᑦ ᓮᒪᓇᕐᑐᒦᖁᓪᓗᑎᑦ; 13ᑖᓐᓇ ᑭᖑᕚᖏᓪᓗ ᐊᖏᖃᑎᒌᒍᑎᒧᑦ ᑐᓂᕐᕈᓯᕐᑎᑦᓯᔨᐅᖏᓐᓇᕐᓂᐊᓕᕐᐳᑦ ᐃᓱᖃᖏᑦᑐᒧᑦ, ᒎᑎᒥᓂᒃ ᐊᒃᓱᕈᕈᑎᖃᓚᐅᕐᒪᑦ ᓴᐳᑎᔪᒪᓪᓗᒍ, ᐃᓴᕆᐊᓕᒥᐅᓂᒃ ᐃᓱᒪᒋᔪᓐᓁᕐᕕᐅᑎᑦᓯᓚᐅᕐᒪᑦ.”
14ᐃᓴᕆᐊᓕᒥᐅᕐᓕ ᑐᖁᑕᐅᓚᐅᕐᑐᖅ, ᐊᕐᓇᒥᒃ ᒥᑎᐊᓂᒥᐅᑕᕐᒥᒃ ᑐᖁᑕᐅᖃᑎᖃᓚᐅᕐᑐᖅ, ᐊᑎᖃᕐᐳᖅ ᔨᒻᕆ ᓴᓘᑉ ᐃᕐᓂᖓ, ᓯᕗᓕᕕᓂᖓᑕ ᓯᒥᐅᓂᐅᑉ ᑭᖑᕚᖏᓐᓂ ᓯᕗᓕᕐᑎᐅᔪᖅ. 15ᒥᑎᐊᓂᒥᐅᓪᓗ ᐊᕐᓇᐅᑉ ᑐᖁᑕᐅᓚᐅᕐᑑᑉ ᐊᑎᖓ ᑰᔾᐱ ᔫᕆᐅᑉ ᐸᓂᖓ; ᐊᑖᑕᖓ ᓯᕗᓕᕐᑎᐅᓚᐅᕐᐳᖅ ᑭᖑᕚᖑᖃᑎᒥᓂ ᒥᑎᐊᓂᒥᐅᓂ.
16ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, 17“ᒥᑎᐊᓂᒥᐅᑦ ᐊᑭᕋᑐᑦ ᐱᓂᐊᕐᕕᒋᒃᑭᑦ ᑐᖁᕋᕐᓗᒋᓪᓗ, 18ᐊᑭᕋᒥᒃᑎᑐᑦ ᐱᓂᐊᕐᕕᒋᓚᐅᕐᒪᓯ ᐃᓕᑦᓯᓐᓂᒃ ᓯᓔᕐᕆᒃᓯᓂᕐᒥᒃᑎᒍᑦ, ᐃᒃᓯᒎᕐᑎᓚᐅᕐᒪᓯ ᐱᐅᕆᒥ, ᑰᔾᐱᒧᓪᓗ, ᒥᑎᐊᓂᒥᐅᑦ ᓯᕗᓕᕐᑎᖓᑦᑕ ᐸᓂᖓᓄᑦ, ᓇᔭᒃᑎᒃ, ᑐᖁᑕᐅᓚᐅᕐᑐᖅ ᓂᓐᖓᐅᒪᓂᖅ ᑐᖁᓰᔪᖅ ᐱᓕᕐᑎᓪᓗᒍ ᐱᐅᕆᒥ.”
Zvasarudzwa nguva ino
ᒨᓯᓯ ᓯᑕᒪᖏᑦ 25: EAIB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Eastern Arctic Inuktitut Bible © Canadian Bible Society, 2012, 2021-2023.